သျှမ်းပြည် ရွာငံမြို့နယ်တွင် အမျိုးသားတစ်ဦး ဓာတ်တိုင်ပေါ် လျှပ်စစ်မီး တက်ပြင်ရာမှ မတော်တဆ ထိခိုက်မိခြင်းကြောင့် လျှပ်စစ်ဓာတ်လိုက်၍ သေဆုံးခဲ့ကြောင်း စုံစမ်းသိရသည်။
ယမန်နေ့ (ဇွန်လ ၄ ရက်) နေ့လယ်ပိုင်း၌ ရွာငံမြို့နယ် သိမ်ကုန်းရွာနှင့် အင်းကြီးရွာကြားရှိ ဓာတ်တိုင်ပေါ်သို့ အမျိုးသားတစ်ဦး လျှပ်စစ်မီးကြိုး တက်ပြင်ရာမှ မတော်တဆ ထိခိုက်မိခြင်းကြောင့် လျှပ်စစ်ဓာတ်လိုက်၍ သေဆုံးခဲ့ရကြောင်း ရွာငံမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မြို့မှာကော ရွာဖက်မှာကော မိုးရွာပြီး သစ်ပင်တွေ ကျိုးလို့ မီးတွေပျက်နေတာ ကြာပြီ။ မီးက မလာတော့ သိမ်ကုန်းနဲ့ အင်းကြီးကြားမှာရှိတဲ့ မီးတိုင်ပေါ်ကို သူက မီးတက်ပြင်တာ။ တစ်ဘက်ကလည်း မသိဘဲ မီးစမ်းဖွင့်ကြည့်တာ နေမယ်၊ အဲ့မီးတိုင်ပေါ်မှာပဲ ချက်ချင်း ဓာတ်လိုက်ပြီး ပွဲချင်းပြီး ဆုံးသွားတာ။ မီးတော့ အခုထိ မလာသေးဘူး”ဟု ရွာငံမြို့ ဒေသခံ ၎င်းအမျိုးသမီးက ပြောသည်။
ဓာတ်လိုက်သေဆုံးသွားသည့် အမျိုးသားသည် ရေချမ်းပြင်ရွာနေ အသက် ၂၀ ဝန်းကျင်ရှိ ကိုသားလေး ဆိုသူ ဖြစ်ကြောင်း သိရသည်။
ထိုသိမ်ကုန်းရွာမှ ရွာငံမြို့သို့ သွားရောက်လိုပါက မိနစ် ၄၀ ဝန်းကျင်ခန့်သာ ကြာမြင့်ကြောင်း သိရသည်။
ရွာငံမြို့နယ်တွင် မိုးများ အဆက်မပျက် ရွာသွန်း၍ သစ်ပင်သစ်ကိုင်းများ ကျိုးကျကာ မေလ နောက်ဆုံးပတ်မှစ၍ တစ်ပတ်ကျော်ကြာ လျှပ်စစ်မီးများ ပြတ်တောက်နေသည့်အပြင် အချို့ကျေးရွာများတွင် ရေပိုက်လိုင်းများ၊ ဖုန်းလိုင်းများ ပြတ်တောက်နေကြောင်း သိရသည်။
Leave a Comments