သျှမ်းပြည် တောင်ကြီးမြို့တွင် စစ်ကောင်စီလက်အောက်ခံ ယာဉ်ထိန်းရဲတပ်ဖွဲ့မှ လိုင်စင်မဲ့ ကားများကို ဦးတည်ဖမ်းနေပြီး ပြန်ရွေးခွင့်မပေးတော့ကြောင်း သတင်းရင်းမြစ်များထံမှ စုံစမ်းသိရသည်။

ပြီးခဲ့သည့် ဇွန်လ (၁)ရက်နေ့မှ စတင်၍ ယနေ့ ဇွန်လ (၅)ရက်နေ့အထိ တောင်ကြီးတွင် စစ်ကောင်စီလက်အောက်ခံ ယာဉ်ထိန်းရဲတပ်ဖွဲ့မှ လိုင်စင်မဲ့ ကားများကို ဦးတည်ဖမ်းဆီးနေပြီး စုစုပေါင်း ကားအစီးရေ ၄၀၀ ကျော်နှင့် ဆိုင်ကယ်အစီးရေ ၄၀၀ နီးပါး ဖမ်းဆီးထားကာ ဖမ်းဆီးထားသည့် ကားများကို မည်သူကိုမှ ပြန်လည်ရွေးထုတ်ခွင့် မပေးတော့ကြောင်း တောင်ကြီးဒေသခံများက ပြောသည်။

“ကားတွေကိုပဲ အဓိကဖမ်းတာ၊ ဆိုင်ကယ်က စုတ်ပြတ်သတ်နေရင် မဖမ်းဘူး။ အကောင်းစား ဆိုင်ကယ်ဆို အမျိုးမျိုး ရစ်ပြီးဖမ်းတာ။ ဘက်မှန် မပါလို့၊ လိုင်စင်မပါလို့နဲ့ အမျိုးမျိူးရစ်တာ။ တကယ်လို့ ဆိုင်ကယ်ဖမ်းခံရရင် တန်းလိုက်ရွေးမှ၊ မဟုတ်ရင် သူတို့အပြီးသိမ်းတာတဲ့။ ကားဆိုရင်တော့ ရွေးလို့ကို မရဘူး။ သူတို့ သံရည်ကြိုစက်ထဲပဲ ထည့်မလား မသိဘူး” ဟု တောင်ကြီးမြို့ခံ အမျိုးသမီးတစ်ဦးက ပြောသည်။

စစ်ကောင်စီ လက်အောက်ခံ ယာဉ်ထိန်းရဲများသည် လမ်းဆုံနှင့် မြို့ဝင်မြို့ထွက်တွင် အဓိကနေရာယူ ဖမ်းဆီးနေပြီး ကားနှင့် ဆိုင်ကယ် အရောင်းဆိုင်များထိလည်း လိုက်လံဖမ်းဆီးနေသည်ဟု ၎င်းက ဆက်ပြောသည်။

လိုင်စင်မဲ့ ယာဉ်များကို ဖမ်းဆီးခြင်း၊ ခိုးဆိုးလုယက်မှုများ များပြားလာခြင်းတို့ကြောင့် ညနေ (၇)နာရီမှစပြီး တောင်ကြီးမြို့ လမ်းမများပေါ်တွင် လူခြေတိတ်ဆိတ်လျက် ရှိနေပြီး ကားများ ဖမ်းဆီးခံရခြင်းကြောင့် ဈေးဝယ်ထွက်၍ မရဘဲ အခက်အခဲ ကြုံနေရသည်ဟု အမျိုးသားတစ်ဦးက ပြောသည်။

“အရင်ကဆို တောင်ကြီးမှာ ည ၁၀ နာရီအထိ လည်နေလို့ ကောင်းတုန်း။ ခုဆို ည ၇ နာရီဆို လူသူမရှိ ခြောက်ကပ်နေရော။ လိုင်စင်မဲ့ ဆိုပြီး ဖမ်းမှာ ကြောက်တာရယ်၊ လုယက်ခံရမှာ ကြောက်တာရယ်ကြောင့် ခုဆို ညနေကတည်းက တိတ်ဆိတ်နေတာ။ ကားဖမ်းခံရတာလည်း ဘာမှ လုပ်လို့ မရတော့ဘူး၊ အလှူလို့ပဲ သတ်မှတ်မှ ရတော့မယ်။ ဖမ်းလို့ရတဲ့ ကားတွေဆို အစိုးရ ဝန်ထမ်းတွေအတွက် ပေးမလားမသိဘူး” ဟု အဆိုပါ အမျိုးသားတစ်ဦးက ပြောသည်။

ဆိုင်ကယ်များသည် လိုင်စင်မပါလျှင် ကျပ်(သုံးသောင်း)၊ လိုင်စင်မရှိလျှင် ကျပ်(တစ်သိန်း)နှင့် ထောင်တစ်လ ချခံရမည် ဖြစ်ပြီး နံပါတ်ပြား မထင်ရှားပါက ပုဒ်မ ၈၄(က)၊ ၉၄ တို့ဖြင့် ထောင်ဒဏ် (၃)လမှ ငွေကျပ်(သုံးသိန်း) ကျခံရမည်ဖြစ်ကြောင်း စစ်ကောင်စီမှ ထုတ်ပြန်ထားသည်။

ထို့အပြင် တောင်ကြီးမြို့ပေါ်တွင် ယနေ့ ဇွန်လ (၅)ရက်နေ့တွင် တိုက်လေယာဉ် တစ်စီး ပျံသန်းသွားသည့် အသံကြောင့် ပြည်သူများ ထိတ်လန့်ခဲ့ရကြောင်း သိရသည်။

အလားတူ နမ့်စန်မြို့နှင့် တာချီလိတ်မြို့တို့တွင်လည်း လိုင်စင်မဲ့ ယာဉ်များ ဖမ်းဆီးလာခြင်းကြောင့် လမ်းမပေါ်တွင် ယာဉ်များ ကင်းရှင်းနေကာ တိတ်ဆိတ်လျှက် ရှိသည်ဟု မြို့ခံများထံမှ သိရသည်။

ပြီးခဲ့သည့် မေလ (၂)ရက်နေ့တွင် စစ်ခေါင်းဆောင်မှ လိုင်စင်မဲ့မော်တော်ယာဉ်နှင့် ဆိုင်ကယ်များကို ထိထိရောက်ရောက် ဖမ်းဆီးအရေးယူရန် ညွှန်ကြားခဲ့ပြီး သျှမ်းပြည်တောင်ပိုင်းရှိ ဟဲဟိုး၊ ညောင်ရွှေ၊ အောင်ပန်း၊ ရပ်စောက်၊ ဟိုပုံး၊ ဆီဆိုင်နှင့် ပင်လောင်းမြို့ဘက်တွင်လည်း ဈေးလာသုံးသည့် ပြည်သူများ၏ ဆိုင်ကယ်၊ ကားများ သိမ်းဆည်းခံခဲ့ရသည်ဟု သိရသည်။