စစ်ကောင်စီတပ်နှင့် PNO ပြည်သူ့စစ်တို့က မြေပြင်စစ်အင်အား အလုံးအရင်းဖြင့် ထိုးစစ်ဆင်တိုက်ခိုက်နေ၍ ညောင်ရွှေမြို့နယ်က အင်းလေးပြည်သူ့ကာကွယ်ရေးတပ် IPDF ထိန်းချုပ်နယ်မြေအချို့ လက်လွတ်လိုက်ရကြောင်း သတင်းရရှိသည်။

စစ်ကောင်စီနှင့် PNO အင်အား ၁၀၀၀ ခန့်ပါဝင်သည့် ထိုစစ်ကြောင်းသည် ဇွန်လ ၂ ရက်နေ့ကတည်းက ညောင်ရွှေမြို့နယ် ဘုရားတောင်ကျေးရွာနှင့် ရေပူကျေးရွာသို့ စစ်ကြောင်းထားလာသည့်အတွက် ထိတွေ့တိုက်ပွဲဖြစ်ပြီး အင်အားမမျှသဖြင့် ရေပူရွာမှ ဆုတ်ခွာပေးလိုက်ရကြောင်း အင်းလေးပြည်သူ့ကာကွယ်ရေးတပ် IPDF ကထုတ်ပြန်ထားသည်။

“အခုရေပူ၊ တောင်ပို့ကွဲ၊ ဟိုပန်ကနေ ဆုတ်ပေးလိုက်ရတယ်။ အထိအခိုက်မရှိဘူး။ စစ်ကြောင်းကတော့ ထိုးလာတာအများကြီး၊ လေကြောင်းနဲ့ရော လက်နက်ကြီးနဲ့ပါ ကူပစ်နေတယ်” ဟု IPDF နှင့် နီးစပ်သည့် သတင်းအရင်းအမြစ်တစ်ဦးက ပြောသည်။

ယခုတိုက်ပွဲတွင် စစ်ကောင်စီတပ်နှင့် PNO ပြည်သူ့စစ်တို့သည် အင်အားအလုံးအရင်းဖြင့် ထိုးစစ်ဆင်တိုက်ခိုက်သည့်အပြင် ဒရုန်း၊ လက်နက်ကြီးနှင့် လေကြောင်းတိုက်ခိုက်မှုများပါး ပြုလုပ်ကြောင်း သိရသည်။

စစ်ကောင်စီ လက်အောက်ခံ PNO ၏ လူမှုကွန်ရက်တွင်လည်း တော်လှန်တပ်ရေးတပ်ဖွဲ့များ ၃ နှစ်နီးပါး တပ်စွဲထားသည့် ထီခိုးကျေးရွာ၊ ရေပူကျေးရွာ၊ ဘုရားတောင်တို့ကို စစ်ကောင်စီတပ်နှင့် ပူးပေါင်းထိုးစစ်ဆင် သိမ်းပိုက်နိုင်ခဲ့ကြောင်း ထုတ်ပြန်ထားသည်။

ပြီးခဲ့သည့် ၂၀၂၃ ဒီဇင်ဘာလတွင် ဖယ်ခုံအင်းအရှေ့ခြမ်း ဆောင်နန်းခဲစခန်းကို တော်လှန်ရေးတပ်များ သိမ်းယူလိုက်ပြီးနောက် ညောင်ရွှေမြို့နယ် တောင်ဘို့ကွဲ၊ ဟိုပန်နှင့် ညောင်လေးပင်နှင့် ပင်လောင်းမြို့နယ် နမ့်တုတ်၊ ကုန်းသာ၊ အိမ်မူရွာမှာ တော်လှန်ရေးအဖွဲ့များ ရောက်ရှိနေခဲ့ပြီး ဖြစ်သည်။

ထို့အပြင် အင်းလေးပြည်သူ့ကာကွယ်ရေးတပ် IPDF လည်း ၂၀၂၃ ဇန်နဝါရီလမှစ၍ အင်းလေးဒေသတွင် စတင်အခြေချထားကြောင်း သိရသည်။

လက်ရှိတွင် ရေပူနှင့် ဘုရားတောင်ရွာတွင် စစ်ကောင်စီတပ်နှင့် PNO ပြည်သူ့စစ်တို့က အင်အားအလုံးအရင်းဖြင့် စစ်ကြောင်းထိုးဝင်လာပြီးနောက် ရွာလုံးကျွတ်ထွက်ပြေးတိမ်းရှောင်နေရကြောင်း ဒေသခံများကပြောသည်။

တိုက်ပွဲအတွင်း ဒေသခံနေအိမ်များ မီးရှို့ဖျက်ဆီးမှုများရှိသော်လည်း မည်သည့်အဖွဲ့အစည်းလုပ်သည်ကို အတိအကျမသိရဘဲ တော်လှန်ရေးအဖွဲ့များနှင့် PNO ပြည်သူ့စစ်တို့ အပြန်အလှန်စွပ်စွဲပြောဆိုနေကြသည်။

ကရင်နီပြည်အတွင်း ထောက်ပို့ဆက်သွယ်ရေးလမ်းကြောင်းအတွက် အဓိက အရေးပါသော မြို့တော် လွိုင်ကော်-မိုးဗြဲ-ဖယ်ခုံ လမ်းပိုင်းကို ထိန်းချုပ်ရန် စစ်ကောင်စီက မေလဆန်းပိုင်းမှစ၍ ပင်လောင်း၊ ညောင်ရွှေ နှင့် ဆီဆိုင်မြို့တို့ဘက်မှ စစ်ကြောင်းထိုးနေသောကြောင့် ယင်းမြို့နယ်များတွင် ထိတွေ့တိုက်ပွဲများ ဖြစ်ပွားနေသည်။

စစ်ကောင်စီက အရပ်ပစ်ထားသော်လည်း ဇွန်လ ၁ ရက်နေ့တွင် ဆီဆိုင်မြို့နယ် နောင်ထော်နှင့် ဇွန်လ ၂ ရက်နေ့တွင် PNLO ဌာနချုပ်ကို ဦးတည်၍ မောက်မယ်မြို့နယ် ကဒူးကြီးဒေသ ဗန်းမောက်ကို လက်နက်ကြီးဖြင့် ၁၀ ကြိမ်ထက်မနည်း ရမ်းတမ်းပစ်ခတ်ခဲ့ကြောင်း PNLA က ထုတ်ပြန်ထားသည်။

ဖယ်ခုံအင်းအရှေ့ဘက်ကမ်း ညောင်ရွှေမြို့နယ်နှင့် ပင်လောင်းမြို့နယ်ရှိ ကျေးရွာများကို စစ်ကောင်စီနှင့် PNO ပြည်သူ့စစ်တို့က နှစ်လအတွင်း လက်နက်ကြီးဖြင့် ၇၁ ကြိမ်ပစ်ခတ်တိုက်ခိုက်ခဲ့ပြီး အမျိုးသား ၁ ဦးသေဆုံးခဲ့ရကြောင်း အင်းလေးဒေသ လူ့အခွင့်အရေးအဖွဲ့က ယနေ့တွင် ထုတ်ပြန်ထားသည်။