သျှမ်းပြည် လားရှိုးမြို့နယ်အတွင်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ကိုးကန့်တပ်ဖွဲ့ MNDAA တို့အကြား တိုက်ပွဲပြန်လည်ဖြစ်ပွားခဲ့ကြောင်း စုံစမ်းသိရသည်။

ယနေ့ (ဇွန်လ ၁ ရက်) နေ့လယ် ၂ နာရီကျော်အချိန်တွင် လားရှိုးမြို့နယ် ဟန်နားကျေးရွာအုပ်စု နမ့်လုတ်ရွာအနီးတွင် သျှမ်းတပ် SSPP/SSA နှင့် ကိုးကန့်တပ်ဖွဲ့ MNDAA တို့အကြား တစ်လကြာပြီးနောက် ထိတွေ့တိုက်ပွဲ ပြန်လည်ဖြစ်ပွားခဲ့သည်။

မေလ (၂၅) ရက်က စတင်ပြီး SSPP ဘက်မှ MNDAA ယခင်လကတည်းက ဝင်ရောက်နေရာယူခဲ့သည့် နေရာများသို့ စစ်အင်အား အလုံးအရင်း ပြန်လည်ဖြည့်တင်းခဲ့ပြီးနောက် ယခုကဲ့သို့ တိုက်ပွဲပြန်လည်ဖြစ်ပွားခဲ့ကြောင်း လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“တိုက်ပွဲဖြစ်တာ ဟုတ်တယ်၊ ဟန်နားမှာတော့ အခု ပထမဆုံး တိုက်ပွဲဖြစ်တာ။ အရင်လက ကိုးကန့်ဝင်လာတဲ့ နေရာအားလုံးကို SSPP နေရာပြန်ယူတဲ့သဘောပါ။ နားမခေါ်၊ ပန်ညုဘက်လည်း အင်အားဖြည့်ထားတယ်။ ကိုးကန့် ပြန်မဆုတ်ပေးရင် ပစ်မယ်လို့ အစိမ်း (SSPP) ဘက်က ပြောထားတာ တစ်ပတ်လောက် ရှိပြီ”ဟု လားရှိုးဒေသခံ ၎င်းအမျိုးသားက ပြောသည်။

ဧပြီလ ၂၈-၂၉ ရက်တွင် သီပေါမြို့နယ် နမ္မကျောက်မီးသွေးတွင်း၌ စတင်ဖြစ်ပွားခဲ့သည့် SSPP/SSA နှင့် MNDAA တို့အကြား စစ်ရေးပဋိပက္ခသည် တစ်လကျော် ကြာသည်အထိ ဆက်လက်တင်းမာနေပြီး SSPP ထိန်းချုပ်မှုအောက်ရှိ စိန်ကျော့တပ်စခန်းသို့ ဦးတည်ထားသည့် လမ်းကြောင်းအားလုံးတွင် ကိုးကန့်တပ်ဖွဲ့ MNDAA က မေလ နောက်ဆုံးပတ်အထိ နေရာယူ တပ်စွဲခဲ့ကြောင်း ဒေသခံများက ပြောသည်။

၎င်းနောက် မေလ ၂၅ ရက်မှ စတင်ပြီး သီပေါနှင့် လားရှိုးမြို့နယ်အတွင်း MNDAA ဘက်မှ ကျူးကျော်ဝင်ရောက်ခဲ့သည့် ကျေးရွာများသို့ SSPP/SSA မှ အင်အားဖြည့်တင်းမှုများ ပြုလုပ်ခဲ့ပြီး နှစ်ဘက်တပ်ဖွဲ့ စစ်ရေးတင်းမာသည့် အနေအထားရှိကြောင်း သိရသည်။

မေလဆန်းပိုင်းတွင် SSPP ဘက်မှ ဗဟိုနိုင်ငံရေးကော်မတီနှင့် MNDAA ဘက်မှ ဗဟိုအဆင့် တာဝန်ရှိသူများသည် ‘ဝ’တပ်ဖွဲ့ UWSA ထိန်းချုပ် ပန်ဆန်းမြို့၌ လက်ရှိဖြစ်ပွားနေသည့် စစ်ရေးတင်းမာမှု အခြေအနေများကို တွေ့ဆုံဆွေး‌နွေးခဲ့ကြသည်။

MNDAA ဘက်မှ မူဆယ်၊ ကွတ်ခိုင် တကြောရှိ SSPP တပ်စခန်းများကို ဆုတ်ခွာပေးရန် သို့မဟုတ် ပြည်ထောင်စုလမ်းမကြီးတလျှောက် SSPP မှ အခွန်ကောက်ခံခြင်း မပြုလုပ်ရန် တောင်းဆိုခဲ့ခြင်းကြောင့် ဆွေးနွေးညှိနှိုင်းမှုအတွင်း သဘောတူညီမှု တစုံတရာ မရရှိခဲ့ဘဲ အစည်းအဝေး ပြီးဆုံးခဲ့ကြောင်း စစ်ရေးသတင်းရင်းမြစ်တစ်ဦးက မေလ (၈) ရက်တွင် သျှမ်းသံတော်ဆင့်ကို ပြောဆိုထားသည်။