အာဏာသိမ်းစစ်ကောင်စီနှင့် ပူးတွဲလှုပ်ရှားနေသည့် ပအိုဝ်းပြည်သူ့စစ် (PNO/PNA)မှ ဖမ်းမိထားသည့် စစ်သုံ့ပန်း ၄ ဦးအား လက်ပြန်ကြိုးတုပ် ပစ်ခတ်ခဲ့သော သက်သေမှတ်တမ်း ရုပ်သံဖိုင်တွင် ၎င်းတို့က ပစ်သတ်ခြင်း မရှိကြောင်း ပြောသည်။

ပအိုဝ်းပြည်သူ့စစ် (PNO/PNA) မှ ဖမ်းမိထားသည့် PNLA တပ်ဖွဲ့ဝင် ၄ ဦးကို လက်ပြန်ကြိုးတုပ် ပစ်ခတ်ခဲ့သော သက်သေမှတ်တမ်း ရုပ်သံဖိုင်ကို ပအိုဝ်းအမျိုးသားလွတ်မြောက်ရေးတပ်မတော် PNLA က ယမန်နေ့ ဇွန်လ ၁ ရက်နေ့တွင် ထုတ်ပြန်ထားသည်။

အဆိုပါ ရုပ်သံဖိုင်နှင့် ပတ်သက်၍ ပအိုဝ်းပြည်သူ့စစ် (PNO/PNA)က ပစ်သတ်ခဲ့ခြင်းမဟုတ်ကြောင်း ပအိုဝ်းပြည်သူ့စစ် (PNO/PNA)မှ ဗိုလ်မှူး သန်းကြွယ်က သျှမ်းသံတော်ဆင့်ကို ပြောသည်။

“မဟုတ်ပါဘူး၊ သေချာကြည့်လိုက်ပါဦး။ အဲ့မှာ PNO ရဲ့ဘတ်တံဆိပ် ဟုတ်၊ မဟုတ် ပစ်တဲ့လူကို ကြည့်လိုက်ဦး။ ပြီးတော့ တပ်ကလည်း လျှာထုတ်ဦးထုပ်ကို ပြောင်းပြန်ဆောင်းပြီး ပစ်တာမရှိပါဘူး။ PNO ဘတ်တံဆိပ် ပါ၊ မပါ ပြောပြတာ။ အဲ့ပစ်တဲ့သူက စစ်တပ်ရဲ့ ဘတ်တံဆိပ်ကြီး၊ ကြည့်ကြည့်လေ။ တစ်ခါတစ်လေကျရင် သေချာလေး ကြည့်ပြီး ပြောစေချင်တာပေါ့ဗျာ” ဟု ဗိုလ်မှူး သန်းကြွယ်က ပြောသည်။

စစ်သုံ့ပန်းများကို ပစ်ခတ်သတ်ဖြတ်သည့် ရုပ်သံဖိုင်ကို PNLA က ဖမ်းမိသည့် စစ်ကောင်စီတပ်သား တစ်ဦးထံမှ တွေ့ရှိခဲ့ခြင်းဖြစ်ပြီး ထိုစစ်သုံ့ပန်းများကို စစ်ကောင်စီတပ်ဖွဲ့ဝင်များနှင့် PNO ပြည်သူ့စစ်များ ပစ်သတ်ခဲ့ခြင်း ဖြစ်ကြောင်းလည်း ဖမ်းမိသုံ့ပန်းက ဝန်ခံထွက်ဆိုခဲ့သည်ဟု သိရသည်။

ပစ်ခတ်ခံရသည့် စစ်သုံ့ပန်းများသည် ယခုနှစ် ဇန်နဝါရီလ ၁၃ ရက်၌ ဆီဆိုင်မြို့နယ် ထီစုံရွာအနီး ဖြစ်ပွားသည့် တိုက်ပွဲအတွင်း ဖမ်းဆီးခံရသော PNLA တပ်ဖွဲ့ဝင်များဖြစ်ပြီး စုစုပေါင်း ၅ ဦး ဖမ်းဆီးခံရသည့်အနက် တစ်ဦးအား သီးခြားနေရာ၌ သတ်ဖြတ်ခဲ့ခြင်းဖြစ်ကြောင်း ပအိုဝ်းအမျိုးသားလွတ်မြောက်ရေးတပ်မတော် PNLA မှ ပြောရေးဆိုခွင့်ရှိသူ ခွန်ရိန်းယံက ပြောသည်။

“ဗွီဒီယိုထဲမှာ အနောက်ကနေ ပစ်တဲ့သူက စစ်ကောင်စီ ဝတ်စုံကိုဝတ်ထားတဲ့လူဆိုပေမယ့် စစ်သုံ့ပန်းရဲ့ ထွက်ဆိုချက်အရ စစ်ကောင်စီနဲ့ PNO ပြည်သူ့စစ်တို့က အတူတူပစ်သတ်ခဲ့တယ်လို့ ကျနော်တို့ သတင်းအတိအကျ ရပါတယ်” ဟု ခွန်ရိန်းယံက ပြောသည်။

ပြီးခဲ့သည့် ၂၀၂၂ ခုနှစ် စက်တင်ဘာလ ၁၄ ရက်တွင်လည်း စစ်ကောင်စီလက်အောက်ခံ PNO ပြည်သူ့စစ်သည် ရွာအလည် ပြန်သည့် PNLA တပ်ဖွဲ့ဝင် ၅ ဦးကို ဖမ်းဆီးသတ်ဖြတ်ခဲ့ဖူးကြောင်း PNLA က ထုတ်ပြန်ထားသည်။

တိုက်ပွဲအတွင်း ဖမ်းမိသည့် စစ်သုံ့ပန်းများအား ပစ်သတ်မှုသည် စစ်ရာဇဝတ်မှု ကျူးလွန်ခြင်းဖြစ်ကြောင်း PNLA ပြောရေးဆိုခွင့်ရှိသူ ခွန်ရိန်းယံက ပြောသည်။

လက်ရှိ ပအိုဝ်းပြည်သူ့စစ် (PNO/PNA) တပ်ဖွဲ့ကို ခရိုနီတစ်ဦးဖြစ်သော ပတ္တမြားနဂါးကုမ္ပဏီနာယက ဒုတိယကွပ်ကဲရေးမှူး ဗိုလ်မှူးကြီးနေဝင်းထွန်းက ဦးဆောင်နေပြီး စစ်ကောင်စီနှင့် ဗိုလ်မှူးကြီးနေဝင်းထွန်း ခိုင်းသမျှ ပအိုဝ်းပြည်သူ့စစ် (PNO/PNA) တပ်ဖွဲ့က လုပ်ဆောင်နေရသည်ဟု ဆိုသည်။