သျှမ်းပြည် လားရှိုးမြို့နယ်တွင် SSPP/SSA နှင့် MNDAA တို့အကြား တစ်ရက်တည်း ထိတွေ့တိုက်ပွဲ နှစ်ကြိမ်ဖြစ်ပွားခဲ့ပြီး MNDAA တပ်သား ၈ ဦး ကျဆုံးကြောင်း SSPP ဘက်မှ ထုတ်ပြန်ခဲ့သည်။

ယမန်နေ့ (ဇွန်လ ၁ ရက်) နေ့လယ် ၂ နာရီကျော်မှ စတင်ပြီး လားရှိုးမြို့နယ် ဟန်နားကျေးရွာအုပ်စုအတွင်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ကိုးကန့်တပ်ဖွဲ့ MNDAA တို့အကြား တစ်ရက်တည်း ထိတွေ့တိုက်ပွဲနှစ်ကြိမ် ဖြစ်ပွားခဲ့ကြောင်း လားရှိုးဒေသခံများက ပြောသည်။

“နေ့လယ် ၂ နာရီလောက်မှာ တစ်ခါ၊ ညနေ ၄ နာရီခွဲလောက်မှာ နောက်တစ်ခါ ထပ်ပစ်ကြတာ။ SSPP စစ်ကြောင်းကို ကိုးကန့်ဘက်က လမ်းမကြီးအတိုင်း ပေးမသွားဘဲ တောလမ်းက သွားခိုင်းတာ၊ နောက်ပြီး စစ်ကြောင်းနောက်ကို ဆိုင်ကယ်နဲ့ လိုက်တယ်ပြောတယ်။ နားလိုင်အပေါ်ရွာနဲ့ နမ့်လုတ်ရွာ နတ်စင်မှာ ပစ်ကြတာ၊ ကိုးကန့်ဘက်က ၈ ယောက် ကျတယ်”ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လားရှိုးမြို့နယ်အတွင်း ယမန်နေ့တွင် ဖြစ်ပွားခဲ့သည့် ထိတွေ့တိုက်ပွဲနှင့် ပတ်သက်၍ SSPP/SSA စစ်ကြောင်းထွက်နေချိန် ကိုးကန့်တပ်ဖွဲ့ MNDAA တပ်မ (၆၁၁) လက်အောက်ခံ ခြုံခိုဝင်ရောက် တိုက်ခိုက်ခဲ့ခြင်းကြောင့် နှစ်ဘက်တပ်ဖွဲ့ အပြန်အလှန် တိုက်ပွဲဖြစ်ပွားခဲ့ရာ ကိုးကန့်တပ်သား (၈) ဦး ကျဆုံးပြီး ဒဏ်ရာရသူရှိကြောင်း SSPP Info မှ သတင်းထုတ်ပြန်ထားသည်။

လားရှိုးမြို့နယ် ဟန်နားကျေးရွာအုပ်စုရှိ မောက်လွမ့်ကျေးရွာမှ SSPP စစ်ကြောင်းသည် ပုန်းထွန်၊ နောင်မွန်ကျေးရွာဘက်သို့ သီပေါ-လားရှိုး ပြည်ထောင်စုလမ်းမကြီးအတိုင်း သွားရောက်ရန် MNDAA ထံ အကြောင်းကြားခဲ့သော်လည်း တောလမ်းဖြင့်သာ သွားခွင့်ပြုကြောင်း ဆိုသည်။

၎င်းနောက် ဟန်နားကျေးရွာအုပ်စုမှ တောလမ်းအတိုင်း ထွက်ခွာလာသည့် SSPP စစ်ကြောင်းကို MNDAA တပ်သားများမှ ဆိုင်ကယ်ဖြင့် နောက်ယောင်ခံ လိုက်ပါလာခြင်းကြောင့် နှစ်ဘက်တပ်ဖွဲ့ ထိတွေ့တိုက်ပွဲဖြစ်ပွားခဲ့ရကြောင်း စစ်ရေးသတင်းရင်းမြစ်ထံမှ သိရသည်။

“SSPP က ဆက်မသွားတော့ဘဲ တပ်ပြန်ဆုတ်တဲ့အချိန် ဟန်နားရွာ နတ်စင်နား စောင့်နေတဲ့ ကိုးကန့်စစ်သားနဲ့ နောက်တစ်ခါ ထပ်ပစ်ကြတာ။ လားရှိုးဘက်က ကိုးကန့်စစ်သားတွေ တစ်ညလုံး အင်အားဖြည့်လာပြီး နှစ်ဘက် တင်းမာနေတုန်းပဲ။ ဟန်နားနတ်စင်က ဖြူနီအလံတွေလည်း ဘာမှမဆိုင်ဘဲ ကိုးကန့်စစ်သားတွေ ဖြုတ်လိုက်တယ်”ဟု လားရှိုးဒေသခံ ၎င်းအမျိုးသားက ဆက်ပြောသည်။

ယမန်နေ့ ညပိုင်းတွင် တိုက်ပွဲဖြစ်ပွားသည့်နေရာမှ ကိုးကန့်တပ်ဖွဲ့ ပြန်လည်ဆုတ်ခွာခဲ့သော်လည်း လားရှိုးမြို့နယ် ဟန်နားကျေးရွာအုပ်စုတွင် SSPP/SSA နှင့် MNDAA တို့ နှစ်ဘက်စလုံး အင်အားဖြည့်တင်းမှုကြောင့် စစ်ရေးတင်းမာလျက်ရှိပြီး ကိုးကန့်တပ်ဘက်မှ ပြည်သူများကို အသွားအလာ ကန့်သတ်ပိတ်ပင်ထားကြောင်း ဒေသခံများက ပြောသည်။

လက်ရှိတွင် တိုက်ပွဲဆက်လက် ဖြစ်ပွားမည်ကို စိုးရိမ်ခြင်းကြောင့် ဟန်နားကျေးရွာအုပ်စုအတွင်းမှ နားလိုင်ကျေးရွာ၊ ဟန်နားကျေးရွာ၊ ဟိန်းလွမ့်ကျေးရွာ၊ ကောင်းကော်ကျေးရွာ စသည့် ကျေးရွာများမှ ဒေသခံများသည် ဘေးလွတ်ကင်းသည့် နေရာသို့ ထွက်ပြေးတိမ်းရှောင်နေကြောင်း သိရသည်။

ဧပြီလ ၂၈-၂၉ ရက်တွင် သီပေါမြို့နယ် နမ္မကျောက်မီးသွေးတွင်း၌ စတင်ဖြစ်ပွားခဲ့သည့် SSPP/SSA နှင့် MNDAA တို့အကြား စစ်ရေးပဋိပက္ခသည် တစ်လကျော် ကြာသည်အထိ ဆက်လက်တင်းမာနေသည်။

ပြီးခဲ့သည့် မေလ (၂၅) ရက်က စတင်ပြီး SSPP ဘက်မှ MNDAA ယခင်လကတည်းက ဝင်ရောက်နေရာယူခဲ့သည့် နေရာများသို့ စစ်အင်အား အလုံးအရင်း ပြန်လည်ဖြည့်တင်းခဲ့ပြီးနောက် ယခုကဲ့သို့ တိုက်ပွဲပြန်လည်ဖြစ်ပွားခဲ့ကြောင်း ဒေသခံများက ပြောသည်။

မေလဆန်းပိုင်းတွင် SSPP ဘက်မှ ဗဟိုနိုင်ငံရေးကော်မတီနှင့် MNDAA ဘက်မှ ဗဟိုအဆင့် တာဝန်ရှိသူများသည် ‘ဝ’တပ်ဖွဲ့ UWSA ထိန်းချုပ် ပန်ဆန်းမြို့၌ လက်ရှိဖြစ်ပွားနေသည့် စစ်ရေးတင်းမာမှု အခြေအနေများကို တွေ့ဆုံဆွေး‌နွေးခဲ့ကြသော်လည်း သဘောတူညီမှု တစုံတရာ မရရှိခဲ့ဘဲ အစည်းအဝေး ပြီးဆုံးခဲ့ကြောင်း စစ်ရေးသတင်းရင်းမြစ်ထံမှ သိရသည်။