သျှမ်းပြည် တောင်ကြီးမြို့တွင် လိုင်စင်မဲ့ယာဉ် ဖမ်းဆီးမှုကိစ္စကို ပြည်သူများ ဆန္ဒပြရန် ထီလက်မှတ်နှင့် ငွေစက္ကူပေါ်တွင် ရေးပြီး လမ်းမပေါ်တွင် ဖြန့်ကြဲထားကာ စည်းရုံးလှုံ့ဆော်မှု ပြုလုပ်နေကြောင်း သတင်းရရှိသည်။

ယနေ့ (မေလ ၃၁ ရက်) နံနက်အစောပိုင်းတွင် တောင်ကြီးမြို့ City Square Shopping Center ၊ အမှတ် ၅ စျေး နှင့် မြို့မစျေး အနီးအနားရှိ လမ်းမပေါ်တွင် စစ်ကောင်စီ လက်အောက်ခံ ရဲများ၊ ယာဉ်ထိန်းရဲများ လိုင်စင်မဲ့ ကားနှင့် ဆိုင်ကယ်များ ဖမ်းဆီးမှုပြုလုပ်နေသည့်ကိစ္စကို ပြည်သူများအနေဖြင့် ကန့်ကွက်ဆန္ဒပြရန်အတွက် နှိုးဆော်စာများကို ငွေစက္ကူပေါ်တွင် ရေးသားပြီး ဖြန့်ကြဲချထားကြောင်း အမျိုးသားတစ်ဦးက သျှမ်းသံတော်ဆင့်ကိုပြောသည်။

“ဒီလိုင်စင်မဲ့ ဖမ်းတာကြောင့်နဲ့ပဲ ဆန္ဒပြတော့မှာလား၊ သူတို့က (စစ်ကောင်စီ) ၄ နှစ်ကျော် နည်းပေါင်းစုံ တစ်မျိုးမဟုတ်တစ်မျိုး အခက်တွေ့အောင်လုပ်လာတာလေ။ လိုင်စင်မဲ့ယာဉ်တွေကို သူတို့လည်း စီးနေတာပဲ၊ သူတို့ကြတော့ စီးပြီး ပြည်သူတွေကြ မစီးရဘူး ဆိုတာ မဟုတ်သေးဘူး”ဟု ၎င်းအမျိုးသားက ပြောသည်။

ထိုငွေစက္ကူနှင့် ထီလက်မှတ်များပေါ်တွင် လာမည့် (ဇွန်လ ၁ ရက်) နံနက် ၁၀ နာရီတွင် ဟွန်တီး ဆန္ဒပြရန် ရေးသားထားသည်။

သျှမ်းပြည်အတွင်း သာမက မြန်မာပြည်တဝှမ်းတွင် လိုင်စင်မဲ့ Without ယာဉ်များကို ဒေသခံလူထုသာမက ဌာနဆိုင်ရာများ၊ စစ်ကောင်စီ ဝန်ထမ်းများ၊ ပြည်သူ့စစ်များ၊ ဘုန်းတော်ကြီးများလည်း အသုံးပြုမောင်းနှင် နေကြသည်။

လိုင်စင်မဲ့ကားနှင့် ဆိုင်ကယ်များသည် နိုင်ငံတော်၏ လုံခြုံရေးကို ခြိမ်းခြောက်နေပြီး အခွန်အခများ နစ်နာခြင်းကြောင့် ဖမ်းဆီးရန် စစ်ခေါင်းဆောင် မင်းအောင်လှိုင်က ၎င်းလက်အောက်ခံ ရဲတပ်ဖွဲ့ကို မေလ (၂၀)ရက် နေပြည်တော်တွင် ပြုလုပ်သည့် စစ်ကောင်စီအစည်းအဝေး ဒုတိယနေ့တွင် အမိန့်ပေးညွှန်ကြားခဲ့သည်။

၎င်းနောက် ပြီးခဲ့သည့် မေလ (၂၁) ရက်တွင် တောင်ကြီးမြို့ ကံသာရပ် ဓမ္မာရုံလမ်းထောင့်တွင် စစ်ကောင်စီ လက်အောက်ခံ ယာဉ်ထိန်းရဲများက လမ်းပိတ်ဆို့၍ စစ်ဆေးခဲ့ရာ လိုင်စင်မဲ့ ကားနှင့် ဆိုင်ကယ် အစီးရေ (၁၀၀)ထက်မနည်း ဖမ်းဆီးခံခဲ့ရကြောင်း သိရသည်။