သျှမ်းပြည်သိန္နီမြို့နယ် ဟိုတာရွာတွင် စစ်ကျန်လက်နက် ပေါက်ကွဲမှုကြောင့် အသက် ၆၀ နှစ်အရွယ် အမျိုးသားတစ်ဦး ဒဏ်ရာရရှိခဲ့ကြောင်း သိရသည်။
ယမန်နေ့ (မေလ ၂၉ ရက်) ညနေပိုင်း ၆ နာရီဝန်းကျင်တွင် အသက် ၆၀ နှစ်အရွယ်ရှိ ဦးထွန်းအောင်သည် သိန္နီမြို့နယ် ဟိုတာရွာတွင်ရှိသော ၎င်း၏နေစရာတဲထဲတွင် သန့်ရှင်းရေးလုပ်ဆောင်နစဉ် မတော်တဆ စစ်ကျန်လက်နက်နှင့် ခိုက်မိပြီး ပေါက်ကွဲသွားခဲ့ကြောင်း ဟိုတာရွာဒေသခံတစ်ဦးက သျှမ်းသံတော်ဆင့်ကို ပြောသည်။
“အဲ့ဟာကို မတွေ့ဘူးလို့ ပြောတယ်။ ကုတင်အောက်က သစ်သားကို သွားဆွဲရင်းနဲ့ ဘယ်လိုခိုင်းမိလဲတော့ မသိဘူး ပေါက်ကွဲသွားတာ။ ထောင်မိုင်းတော့မဟုတ်ဘူး၊ ငှက်ပျောဖူး (RPG) မှာတပ်တဲ့ လက်နက်ကျည်မျိုးပါ။ လူကတော့ ထိခိုက်ဒဏ်ရာ ကြီးကြီးမားမားတော့ မရှိဘူး။ ဒူးခေါင်းအောက် ကျည်စနည်းနည်း ထိသွားတယ်” ဟု ၎င်းကပြောသည်။
ဦးထွန်းအောင်နှင့် သူ့ဇနီးသည် ပြီးခဲ့သော “၁၀၂၇ စစ်ဆင်ရေး” တိုက်ပွဲကြောင့် ထိုင်းနိုင်ငံသို့ ထွက်ပြေးတိမ်း ရှောင်သွားပြီးနောက် ယခုရက်ပိုင်းအတွင်းမှ နေရပ်သို့ ပြန်လာနိုင်ခဲ့ခြင်း ဖြစ်ကြောင်း သိရသည်။
တိုက်ပွဲကြောင့် နေအိမ်များလည်း မီးလောင်ပြာကျသွားပြီဖြစ်၍ ဦးထွန်းအောင်နှင့် သူ့ဇနီးသည် ၎င်းတို့တဲထဲတွင် နေထိုင်ရန်အတွက် သန့်ရှင်းရေးလုပ်ဆောင်နေစဉ် ယခုကဲ့သို့ စစ်ကျန်လက်နက်ပေါက်ကွဲမှုနှင့် ကြုံရခြင်း ဖြစ်ကြောင်း ဟိုတာရွာဒေသခံတစ်ဦးက ပြောပြသည်။
“ရွာမှာတော့ စစ်ကျန်လက်နက်တွေ၊ မိုင်းတွေ လာရှင်းပေးတာတော့မရှိဘူး။ မနေ့ကပေါက်ကွဲမှု ဖြစ်ပြီးနောက်တော့ အထပ်ကလူတွေကို အကြောင်းကြားလိုက်တယ်။ ဒီနေ့မနက်ပိုင်း လာကြည့်ပြီး စစ်ဆေးမှုတွေ လုပ်ပေးတယ်” ဟု ဟိုတာရွာဒေသခံတစ်ဦးက ပြောသည်။
“၁၀၂၇ စစ်ဆင်ရေး” တိုက်ပွဲဖြစ်ပွားပြီးနောက်ပိုင်း သိန္နီမြို့နယ် ဟိုတာရွာတွင် မြေမြုပ်မိုင်းနှင့် စစ်လက်နက် အကြွင်းအကျန်ပစ္စည်းများကြောင့် ထိခိုက်သေဆုံးရသူ ၁၀ ဦးထက်မနည်းရှိကြောင်း ဒေသခံများက ပြောသည်။
ထိခိုက်သေဆုံးရသူ အများစုမှာ ဒေသခံများဖြစ်ကြပြီး ၎င်းတို့သည် နေရပ်ပြန်လာပြီး ထူထောင်ရေးလုပ် ဆောင်နေစဉ် အတောအတွင်းမှာ ထိခိုက်သေဆုံးခဲ့ရခြင်း ဖြစ်ကြောင်း သိရသည်။
အဆိုပါမြေမြုပ်မိုင်းနှင့် စစ်လက်နက် အကြွင်းအကျန်ပစ္စည်းများနှင့် ပတ်သက်၍ သက်ဆိုင်ရာ အာဏာပိုင်အဖွဲ့အစည်းကို အကြောင်းကြားပြီး နယ်မြေရှင်းလင်းရေး လုပ်ဆောင်ပေးရန် တောင်းဆိုခဲ့သော်လည်း လုပ်ဆောင်ပေးခြင်းမရှိကြောင်း ဒေသခံများက ပြောသည်။
ပြီးခဲ့သည့် ဧပြီလ ၈ ရက်တွင်လည်း သိန္နီမြို့နယ် ပန်စုံကျေးရွာနေ အမျိုးသားတစ်ဦးသည် အိမ်ခြံဝန်းအတွင်း သန့်ရှင်းရေးလုပ်ရာမှ မြေမြုပ်မိုင်းနင်းမိ၍ ခြေထောက်နှစ်ဖက်စလုံး ဆုံးရှုံးခဲ့ရသည်။
Leave a Comments