သျှမ်းပြည်တောင်ပိုင်း ဆီဆိုင်မြို့နယ်တွင် စစ်ကောင်စီတပ်၊ PNOပြည်သူ့စစ်နှင့် တော်လှန်ရေးအင်အားစုတို့ တိုက်ပွဲဖြစ်ပွားပြီးနောက် ယခုရက်ပိုင်းအတွင်း စစ်ကောင်စီဘက်မှ အင်အားဖြည့်တင်းမှုများ လုပ်ဆောင်နေကြောင်း သိရသည်။

စစ်ကောင်စီတပ်မှ ဆီဆိုင်မြို့နယ်ရှိ နောင်ထော်ကျေးရွာဘက်နှင့် ကရင်နီ နယ်စပ်ဘက်တွင် စစ်ကားများ၊ ပြည်သူများထံမှ ချောဆွဲထားသည့် ကားများဖြင့် အဆိုပါ ဒေသဘက်သို့ နေ့စဉ်ပို့ဆောင်မှုများ လုပ်ဆောင်နေသည်ဟု ဆီဆိုင်မြို့ခံများက ပြောသည်။

“နေ့တိုင်းလိုလို စစ်ကားတွေနဲ့ နောင်ထောဝ်ဘက်ကို သွားတာတွေ့ရတယ်။ သူတို့ ရိက္ခာကားတွေရော တွေ့တယ်။ တစ်ခါသွားရင် ကား ၅ စီးလောက် သွားတယ်။ ဒီလိုမျိုး စစ်အင်အားတွေ ထပ်ဖြည့်တာ တွေ့ရတော့ စိုးရိမ်မိတယ်။ နောက်တစ်ခေါက် တိုက်ပွဲဖြစ်မလား ဆိုပြီး ကြောက်နေရတယ်။ ကားတွေလည်း ပြည်သူတွေဆီက ချောဆွဲတဲ့ ကားနဲ့ပဲ သွားပို့တာ” ဟု ဆီဆိုင်မြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် PNO ပြည်သူ့စစ်များလည်း မကြာခဏ အင်အားဖြည့်တင်းကာ ကရင်နီနယ်စပ်ဘက်သို့ သွားရောက်နေကြောင်း၊ ညစဉ်နီးပါး လေယာဉ်သံ ကြားနေရသည်ဟု ၎င်းက ထပ်လောင်း ပြောသည်။

ဆက်လက်ပြီး ဆီဆိုင်မြို့ပေါ်တွင် စစ်ကောင်စီတပ်မှ စစ်သားစုဆောင်းမည် ဆိုပါက PNO ထံတွင်သာ ဝင်ရောက်စစ်မှုထမ်းရန်‌ ရွေးချယ်ကြမည်ဟု ဆီဆိုင်ဒေသခံ အမျိုးသမီးတစ်ဦးက ပြောသည်။

“ဆီဆိုင်မြို့ပေါ်ကိုတော့ စစ်ကောင်စီနဲ့ ဆိုင်တာ။ စစ်သားစုဆောင်းတာတွေတော့ စစ်ကောင်စီ လုပ်တယ်။ စစ်ကောင်စီထဲ စစ်မှုထမ်းရင် သွားခဲ့တာပဲ ရှိတာ၊ ပြန်လာတယ်ဆိုတာ မရှိဘူး။ ပြန်လာခဲ့ရင်တောင် ရှင်လျက်မဟုတ်ဘူး၊ ရွေးချယ်ရမယ်ဆိုရင် PNO ထဲပဲ ဝင်ခိုင်းမယ်” ဟု အဆိုပါ အမျိုးသမီးတစ်ဦးက ပြောသည်။

ပြီးခဲ့သည့် မေလ (၁၉)ရက်နေ့တွင် ဆီဆိုင်မြို့နယ် တောင်ရှေ့အုပ်စု နောင်ထောဝ်ကျေးရွာ ဘက်တွင် စစ်ကောင်စီ၊ PNO နှင့် PNLA တို့ တိုက်ပွဲ ပြန်လည်ဖြစ်ပွားခဲ့သည်။

အလားတူ ယခုလက်ရှိ ပင်လောင်းမြို့နယ် ဆောင်းပြောင်းကျေးရွာဘက်တွင် စစ်ကောင်စီ၊ PNO ပူးပေါင်းတပ်နှင့် ကရင်နီတော်လှန်ရေး တပ်ပေါင်းစုတို့ တိုက်ပွဲပြင်းထန်စွာ ဖြစ်ပွားနေပြီး ဒေသခံ နေအိမ်အများအပြား မီးလောင်ပျက်စီးနေသည်ဟု သိရသည်။

ပြီးခဲ့သည့် ၂၀၂၄ ခုနှစ် ဇန်နဝါရီလတွင်လည်း ဆီဆိုင်မြို့တွင် စစ်ကောင်စီ၊ PNOနှင့်PNLA တော်လှန်ရေး အင်အားစုတပ်တို့ တိုက်ပွဲပြင်းထန်စွာ ဖြစ်ပွားခဲ့သောကြောင့် ဒေသခံနေအိမ်နှင့် ဆီဆိုင်မြို့မဈေး မီးလောင်ပျက်စီး ဆုံးရှုံးခဲ့ရပြီး ဒေသခံ အများအပြား
စစ်ဘေးတိမ်းရှောင်ခဲ့ရသည်။