သျှမ်းပြည်တွင် အခြေစိုက်ပြီး ထိုင်းနိုင်ငံသို့ နယ်စပ်ဖြတ်ကျော် ဝင်ရောက်နေသည့် ‘ဝ’တပ်ဖွဲ့ UWSA နှင့် ဆက်နွှယ်နေသော မူးယစ်ဂိုဏ်းများကို နှိမ်နှင်းရန် ထိုင်းဝန်ကြီးချုပ်ဟောင်း သက်ဆင် ရှင်နာဝပ်မှ တိုက်တွန်းတောင်းဆိုလိုက်သည်။

ယနေ့ (မေလ ၂၇ ရက်) တွင် ထိုင်းနိုင်ငံ မူးယစ်ဆေးဝါးထိန်းချုပ်ရေးအဖွဲ့ချုပ် (ONCB) တွင် ပြုလုပ်သည့် မူးယစ်ဆေးဝါး တားဆီးနှိမ်နင်းရေး အစီအမံများနှင့် ပတ်သက်၍ ဆွေးနွေးစဉ် ထိုင်းဝန်ကြီးချုပ်ဟောင်း သက်ဆင် မှ လက်ရှိ မူးယစ်ဆေးဝါး ထုတ်လုပ်သူ အများစုသည် ‘ဝ’တပ်ဖွဲ့ UWSA လက်အောက်တွင် လုပ်ငန်းလည်ပတ်နေကြောင်း ပြောကြားခဲ့သည်။

“မူးယစ်ဆေးဝါး ထုတ်လုပ်တဲ့ အရင်းအမြစ်တွေကို အရေးတကြီး ဖြေရှင်းဖို့လိုတယ်။ ‘ဝ’တပ်ဖွဲ့အရေးကို ကိုင်တွယ်ဖြေရှင်းဖို့ မကြာမီ အချိန်အတွင်းမှာ ထိုင်းနိုင်ငံခြားရေးဝန်ကြီးက အိမ်နီးချင်းနိုင်ငံတွေနဲ့ ထိတွေ့ဆက်ဆံရဦးမယ်။ ကျနော်တို့ရဲ့ ရန်သူကို သနားညှာတာခြင်း မလုပ်သင့်ဘူး”ဟု ထိုင်းဝန်ကြီးချုပ်ဟောင်း သက်ဆင်က ထိုင်းမီဒီယာသို့ ပြောဆိုသည်။

ယခင်က ထိုင်းနိုင်ငံတွင် အခြေစိုက်ခဲ့သော မူးယစ်ဂိုဏ်းများမှ အဓိက အရောင်းကိုယ်စားလှယ် အများအပြားသည် ‘ဝ’တပ်ဖွဲ့အောက်သို့ ခိုလှုံရောက်ရှိသွားပြီး လုပ်ငန်းဆက်လက် လည်ပတ်လျက်ရှိကာ အနည်းငယ်မျှသာ ထိုင်းနိုင်ငံအတွင်း ကျန်ရှိတော့ကြောင်း သက်ဆင်က ဆက်ပြောသည်။

လက်ရှိ ၂၀၂၅ အာဆီယံအလှည့်ကျဥက္ကဋ္ဌ၏ အထူးအကြံပေးပုဂ္ဂိုလ် အဖြစ် တာဝန်ယူထားသည့် သက်ဆင်သည် မူးယစ်ဆေးဝါး အကြပ်အတည်းကို ကိုင်တွယ်ဖြေရှင်းရန် မြန်မာနှင့် လာအိုနိုင်ငံကဲ့သို့ အိမ်နီးချင်းနိုင်ငံ ခေါင်းဆောင်များနှင့် ရင်းနှီးသည့် ဆက်ဆံရေးက တွန်းအား တစုံတရာအဖြစ် ကူညီနိုင်လိမ့်မည်ဟု ဆိုသည်။

မူးယစ်ဆေးဝါး ရောင်းဝယ်ဖောက်ကားနေသည့် လမ်းကြောင်းများမှာ မဲခေါင်မြစ်ကြောင်း တလျှောက်အပြင် အခြားသော နည်းလမ်းအမျိုးမျိုးဖြင့် သွယ်ဝှိုက်၍ သယ်ဆောင်နေခြင်းကြောင့် သက်ဆိုင်ရာ အာဏာပိုင်များမှ စစ်ဆေးရေးကို အရှိန်အဟုန်မြှင့် လုပ်ဆောင်ရန် သက်ဆင်က တိုက်တွန်းသည်။

၂၀၂၅ နှစ်ဆန်းပိုင်းမှ စတင်ပြီး မြန်မာ-ထိုင်း နယ်စပ်တလျှောက်တွင် ထိုင်းအာဏာပိုင်များမှ မူးယစ်ဆေးဝါး ဖမ်းဆီးရမိခြင်း ပိုမိုများပြားလာခဲ့သည့်အပြင် မူးယစ်ဂိုဏ်းများနှင့် မကြာခဏ ထိတွေ့ပစ်ခတ်မှုများ ဖြစ်ပွားခဲ့ကြောင်း ထိုင်းမီဒီယာများတွင် ဖော်ပြသည်။

ယမန်နှစ် ၂၀၂၄ နိုဝင်ဘာလအတွင်း ထိုင်းနိုင်ငံ ချင်းမိုင်မြို့၌ ထိုင်းစစ်တပ်နှင့် ‘ဝ’တပ်ဖွဲ့ UWSA တောင်ပိုင်း (၁၇၁) စစ်ဒေသမှ (၆) ဦးပါဝင်သည့် ကိုယ်စားလှယ်အဖွဲ့ တွေ့ဆုံခဲ့စဉ် နယ်စပ်ဒေသ မူးယစ်ဆေးဝါး တိုက်ဖျက်ရေးနှင့် ထိုင်းနိုင်ငံ မယ်ဟောင်ဆောင်ခရိုင်ဘက် ထိစပ်နေသည့် နယ်နိမိတ်မျဉ်းပေါ်ရှိ UWSA တပ်စခန်း (၉) နေရာကို တပ်ဆုတ်ခွာပေးရန် ထိုင်းစစ်တပ်မှ ပြောဆိုခဲ့ပြီး နှစ်ဘက်စစ်ရေးတင်းမာခဲ့သည်။