ထိုင်း-မြန်မာနယ်စပ် တာချီလိတ်မြို့တွင် မယ်ဆိုင်ချောင်းရေ မြင့်တက်နေစဉ် ချောင်းထဲတွင် အမျိုးသားတစ်ဦး၏ သေဆုံးနေလျက် အလောင်းမျောပါလာခဲ့ကြောင်း ဒေသအတွင်း လူမှုကူညီရေးအသင်းထံမှ သိရသည်။

ယမန်နေ့ မေလ ၂၅ ရက် နံနက်ပိုင်းတွင် မယ်ဆိုင်ချောင်းထဲတွင် အမျိုးသားတစ်ဦး သေဆုံးနေလျက် အလောင်းမျောပါလာခဲ့သဖြင့် ဒေသအတွင်း လူမှုကူညီရေးအသင်းမှ ဆယ်ယူခဲပြီး ထိုအလောင်းကို ပြည်သူ့ဆေးရုံကြီးသို့ ပို့ဆောင်ခဲ့ကြောင်း သိရသည်။

ယနေ့ မယ်ဆိုင်ချောင်းရေသည် သျှမ်းပြည်အရှေ့ပိုင်း တာချီလိတ်မြို့၏ စိုးရိမ်ရေအမှတ်ကို နောက် ၁၂ နာရီအတွင်း ရောက်ရှိနိုသည်ဟု မိုးလေဝသနှင့် ဇလဗေဒညွှန်ကြားမှုဦးစီးဌာနက ယနေ့ နေ့လယ် ၁ နာရီတွင် ထုတ်ပြန်ထားသည်။

“အခုရေတွေပြန်တက်လာနေပြီ၊ ဒီညနေအထိတော့ စောင့်ကြည့်ရမယ်” ဟု တာချီလိတ်မြို့ဒေသခံ တစ်ဦးကလည်း သျှမ်းသံတော်ဆင့်ကို ပြောသည်။

ပြီးခဲ့သည့် မေလ ၂၃ ရက်နေ့ ညပိုင်းတွင် မိုးသည်းထန်စွာရွာသွန်းမှုကြောင့် မယ်ဆိုင်ချောင်းရေလျှံကာ တာချီလိတ်မြို့ပေါ် ရပ်ကွက်နှင့် လမ်းများပေါ်သို့ ရေများတက်ရောက်ခဲ့သည်။

မိုးဇလ၏ ခန့်မှန်းချက်အရ မေလ ၂၅ ရက်နေ့မှ ဇွန်လ ၂ ရက်နေ့အထိ တနိုင်လုံးအတိုင်းအတာနှင့် မိုးထစ်ချုန်း ရွာနိုင်ပြီး တချို့ဒေသမှာ နေရာကွက်ပြီး မိုးကြီးနိုင်ကြောင်း သိရသည်။

မိုးသည်းထွန်ရွာခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းရွာခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်း စသည့် သဘာဝဘေးအန္တရာယ်များ ဖြစ်ပေါ်လာနိုင်ကြောင်း သိရသည်။