သျှမ်းပြည်မြောက်ပိုင်း၊ နောင်ချိုမြို့နယ် သရက်ချိုကျေးရွာတွင် စစ်ကောင်စီတပ်နှင့် TNLA ပူးပေါင်းတပ်တို့ အပြင်းအထန် တိုက်ပွဲဖြစ်ပွားလျက်ပြီး စစ်ကောင်စီတပ်မှ လေကြောင်းဖြင့် ဖိအားပေး ဗုံးကြဲတိုက်ခိုက်နေသောကြောင့် TNLA ဘက်မှ တပ်စခန်းတချို့ လက်လွှတ်ခဲ့ရသည်ဟု စုံစမ်းသိရသည်။

ယနေ့ (မေလ ၂၃ ရက်) အထိ နောင်ချိုမြို့နယ် နောင်တောကျေးရွာအုပ်စုတွင် စစ်ကောင်စီတပ်နှင့် TNLA ပူးပေါင်းတပ်တို့ တိုက်ပွဲပြင်းထန်နေပြီး စစ်ကောင်စီတပ်သည် တောင်းခမ်းဘက်မှ နေ၍ သရက်ချိုဘက်ကို အင်အားအလုံးအရင်းဖြင့် ထိုးစစ်ဆင် တိုက်ခိုက်နေသည်ဟု ရှေ့တန်းရောက် စစ်ရေးသတင်းရင်းမြစ်တစ်ဦးက ပြောသည်။

“တောင်းခမ်းဘက်ကနေ သရက်ချိုဘက်ကို စစ်ကောင်စီက အင်အားအလုံးအရင်းနဲ့ စစ်ကြောင်းထိုးလာတယ်။ သူတို့လည်း အလုံးအရင်းနဲ့ သေတာ။ သူတို့က ဒရုန်းရော လက်နက်ကြီးရော မြေပြင်ရော သုံးတော့ ကျနော်တို့ နေရာတချို့ လက်လွှတ်ထားခဲ့ရတယ်။ မြေပြင်ချင်း ယှဉ်ရင်တော့ ကျနော်တို့ သာတာပေါ့”ဟု ရှေ့တန်းရောက် စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

ထိုသို့ စစ်ကောင်စီတပ်မှ စစ်ကြောင်းထိုး တိုက်ခိုက်လာသောကြောင့် သရက်ချို၊ ယာပြင်၊ ရွှေမုဌောနှင့် မက်မန်းတော စသည့် ကျေးရွာများမှ ပြည်သူများသည် ကျောက်မဲမြို့နယ်ဘက်သို့ စစ်ဘေးတိမ်းရှောင် ထွက်ပြေးနေကြရသည်ဟု ၎င်းသတင်းရင်းမြစ်က ဆက်ပြောသည်။

ယမန်နေ့ (မေလ ၂၂ ရက်) နေ့လည် ၁၂ နာရီဝန်းကျင်တွင် နောင်ချိုမြို့နယ် အုမ္မသီးကျေးရွာသို့ စစ်ကောင်စီတပ်မှ ဂျက်ဖိုက်တာဖြင့် ပေါင် (၂၅၀)ဗုံး (၄)လုံး လာရောက်ကြဲချ တိုက်ခိုက်ခဲ့သည့်အပြင် မေလ (၂၁)ရက်တွင်လည်း အုမ္မသီးကျေးရွာ၌ လက်နက်ကြီး (၁၅)လုံး၊ အဆိပ်ငွေ့ဗုံး (၁)လုံးနှင့် လာရောက်တိုက်ခိုက်ခဲ့သောကြောင့် ဒေသခံတစ်ဦး ထိခိုက်ဒဏ်ရာ ရရှိခဲ့သည်ဟု ထုတ်ပြန်ထားသည်။

“လက်နက်ကြီးတို့၊ လေယာဉ်တို့၊ ဒရုန်းတို့နဲ့ လာလာပစ်နေတာ နေ့တိုင်းလိုလိုပါပဲ။ သူတို့က အပစ်ရပ်တယ်သာပြောတာ အပြောပဲရှိတာ၊ အဆိပ်ငွေ့ဗုံးတွေနဲ့ လာကြဲလိုက် လက်နက်ကြီးနဲ့ ထုလိုက် လုပ်နေတာ။ အုမ္မသီးဘက်က ဒေသခံ တစ်ဦး ဒဏ်ရာ ရတယ်လို့ သိရတယ်”ဟု စစ်ရေးသတင်းရင်းမြစ်တစ်ဦး သျှမ်းသံတော်ဆင့်ကို ပြောသည်။

ပြီးခဲ့သည့်‌ မေလ (၂၀)ရက်တွင်လည်း စစ်ကောင်စီမှ နောင်ချိုမြို့နယ်၊ ဟိုခိုကျေးရွာကို ဂျက်ဖိုက်တာဖြင့် ပေါင်(၂၅၀)ဗုံးတစ်လုံး လာရောက်ကြဲချခဲ့သောကြောင့် ပြည်သူနေအိမ် တစ်လုံး ထိမှန်ပျက်စီး ဆုံးရှုံးခဲ့ရသည်ဟု သိရသည်။

စစ်ကောင်စီတပ်သည် ပြည်သူများကို ပစ်မှတ်ထား၍ လေကြောင်း၊ လက်နက်ကြီး စသည်တို့ဖြင့် နေ့စဉ်ပစ်ခတ်နေသောကြောင့် ပြည်သူများအနေဖြင့် စစ်ရေးအရ သတိရှိရန် လိုအပ်ကြောင်း TNLA ဘက်က အသိပေးထုတ်ပြန်ထားသည်။