သျှမ်းပြည် လွိုင်လင်-တောင်ကြီးသွားကားလမ်းတွင် တောင်ကြီးမြို့သို့ တင်ပို့မည့် ငွေကျပ် (၁၂၀၀) သိန်းကျော်တန်းဖိုးရှိ မူးယစ်ဆေး သယ်ဆောင်လာသည့် ယာဉ်များအားဖမ်းဆီးရမိကြောင်း သိရသည်။

ပြီးခဲ့သည့် မေလ ၂၀ ရက်တွင် မူးယစ်ဆေးဝါးတားဆီး နှိမ်နင်းရေးရဲတပ်ဖွဲ့မှ လွိုင်လင်-တောင်ကြီးသွားကားလမ်းတွင် မော်တော်ယာဉ်များအား စစ်ဆေးရှာဖွေစဉ် ဦးကျော်လွန်ဦး မောင်းနှင်ပြီး မနန်းယုမ့်ခမ်း လိုက်ပါလာသည့် TOYOTA CROWN အမျိုးအစားမော်တော်ယာဉ်အား ရပ်တန့်စစ်ဆေးရှာဖွေရာမှ ဖမ်းဆီးရမိကြောင်း CCDAC Myanmar က မေလ ၂၂ ရက်နေ့တွင် ထုတ်ပြန်သည်။

အဆိုပါကားထဲတွင် Happy Water မူးယစ်ဆေး အလေးချိန် ၁.၁ ကီလို (ဒေသကာလပေါက်ဈေး တန်ဖိုးငွေကျပ်သိန်း ၁၂၁၀)၊ ကက်တမင်း အလေးချိန် ၁၀ ရမ် (ဒေသကာလပေါက်ဈေး တန်ဖိုးငွေကျပ် ၁၀၀,၀၀၀)နှင့် လက်ကိုင်ဖုန်း ၂ တို့အား တွေ့ရှိသိမ်းဆည်းရမိကြောင်း သိရသည်။

စစ်ဆေးဖော်ထုတ်ချက်အရ မူးယစ်ဆေးကို လက်ခံရမည့် စွမ်းထက်ကို တောင်ကြီးမြို့ အရှေ့မြို့ပတ်လမ်း၌ လက်ကိုင်ဖုန်း ၁ လုံးနှင့် ဆက်လက်ဖမ်းဆီးရမိခဲ့ကြောင်း CCDAC Myanmar က ဖော်ပြထားသည်။

လက်ရှိတွင် အသက် (၂၇) နှစ် စိုင်းကျော်လွင်၊ အသက် (၁၉) နှစ် မနန်းယုမ့်ခမ်း နှင့် အသက် (၂၆) နှစ် စွမ်းထက်တို့အား လွိုင်လင်မြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အမူဖွင့်အရေးယူထားကြောင်း CCDAC Myanmar ကဖော်ပြထားသည်။