သျှမ်းပြည် နမ့်ခမ်းမြို့နှင့် နမ့်ဆန်မြို့တို့တွင် တအာင်း(ပလောင်) အမျိုးသာလွတ်မြောက်ရေး တပ်မတော် TNLA မှ ပြုလုပ်ပေးမည့် မော်တော်ယာဉ်လိုင်စင်အတွက် ကားအမျိုးအစားအလိုက် အခွန် ၂ သိန်းကျပ်မှ ၅ သိန်းကျပ်အထိ ပေးဆောင်ရမည်ဖြစ်ကြောင်း စုံစမ်းသိရသည်။

မေလ ၂၅ ရက်မှ စတင်၍ TNLA ထိန်းချုပ်ထားသည့် နမ့်ခမ်းမြို့နှင့် နမ့်ဆန်မြို့တို့တွင် TNLA ၏ မော်တော်ယာဉ် မှတ်ပုံတင်ကြီးကြပ်ရေးဌာနမှ အိမ်စီးကား၊ လုပ်ငန်းသုံးကား၊ ခရီးသည်တင်ကားနှင့် ကုန်တင်ကားများကို ယာဉ်လိုင်စင် ပြုလုပ်ပေးသွားမည်ဖြစ်ပြီး ကားအမျိုးအစားအလိုက် အခွန်နှင့်ဝန်ဆောင်ခ ၂ သိန်းကျပ်မှ ၅ သိန်းကျပ်အထိ ပေးဆောင်ရမည်ဟု ယမန်နေ့ (မေလ ၂၂ ရက်) တွင် TNLA မှ ထုတ်ပြန်ခဲ့သည်။

TNLA ထံ မှတ်ပုံတင်ထားသည့် ကားလိုင်စင်များသည် ၂ နှစ် သက်တမ်းရှိမည်ဖြစ်ပြီး TNLA ထိန်းချုပ်ဒေသအတွင်း အသုံးပြုနိုင်ကြောင်း TNLA ပြောရေးဆိုခွင့်ရှိသူ လွေးယေဦးက ပြောဆိုသည်။

“မော်တော်ကား ယာဉ်အမျိုးအစား အလိုက် ၂သိန်းမှ ၅သိန်းကျပါ့မယ်။ လိုင်စင်သက်တမ်း ၂နှစ်၊ တအာင်းဒေသမှာ အသုံးပြုလို့ရပါတယ်”ဟု TNLA ပြောရေးဆိုခွင့်ရှိသူ လွေးယေဦးက သျှမ်းသံတော်ဆင့်ကို ဖြေကြားသည်။

နမ့်ခမ်းမြို့ပေါ်ရှိ မော်တော်ယာဉ်များ မှတ်ပုံတင်ရန် ပိုစတာနှင့် လက်ကမ်းစာစောင်များကို ရပ်ကွက်တိုင်းတွင် ဖြန့်ဝေထားပြီး ကားသေးကို မော်ဒယ်လ်အလိုက် ၂ သိန်းမှ ၃ သိန်းကျပ်အထိ၊ ကားအလတ် ၃ သိန်းမှ ၄ သိန်းကျပ်အထိ၊ ကားကြီးများကို ၄ သိန်းမှ ၅ သိန်းကျပ်အထိ သတ်မှတ်ထားပြီး လာမည့် မေလ(၂၅) ရက်တွင် ကားလိုင်စင် စတင်လုပ်ဆောင်မည်ဖြစ်ကြောင်း ပိုစတာတွင် ပါရှိသည်။

“ပလောင်ရဲ့ဟာ၊ ကိုးကန့်ရဲ့ဟာ၊ စစ်တပ်ရဲ့ဟာ နံပါတ်ပြားက ၅ ခုလောက် ပါရမှာထင်တယ်။ ဒီပုံစံနဲ့ဆို နံပါတ်ပြားက ဖြုတ်တပ်လုပ်နေရမှာပေါ့။ တော်တော်တိုးတက်လာတယ်၊ တိုးလာတာက ဂိတ်တွေနဲ့ တက်လာတာက အခွန်တွေ။ လိုင်စင်လုပ်ခိုင်းရင် ကားသမားတင် မဟုတ်ဘူး၊ တစ်မြို့လုံး ငြီးကြမှာ”ဟု နမ့်ခမ်း-မန္တလေး ပြေးဆွဲနေသည့် ကားသမားတစ်ဦးက သျှမ်းသံတော်ဆင့်ကို ပြောသည်။

ထို့အပြင် ၂၀၂၅ နှစ်ကုန် ဒီဇင်ဘာလအထိ စီမံချက်ကာလ (၆) လ ပြုလုပ်မည်ဖြစ်ပြီး TNLA ထိန်းချုပ်သော နမ့်ခမ်းနှင့် နမ့်ဆန်မြို့နယ်အပြင် အခြားမြို့နယ်များကို ဆက်လက်လုပ်ဆောင်ပေးသွားမည်ဟု ဆိုသည်။

ယခုကဲ့သို့ လိုင်စင်ပြုလုပ်ရခြင်းသည် မော်တော်ယာဉ်များနှင့် စပ်လျဉ်းသည့် ပိုင်ဆိုင်မှု၊ ရောင်းဝယ်မှု၊ ယာဉ်တိုက်မှု၊ ယာဉ်ပျောက်ဆုံးမှု အစရှိသည့် ပြဿနာများ လျော့ကျရန်ဖြစ်ကြောင်း TNLA ထုတ်ပြန်ချက်တွင် ရေးသားထားသည်။

ပြီးခဲ့သည့် ဇန်နဝါရီလအတွင်း လားရှိုးမြို့ကို ကိုးကန့်တပ်ဖွဲ့ MNDAA ထိန်းချုပ်ထားစဉ် လိုင်စင်ရှိ၊ လိုင်စင်မဲ့ ကားနှင့် ဆိုင်ကယ်အားလုံးကို တစ်စီးလျှင် ကျပ်ငွေ (၁၅၀၀၀) ကောက်ခံကာ ယာဉ်မောင်းနှင်ခွင့် ယာယီကတ်ပြားများ ပြုလုပ်ပေးခဲ့သည်။

သို့သော် ၎င်းကတ်ပြားများကို အသုံးပြု၍ ကိုးကန့်တပ် ထိန်းချုပ်ဒေသတွင် သွားလာနိုင်သော်လည်း စစ်ကောင်စီထိန်းချုပ် ဒေသများသို့ အဆိုပါကတ်ပြားများကို ယူဆောင်သွားပါက လုံခြုံရေးစိုးရိမ်ရကြောင်း ကားသမားများက ပြောသည်။