လိုင်စင်မဲ့ကားနှင့် ဆိုင်ကယ်များကြောင့် နိုင်ငံတော်၏ လုံခြုံရေးကို ခြိမ်းခြောက်နေပြီး အခွန်အခများ နစ်နာခြင်းကြောင့် ဖမ်းဆီးရန် စစ်ခေါင်းဆောင် မင်းအောင်လှိုင်က ၎င်းလက်အောက်ခံ ရဲတပ်ဖွဲ့ကို အမိန့်ပေးညွှန်ကြားလိုက်သည်။

မေလ (၂၀)ရက် နေပြည်တော်တွင် ပြုလုပ်သည့် စစ်ကောင်စီအစည်းအဝေး ဒုတိယနေ့တွင် ထိုသို့ ဖမ်းဆီးရန် စစ်ခေါင်းဆောင်က ပြောကြားခဲ့ပြီးနောက် မေလ (၂၁) ရက်တွင် တောင်ကြီးမြို့ ကံသာရပ် ဓမ္မာရုံလမ်းထောင့်တွင် စစ်ကောင်စီလက်အောက်ခံ ယာဉ်ထိန်းရဲများက လမ်းပိတ်၍ စစ်ဆေးလျက်ရှိရာ လိုင်စင်မဲ့ ကားနှင့် ဆိုင်ကယ် အစီးရေ (၅၀)ကျော်ကို ဖမ်းဆီးထားသည်ဟု လမ်းသွားလမ်းလာ အမျိုးသားတစ်ဦးက ပြောသည်။

“အဲ့လမ်းဘက်မှာ အများစု ဖမ်းမိတာက မြို့မဘက်ကနဲ့ ကံသာဘက်က လူတွေရဲ့ ဆိုင်ကယ်နဲ့ ကားတွေပဲ၊ ၅၀ ကျော်မယ် ထင်တယ်။ ဆိုင်ကယ် ဖမ်းပြီးပြီးချင်း တစ်ခါတည်းရွေးရင် ၈ သောင်း၊ တရားရုံးမှာ လက်မှတ်ထိုးပြီး ရွေးရင် တစ်သောင်းခွဲ ပေးရတယ်။ ကားတွေကိုတော့ ဘယ်လို လုပ်လဲတော့ မသိဘူး”ဟု အဆိုပါ အမျိုးသားက ပြောသည်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် လိုင်စင်မဲ့ ကားနှင့် ဆိုင်ကယ်များ၊ လိုင်စင်နံပါတ် အတုနှင့် လိုင်စင်အတု ပြုလုပ်ပေးသူများကိုလည်း အရေးယူမည်ဟု အဆိုပါ အစည်းအဝေးတွင် ပြောဆိုခဲ့သည်။

အလားတူ တောင်ကြီး အရှေ့မြို့ပတ်လမ်းတွင်လည်း ယာဉ်ထိန်းရဲများမှ ယာဉ်မောင်းလိုင်စင်များ စစ်ဆေးနေပြီး အမျိုးသားများကို ပစ်မှတ်ထား ဖမ်းဆီးနေသည်ဟု တောင်ကြီးဒေသခံ လူငယ်တစ်ဦးက သျှမ်းသံတော်ဆင့်ကို ပြောသည်။

“အရှေ့မြို့ပတ်လမ်းမှာ မော်တော်ပီကယ် ဖမ်းနေတယ်။ ကျနော်တို့က ဦးထုပ်လည်း ပါတယ်၊ ဒါပေမဲ့ ဖမ်းတယ်။ လူငယ်ကောင်လေးတွေ စီးလာရင်ကို ဖမ်းတာ၊ လိုင်စင် ပါ မပါ စစ်တာ။ ဦးထုပ်ပါလည်း သော့ကို တန်းဖြုတ်ထားတာ။ မော်တော်ပီကယ် အသစ်တွေ၊ အရင်က မြင်နေကြလူတွေ မဟုတ်နေဘူး”ဟု လူငယ် အမျိုးသားတစ်ဦးက ပြောသည်။

ယခင်က လိုင်စင်မဲ့ ကားများကို တောင်ကြီးမြို့ရှိ စစ်ကောင်စီလက်အောက်ခံ ယာဉ်ထိန်းရဲတပ်ဖွဲ့မှ ဖမ်းဆီးသွားပြီး သိန်း (၂၀)ကျော်ဖြင့် လိုက်လံ ရွေးထုတ်ရသော်လည်း ယခုအချိန်တွင် မည်ကဲ့သို့ ဆောင်ရွက်မည်ကို မသိရသေးကြောင်း ၎င်းက ဆက်ပြောသည်။

ပြီးခဲ့သည့် ၂၀၂၄ ခုနှစ် ဒီဇင်ဘာလတွင်လည်း တောင်ကြီးမြို့တွင် စစ်ကောင်စီ လက်အောက်ခံ ယာဉ်ထိန်းရဲများက လိုင်စင်မဲ့ ကားများကို ဖမ်းဆီးပြီး ကားပိုင်ရှင်များကို ပြန်လွှတ်ပေးကာ ဖမ်းဆီးခံရပြီး သိမ်းယူခံလိုက်ရသည့် ကားများကို သျှမ်းပြည်မြောက်ပိုင်းသို့ ပို့ဆောင်လိုက်ကြောင်း သိရသည်။

ပုံစာ – တောင်ကြီးမြို့တွင် လိုင်စင်မဲ့ ကားနှင့်ဆိုင်ကယ်များ ဖမ်းဆီးခံရစဉ် (ဓာတ်ပုံ – ဒေသခံ)