သျှမ်းပြည် ပင်လောင်းမြို့နယ်တွင် တိုက်ပွဲများကြောင့် အိမ်ခြေတစ်ထောင်ကျော် အတွက် နေရာထိုင်ခင်းနှင့် စားနပ်ရိက္ခာများ အကူညီလိုအပ်နေကြောင်းစုံစမ်းသိရသည်။

ပင်လောင်းမြို့နယ် ဆောင်းပြောင်းကျေးရွာတွင် စစ်ကောင်စီတပ်၊ PNO ပြည်သူ့စစ်နှင့် တော်လှန်ရေး အင်အားစုတို့ ပြီးခဲ့သည့် မေလ (၁၇)ရက်မှစ၍ တိုက်ပွဲများပြင်းထန်ခဲ့ပြီး၊ တိုင်ပွဲများကြောင့် ဆောင်းပြောင်းကျေးရွာရှိ အိမ်ခြေ ၁၀၀၀ ဝန်းကျင်ရှိ ဒေသခံများ နီးစပ်ရာ ပင်လောင်း ၊ ဝါးလီး ၊ ပင်ခွန် ၊ နန်းထာ စသည့် ကျေးရွာနှင့် နီးစပ်သည့် နေရာများတွင် သွားရောက်ခိုလှုံနေကြရကြောင်း စစ်ဘေးရှောင်နေသည့် အမျိုးသားတစ်ဦး က သျှမ်းသံ‌တော်ဆင့်ကို ပြောသည်။

“အိမ်ခြေက ၁၀၀၀ ဝန်းကျင်လောက်ရှိတော့ လူဦးရေးဘယ်လောက်ရှိမလည်း ခန့်မှန်းလို့မရဘူးဗျ။ တချို့ကြတော့ ဘုန်းကြီးကျောင်းနဲ့ ဆွေမျိုးအိမ်တွေပြေး တချို့ကြတော့ သူများရွာနားတွေမှာ တဲဆောက်နေကြတာပေါ့။ကျနော်က ကြုံသလိုအိပ်နေရတာ နေရာအတည်အကျမရဘူးသေးဘူး” စစ်ဘေးရှောင်နေသည့် အမျိုးသားတစ်ဦးက ပြောသည်။

လက်ရှိ ထွက်ပြေးနေသည့် ဆောင်းပြောင်းဒေသခံများသည် နေရာထိုင်ခင်းအခက်အခဲများ ကြုံတွေ့နေရသည့်အပြင် စားနပ်ရိက္ခာအခက်အခဲများလည်း ကြုံတွေ့နေရကြောင်း အသက် ၃၀ ဝန်းကျင် ဒေသခံအမျိုးသားတစ်ဦးက ဆက်ပြောသည်။

“အကုန်လုံးက ရုတ်တရက်ပြေးလာရတာ မနက်အစောကြီးထပြေးရတာ။အဝတ်တစ်ထည် ကိုယ်တစ်ခုနဲ့ ထွက်လာကြတော့ စားနပ်ရိက္ခာတွေက အဓိကလိုအပ်တာပေါ့။အများစုက ဘာမှ မပါလာတာများတယ်။ပြေးလာတာလည်း ၃ ရက်လောက်ပဲရှိသေးတာဆိုတော့ ဘာမှ အတည်တကျမရှိသေးဘူး။”ဟု ၎င်းကပြောသည်။

လက်ရှိတွင် ထွက်ပြေးတိမ်းရှောင်နေရသည့် လူဦးရေး စာရင်း နှင့် စားနပ်ရိက္ခာများကူညီသည့် အဖွဲ့အစည်းမရှိသေးကြောင်း ပင်လောင်းမြို့‌ဒေသခံ နှင့် စစ်‌ဘေးရှောင်များကပြောသည်။

ဆောင်းပြောင်းကျေးရွာ နှင့် ပင်လောင်းမြို့သည့် မိုင်ပေါင်း ၂၅ မိုင်ခန့်သာ ကွာဝေးပြီး၊ ဖယ်ခုံမြို့ အနောက်ဘက် (၁၁)မိုင် အကွာတွင် တည်ရှိပြီး စံကားအင်း၏ တောင်ဘက်တွင်ရှိသည့် ရွာကြီးတစ်ရွာဖြစ်သည်။

ပြီးခဲ့သည့် ၁၈ ရက်တွင်လည်း တိုက်ပွဲများ‌ကြောင့် ဆောင်းပြောင်းကျေးရွာအတွင်းရှိ ဒေသခံနေအိမ်များ မီးလောင်ပျက်စီးခဲ့ရကြောင်း သိရသည်။

ပြီးခဲ့သည့် ၂၀၂၄ ခုနှစ် စက်တင်ဘာလတွင်လည်း စစ်ကောင်စီ၊ PNO ပြည်သူ့စစ်နှင့် KNDF တော်လှန်ရေးတပ်ပေါင်းစုတို့ တိုက်ပွဲပြင်းထန်စွာ ဖြစ်ပွားခဲ့ကြပြီး နောင်ဝိုး၊ လွယ်ကျိုင်း၊ ဟိုဝိုး၊ ဆောင်းပြောင်း၊ ဆော်လန်၊ နမ့်ဖာမူ၊ ဝမ်မိုင်ကျေးရွာများသည် စစ်ဘေးရှောင်တိမ်းခဲ့ရသည်။