သျှမ်းပြည်တောင်ပိုင်း ပင်လောင်းမြို့နယ် ဆောင်းပြောင်းကျေးရွာတွင် စစ်ကောင်စီတပ်၊ PNO ပြည်သူ့စစ်နှင့် တော်လှန်ရေးအင်အားစုတို့ တိုက်ပွဲပြင်းထန်စွာ ဖြစ်ပွားနေကြောင်း သတင်းရရှိသည်။
ပြီးခဲ့သည့် မေလ (၁၇)ရက်မှ စတင်ပြီး ယနေ့ (မေ ၁၉ ရက်)အထိ ပင်လောင်းမြို့နယ် ဆောင်းပြောင်းကျေးရွာတွင် စစ်ကောင်စီတပ်၊ PNO ပြည်သူ့စစ်နှင့် တော်လှန်ရေးအင်အားစုတို့ တိုက်ပွဲဖြစ်ပွားခဲ့ပြီး တိုက်ပွဲပြင်းထန်နေသဖြင့် ဒေသခံများ ဘေးလွတ်ရာသို့ တိမ်းရှောင်နေရကြောင်း ဒေသခံများက ပြောသည်။
“တိုက်ပွဲမဖြစ်ပွားခင် တစ်ရက်အလိုမှာတော့ အိမ်ထဲကနေ အိမ်ပြင်မထွက်ဖို့ PNO က မှာထားတယ်။ ဒါပေမဲ့ မရဘူးလေ ပြေးမှရမှာ၊ စစ်ကောင်စီက လက်နက်ကြီးတွေနဲ့ ပစ်တော့ ရွာထဲက အိမ်တစ်လုံး မီးလောင်သွားတယ်။ ခုဆိုရင် မီးလောင်တဲ့အိမ် ဘယ်နှလုံးရှိလည်းတော့ မသိသေးဘူး။ တော်လှန်ရေးတပ်သားတွေက ရွာထဲက စားနပ်ရိက္ခာတွေ ယူသွားတယ်လို့ ကြားတယ်” ဟု ဆောင်းပြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို့အပြင် စစ်ကောင်စီလက်အောက်ခံ PNO ပြည်သူ့စစ်များက ကျေးရွာတွင်းရှိ ပြည်သူပိုင် ပစ္စည်းများဖြစ်သည့် လယ်ထွန်စက်၊ ဆိုင်ကယ် စသည့် စက်ပစ္စည်းနှင့်ဆိုင်သည့် ပစ္စည်းများကို ယူဆောင်သွားပြီး မြို့ပေါ်တွင် ပြန်လည်ရောင်းချနေသည်ဟု ဒေသခံများက ထပ်လောင်းပြောသည်။
ထိုကဲ့သို့ ဆောင်းပြောင်းဒေသခံများ ထပ်မံစစ်ရှောင်လာရသောကြောင့် စားနပ်ရိက္ခာ အခက်အခဲနှင့် နေစရာအခက်အခဲများ ကြုံတွေ့နေကြရသည်ဟု စစ်ရှောင်လာသူတစ်ဦးက ပြောသည်။
“ကမန်းကတန်းနဲ့ ထွက်ပြီး စစ်ရှောင်လာရတော့ စားရေးသောက်ရေးနဲ့ နေစရာတွေ ခက်ခဲတယ်။ ဆောင်းပြောင်းမှာက အရင် ၂၀၂၄ တုန်းက တိုက်ပွဲ ဖြစ်တုန်းက နေရပ်မပြန်ကြသေးတဲ့ သူလည်းရှိတယ်။ အခုက အိမ်ခြေ (၆၀၀) လောက်ထပ်ပြီး စစ်ရှောင်နေရတယ်။ မရှောင်တဲ့လူလည်းရှိတယ်၊ ခုထိ ပစ်နေကြတုန်းပဲ”ဟု စစ်ရှောင်အမျိုးသမီးတစ်ဦးက ပြောသည်။
ယခုလက်ရှိ စစ်ရှောင်များသည် ပင်လောင်းမြို့နယ် ဝါးလီး၊ ပင်ခွန်၊ နန်းထာကျေးရွာတို့ဘက်တွင် စစ်ဘေးတိမ်းရှောင်နေကြရသည်ဟု အဆိုပါ စစ်ဘေးရှောင် အမျိုးသမီးက ထပ်လောင်းပြောသည်။
ပြီးခဲ့သည့် မေ ၁၇ ရက်တွင်လည်း ဆောင်းပြောင်းတိုက်ပွဲတွင် PNO ဘက်မှ စစ်သားစုဆောင်းခံရသည့် တင်းထက်ရွာသားနှစ်ဦးဖြစ်သည့် အသက် (၂၀)ဝန်းကျင်အရွယ် ခွန်ရာဇာနှင့် ခွန်လွင်မိုးတို့ သေဆုံးသွားကြောင်း သိရသည်။
ဆောင်းပြောင်းကျေးရွာသည် သျှမ်း-ကရင်နီနယ်စပ် ဖယ်ခုံမြို့အနောက်ဘက် (၁၁)မိုင်အကွာတွင် တည်ရှိပြီး စံကားအင်း၏ တောင်ဘက်တွင်ရှိသည့် ရွာကြီးတစ်ရွာဖြစ်သည်။
ပြီးခဲ့သည့် ၂၀၂၄ ခုနှစ် စက်တင်ဘာလတွင်လည်း စစ်ကောင်စီ၊ PNO ပြည်သူ့စစ်နှင့် KNDF တော်လှန်ရေးတပ်ပေါင်းစုတို့ တိုက်ပွဲပြင်းထန်စွာ ဖြစ်ပွားခဲ့ကြပြီး နောင်ဝိုး၊ လွယ်ကျိုင်း၊ ဟိုဝိုး၊ ဆောင်းပြောင်း၊ ဆော်လန်၊ နမ့်ဖာမူ၊ ဝမ်မိုင်ကျေးရွာများ စစ်ဘေးရှောင်တိမ်းခဲ့ရသည်
Leave a Comments