သျှမ်းပြည် နောင်ချိုမြို့နယ် အုမ္မသီးလမ်းခွဲကျေးရွာတွင် စစ်ဘေးရှောင်အမျိုးသားတစ်ဦး စနိုက်ဘာသေနတ်ဖြင့် ပစ်ခတ်ခံရပြီး ပွဲချင်းပြီး သေဆုံးသွားခဲ့ကြောင်း စုံစမ်းသိရသည်။

ယမန်နေ့ (မေလ ၁၈ ရက်) နံနက် ၁၀ နာရီခွဲကျော်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့နယ် အုမ္မသီးလမ်းခွဲကျေးရွာရှိ ချိုခမ်းဘုန်းကြီးကျောင်းထဲသို့ ကျေးရွာအတွင်း ပြည်သူနေအိမ်ထဲ ပုန်းအောင်းနေသည့် လက်နက်ကိုင်တပ်ဖွဲ့ဝင်မှ စနိုက်ဘာဖြင့် ပစ်ခတ်ခဲ့ရာ စစ်ဘေးရှောင် အမျိုးသားတစ်ဦးကို ထိမှန်ခဲ့ကာ ပွဲချင်းပြီး သေဆုံးသွားခဲ့သည်။

စစ်ဘေးရှောင် (၁၀၀) ကျော် ခိုလှုံနေသည့် ၎င်း ချိုခမ်းဘုန်းကြီးကျောင်းထဲ စနိုက်ဘာပစ်ခတ်ခံရပြီး သေဆုံးသွားသူမှာ တောင်ယာသွားရန် ထော်လာဂျီစက်နှိုးနေသည့် အသက် (၃၄) နှစ်အရွယ် စိုင်းအိုက်လျန် ဖြစ်ပြီး ရင်ဘတ်ထိမှန်ဒဏ်ရာဖြင့် နေရာတွင် ပွဲချင်းပြီး သေဆုံးသွားခဲ့ကြောင်း ဖြစ်စဉ်သိရှိသူ ဒေသခံတစ်ဦးက သျှမ်းသံတော်ဆင့်ကို ပြောသည်။

“မနက်ပိုင်း အုမ္မသီးလမ်းခွဲမှာ ချိုခမ်းဘုန်းကြီးကျောင်းထဲကို သေနတ်နဲ့ ပစ်တာ။ အိုက်လျန်က ထော်လာဂျီ စက်နှိုးပြီး လယ်သွားဖို့ လုပ်တဲ့အချိန် စနိုက်ဘာနဲ့ ပစ်ခံရတာ။ အရင်နေရာ ပုန်းနေတဲ့အိမ်ထဲကနေ ချိုခမ်းဘုန်းကြီးကျောင်းထဲကို ပစ်တာ၊ စစ်ဘေးရှောင်တွေ နေနေတာကို တမင်ပစ်တာ။ အဲ့နေရာမှာ ဗမာစစ်သား မရောက်သေးဘူး၊ TNLA ပဲ ရှိတာ”ဟု ဖြစ်စဉ်သိရှိသူ နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ချိုခမ်းဘုန်းကြီးကျောင်း တည်ရှိရာ အုမ္မသီး လမ်းခွဲကျေးရွာအထိ TNLA တပ်ဖွဲ့ဝင်များ နေရာယူထားပြီး ၁ ဖာလုံကျော် ကွာဝေးသည့် အုမ္မသီးကျေးရွာတွင် စစ်ကောင်စီတပ်သားများ နေရာယူထားပြီး လက်နက်ကြီးအပြင် ဒရုန်းများဖြင့် နှစ်ဘက်အပြန်အလှန် နေ့စဉ်ပစ်ခတ် တိုက်ခိုက်နေကြောင်း ဒေသခံများက ပြောသည်။

TNLA ထိန်းချုပ် နောင်ချိုမြို့နယ် အုမ္မသီးလမ်းခွဲကျေးရွာရှိ စစ်ဘေးရှောင်များ ခိုလှုံရာ ချိုခမ်းဘုန်းကြီးကျောင်းထဲ စနိုက်ဘာပစ်ခတ်ခံရပြီး စစ်ဘေးရှောင်တစ်ဦး သေဆုံးမှုနှင့် ပတ်သက်၍ သျှမ်းသံတော်ဆင့်မှ TNLA ပြောရေးဆိုခွင့်ရှိသူ လွေးယေဦးထံ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

အလားတူ မေလ ၁၄ ရက် နံနက် ၉ နာရီကျော်တွင် နောင်ချိုမြို့နယ် ဆမ္မကျေးရွာအုပ်စု ရေမောင်းတန်းကျေးရွာတွင် လင်မယားနှစ်ဦးမှ ငှက်ပျောပင်ခုတ်ရန် နေအိမ်မှ ထွက်ခွာလာစဉ် နေအိမ်များထဲ ပုန်းအောင်းနေသည့် လက်နက်ကိုင်တပ်ဖွဲ့ဝင်မှ စနိုက်ဘာဖြင့် ပစ်ခတ်ခဲ့ရာ အသက် ၅၅ နှစ်အရွယ် စိုင်းညွန့်၏ ရင်ဘတ်ထိမှန်၍ ပွဲချင်းပြီး သေဆုံးသွားခဲ့သည်။

၎င်းနောက် စနိုက်ဘာပစ်ခတ်ခံရပြီး သေဆုံးသွားသည့် စိုင်းညွန့်၏ ရုပ်အလောင်းကို သယ်ဆောင်ရန် ရွာသားများမှ သွားရောက်စဉ် စနိုက်ဘာဖြင့် ထပ်မံပစ်ခတ်ခံရခြင်းကြောင့် အသက် (၅၈) နှစ်အရွယ် စိုင်းအေး လည်း ခြေထောက်တွင် ထိခိုက်ဒဏ်ရာ ရရှိခဲ့ပြီး TNLA ထိန်းချုပ်နယ်မြေရှိ ဆေးရုံတစ်ခုတွင် ဆေးကုသမှု ခံယူနေကြောင်း ဖြစ်စဉ်တွင် ကိုယ်တိုင်ရှိနေသူ ဒေသခံအမျိုးသားတစ်ဦးမှ သျှမ်းသံတော်ဆင့်ကို ပြောသည်။

“TNLA စစ်သားတွေကတော့ အတက်အဆင်း လုပ်နေတာ ရှိတယ်။ အဲ့ဒါကြောင့် လယ်တောက တဲတွေထဲမှာ ရှောင်နေရတဲ့ လူကိုလည်း ပြောထားရတယ်၊ တောင်ယာသွားချိန် လယ်လုပ်ချိန် ပစ်ခံရမှာစိုးလို့ အသွားအလာ သတိထားဖို့။ အခု နှစ်ဘက်လုံးက ပြည်သူကို ပ စောက်ပုံစံ ဝိုင်းထားလို့ အန္တရာယ်များတယ်”ဟု နောင်ချိုဒေသခံ ၎င်းအမျိုးသားသ ဆက်ပြောသည်။

ပြီးခဲ့သည့် ဧပြီလ ၁ ရက်တွင် ငလျင်ဒဏ်သင့် ပြည်သူများကို ကူညီရန် ထောက်ပံ့ရေးပစ္စည်းများ သယ်ဆောင်လာသည့် တရုတ်နိုင်ငံ ကြက်ခြေနီအသင်း၏ ကား ၉ စီးပါ ယာဉ်တန်းကို စစ်ကောင်စီတပ်ဘက်မှ နောင်ချိုမြို့နယ် အုမ္မတီးကျေးရွာအနီး သေနတ်ဖြင့် ပစ်ခတ်ခဲ့ကြောင်း TNLA ဘက်မှ ထုတ်ပြန်ခဲ့ရာ ယင်းနောက်တွင် စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြန်လည်ဝန်ခံထားသည်။