သျှမ်းပြည်မြောက်ပိုင်း နမ္မတူမြို့ ပန်ဟိုက်ရပ်ကွက် မြို့မစျေးအနီး နေအိမ်တန်းလျားတစ်ခုတွင် ယနေ့ ၁၃ရက် ညသန်းခေါင်ယံ အချိန် မီးလောင်မှု ဖြစ်ပွားခဲ့ကြောင်း စုံစမ်းသိရသည်။

နမ္မတူမြို့ မြို့မစျေးအနီး ပန်ဟိုက် ၄ ရပ်ကွက်၊ ရပ်ကွက်ရုံးရှေ့ လေးခန်းတွဲပါသော အိမ်တန်းလျားတစ်လုံး ဝါယာရှော့ခ် ကြောင့် ညသန်းခေါင်ယံအချိန်တွင် မီးလောင်ပျက်စီးပြီး ထိခိုက်ဒဏ်ရာရသူ မရှိကြောင်း ဒေသခံတစ်ဦးက သျှမ်းသံတော်ဆင့် သို့ပြောသည်။

“အိမ်ရှင်တွေ စစ်ရှောင်သွားကြတာ၊ နေအိမ်က တစ်လုံးထဲကို လေးခန်းပါ တယ်၊ သုံးခန်းက လူမနေဘူး၊ တစ်ခန်း က အငှားချထားပေးတယ်၊ လူမရှိတဲ့ အခန်းတွေကနေ ဝါယာရှော့ခ်ဖြစ်ပြီးမီးလောင်တာ၊ ထိခိုက် ဒဏ်ရာရသူ တော့ မရှိဘူး” ဟု ပြောသည်။

မီးလောင်ပျက်စီးသွားသောအိမ်၏ အိမ်ရှင်များသည် (၁၀၂၇) စစ်ဆင်ရေး ဒုတိယလှိုင်းကတည်းက စစ်ရှောင်သွား ပြီး (၄) ခန်းအနက် (၁) ခန်းကိုအငှားချထားပြီး လူသူမရှိတဲ့ အခန်းမှ မီးစတင်လောင်ကျွမ်းကြောင်းသိရသည်။

ထိုမီးလောင်မှုသည် ညအချိန် (၁၁) နာရီဝန်းကျင်လောင်ကျွမ်းမှု ဖြစ်ပွားခဲ့ပြီး ဒေသခံ မီးသတ်များနှင့် ပရဟိတ လုပ်သားများ ဝိုင်းဝန်းငြိမ်းသတ်မှု‌ကြောင့် ညသန်းခေါင်ယံ (၁၂) ဝန်းကျင်တွင် မီး ထိန်းနိုင်ခဲ့ကြောင်း ဒေသခံများ ပြောကြားချက် အရ သိရသည်။

အလားတူ ယမန်လ ဧပြီလ ထဲတွင် သျှမ်းပြည်မြောက်ပိုင်း နမ့်ခမ်းမြို့တွင်လည်း အိမ်ရှင်စျေးသွားနေစဉ် ဝါယာရှော့ခ်မှု ကြောင့် နေအိမ်တစ်လုံးပျက်စီးခဲ့သည်။

ယခုကာလသည် အပူချိန်မြင့်မားသော ရာသီဖြစ်သဖြင့် နေအိမ်တွင် လျှပ်စစ်မီးဖြစ်စေ၊ ထင်း၊ မီးသွေး၊ ဖယောင်း တိုင်မီးများ ဖြစ်စေ သုံးစွဲပြီးပါက လုပ်ငန်းကိစ္စပြီးမြောက်သည်အထိ အထူးစောင့်ကြည့်ရန်လိုအပ်သည့်အပြင် နေအိမ်မှ မထွက်ခွာမှီနှင့် ညအိပ်တော့မည့်အချိန်တိုင်း အသုံးပြုနေဆဲ လျှပ်စစ်မီး နှင့် ထင်း မီးသွေးမီးဖိုများကို သေချာစွာ ငြိမ်းသတ်သင့်ကြောင်းလည်း မီးဘေးအန္တရာယ်ကာကွယ်ရေးအဖွဲ့အစည်းက တိုက်တွန်းနိုးဆော်ထား သည်။

အလုပ်သင် သတင်းထောက် စိုင်းဟန်မော(ဝ်) ရေးသားသည်​။