သျှမ်းပြည် သိန္နီမြို့ကို ကိုးကန့်တပ် MNDAA က ထိန်းချုပ်လာပြီးနောက် တရုတ်နိုင်ငံသား အများအပြား ဝင်ရောက်လာပြီး စစ်ဘေးရှောင်သွားသည့် နေအိမ်များနှင့် ဆိုင်ခန်းများအား လိုက်လံငှားရမ်းနေ ကြောင်း ဒေသခံများထံမှ သိရသည်။

၂၀၂၃ ခုနှစ် အောက်တိုဘာလ ၂၇ ရက်နေ့မှစတင်သည့် “၁၀၂၇ စစ်ဆင်ရေး” တိုက်ပွဲကြောင့် သိန္နီမြို့ပေါ်ရှိ ဒေသခံများသည် မိမိနေအိမ်နှင့် အိုးအိမ်ကိုစွန့်ပစ်၍ ထွက်ပြေတိမ်းရှောင်နေရခြင်း ဖြစ်သည်။

“အခု တရုတ်ပြည်က တရုတ်တွေအများကြီး ဆင်းလာတယ်။ လူမနေတဲ့ အိမ်တွေ၊ ဆိုင်ခန်းတွေ လိုက်ငှားနေတ။ ကျမတို့တွေ မငှားနိုင်တဲ့ဈေးနဲ့ ငှားနေကြတာပေါ့”ဟု သိန္နီမြို့ဒေသခံတစ်ဦးက ပြောသည်။

ကိုးကန့်တပ် MNDAA ထိန်းချုပ်ထားသည့် သိန္နီမြို့တွင် အိမ်ခြံမြေနှင့် အဆောက်အဦများ ရောင်းဝယ်ခြင်း မပြုရန် ဧပြီလဆန်းမှစ၍ ကိုးကန့်တပ် MNDAA လက်အောက်ခံ မြို့နယ်အုပ်ချုပ်ရေးမှူးက စာထုတ်ညွှန်ကြား ထားကြောင်း သိရသည်။

သို့သော် လူသူနေအိမ်သည့် အိမ်နှင့် ဆိုင်ခန်းများကို တရုတ်နိုင်ငံသား စီးပွားရေးသမားများက ဈေးကြီးပေးကာ ငှားရမ်းနေလျက်ရှိကြောင်း သိန္နီမြို့ဒေသခံတစ်ဦးက ပြောသည်။

သိန္နီမြို့တွင် ၁၀ ပေ ပတ်လည် ဆိုင်ခန်းတစ်ခန်းကို တစ်လလျှင် ၅၀,၀၀၀ ကျပ် (ငါးသောင်းကျပ်) ငှားရမ်းခ ပေးသွင်းရသော်လည်း တရုတ်နိုင်ငံသား စီးပွားရေးသမားများမှ ထိုဆိုင်ခန်းကို တစ်လလျှင် ၃၀၀,၀၀၀ (သုံးသိန်းကျပ်) ဖြင့် ငှားရမ်းထားကြောင်း သိရသည်။

ထိုဆိုင်ခန်းများကို စားသောက်ဆိုင်များ၊ တရုတ် ကုန်စုံဆိုင်များ ဖွင့်လှစ်ထားပြီး တရုတ်ယွမ်ငွေများဖြင့် ပေးချမှုများရှိကြောင်း သိန္နီမြို့ ဈေးသည်တစ်ဦးကလည်း ပြောသည်။

“မြို့ထဲတော့ စားသောက်ဆိုင်တွေ ဖွင့်ထားတာတော့များတယ်။ ပြီးတော့ သူတို့ဈေးဝယ်ရင်လည်း တရုတ်တွေပဲ သုံးကြတယ်။ အဓိက တရုတ်ကုန်စုံဆိုင်၊ ဆေးဆိုင်၊ စားသောက်ဆိုင်တွေမှာ တရုတ်ငွေနဲ့ ပေးချေတယ်။ ဒါပေမဲ့ ကျမတို့ဆီ ဈေးလာဝယ်ရင်တော့ တရုတ်ငွေမသုံးဘူး။ ကျပ်ငွေလဲပြီး လာသုံးကြတယ်။ ဒီကဒေသခံတွေလည်း တရုတ်ငွေ သိပ်မသုံးသေးဘူး” ဟု ဈေးသည်တစ်ဦးက ပြောသည်။

လက်ရှိ သိန္နီမြို့နယ် ဟိုတာရွာကျေးရွာတွင်လည်း အိမ်ဆောက်ပစ္စည်းအရောင်းဆိုင် ဖွင့်လှစ်ရန် စီစဉ်နေလျက်ရှိပြီး ဆောက်လုပ်ရေးသမားများက (အိုင်ပင်း) တိုင်များစိုက်ထူထားကြောင်း ဒေသခံများကပြောသည်။

ထို့ပြင် သိန္နီမြို့ အနီးအနားတဝိုက်တွင် တရုတ်ပြည် ဆက်သွယ်ရေး ဖုန်းလိုင်များ ရရှိနေကြောင်း သတင်းသိရသည်။ အဆိုပါ ဖုန်းလိုင်းနှင့် ပတ်သက်၍ ဒေသခံများကို ဆက်သွယ်မေးမြန်းရာတွင် တချို့နေရာတွင်သာ ရရှိပြီး၊ တချို့နေရာတွင် မရရှိသေးကြောင်း ပြောသည်။

ပြီးခဲ့သည့် ဧပြီလအတွင်း သိန္နီမြို့ ရပ်ကွက် (၁) ဈေးတန်းရပ်ရှိ ပျက်စီးသွားသည့် သိန္နီမြို့မဈေးထဲ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကိုလည်း ကိုးကန့်တပ် MNDAA က လာရောက်နှင်ထုတ်ခဲ့ပြီး ဈေးသည်များနှင့် ကိုးကန့်တပ် MNDAA ကြား ရုန်းရင်းဆန်ခတ် ဖြစ်ပွားခဲ့ သိရသည်