ငလျင်ဒဏ်သင့် ဒေသများ၌ ပြန်လည်ထူထောင်ရေး လုပ်ငန်းများကို ဆက်လက်လုပ်ဆောင်နိုင်ရန် စစ်ကောင်စီတပ်မှ မေလကုန်အထိ အပစ်ရပ် သက်တမ်းတိုးလိုက်ကြောင်း ကြေညာလိုက်သည်။

မေလ ၆ ရက်မှ ၃၁ ရက်အထိ ယာယီပစ်ခတ်တိုက်ခိုက်မှု ရပ်စဲရေးကာလအဖြစ် စစ်ကောင်စီဘက်မှ ထပ်မံသက်တမ်းတိုးမြှင့်လိုက်ကြောင်း ယနေ့ (မေလ ၆ ရက်) နံနက်ပိုင်းတွင် စစ်ကောင်စီတပ်၏ တပ်မတော်ကာကွယ်ရေးဦးစီးချုပ်ရုံးမှ ထုတ်ပြန်ခဲ့သည်။

သို့သော် ယင်းကြေညာချက် မထုတ်ပြန်မီ ယမန်နေ့ (မေလ ၅ ရက်) ညပိုင်းတွင် TNLA ထိန်းချုပ်ထားသည့် ကျောက်မဲမြို့နယ်အတွင်း မိုင်းငေါ့မြို့နယ်ခွဲရှိ ကွမ်းစလန်းရွာသို့ စစ်ကောင်စီတပ်မှ လေကြောင်းဖြင့် ထပ်မံ ဗုံးကြဲတိုက်ခိုက်ခဲ့ကြောင်း ဒေသခံများက ပြောသည်။

“ည ၉ နာရီလောက်မှာ ဗုံးလာကြဲသွားတာ ဟုတ်တယ်၊ မိုင်းငေါ့ အနောက်ဘက် ကွမ်းစလန်းနဲ့ ချုံးရွာ ကြားထဲ လာချတာ။ အဲ့ဘက် ဖုန်းလိုင်းမရတော့ ထိခိုက်မှုတော့ မသိဘူး”ဟု မိုင်းငေါ့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ ယမန်နေ့ နံနက်ပိုင်းကလည်း ကျောက်မဲမြို့အဝင်ရှိ အမြောက်တပ်ရင်း နေရာဟောင်းကို စစ်ကောင်စီဘက်မှ လေကြောင်းဖြင့် ဗုံး (၂) လုံး ကြဲချတိုက်ခိုက်ခဲ့ကြောင်း ဒေသခံများထံမှ သိရသည်။

ပြီးခဲ့သည့် ဧပြီလအတွင်း စစ်ကောင်စီနှင့် ညီနောင်မဟာမိတ်များ ယာယီအပစ်ရပ်ကြောင်း နှစ်ဘက်စလုံး ကြေညာခဲ့သော်လည်း စစ်ကောင်စီဘက်မှ ညီနောင်မဟာမိတ်တပ်များနှင့် PDF ထိန်းချုပ်နယ်မြေအတွင်းသို့ လေကြောင်းဖြင့် ဗုံးကြဲတိုက်ခိုက်မှု ဆက်လက်လုပ်ဆောင်ခဲ့ပြီး အရပ်သား ထိခိုက်သေဆုံးမှု မြင့်တက်ခဲ့သည်။

အလားတူ စစ်ကောင်စီနှင့် TNLA တို့၏ ကူမင်းဆွေးနွေးပွဲ မအောင်မြင်ပြီးနောက်ပိုင်း စစ်ကောင်စီတပ်မှ TNLA ထိန်းချုပ်ထားသည့် မိုးကုတ်၊ နောင်ချိုနှင့် ကျောက်မဲမြို့နယ်များကို လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ဓမ္မာရုံနှင့် ပြည်သူနေအိမ်များ ပျက်စီးပြီး အရပ်သား ထိခိုက်သေဆုံးမှု ရှိခဲ့သည်ဟု TNLA မှ ထုတ်ပြန်ထားသည်။

လက်ရှိတွင် ညီနောင်မဟာမိတ်များဘက်မှ မေလ (၁) ရက်မှ (၃၁) ရက်နေ့အထိ တစ်လတာ ထပ်မံအပစ်ရပ်ထားခြင်းကြောင့် TNLA အနေဖြင့် ထိုးစစ်ဆင် တိုက်ခိုက်ခြင်း ပြုလုပ်မည် မဟုတ်ဘဲ စစ်ကောင်စီတပ်၏ စစ်ရေးလှုပ်ရှားမှုကို စောင့်ကြည့်ကာ မိမိကိုယ်မိမိ ခုခံ ကာကွယ်ပိုင်ခွင့်ကိုသာ ဆောင်ရွက်မည်ဖြစ်ကြောင်း မေလ ၄ ရက်နေ့တွင် ပြုလုပ်ခဲ့သည့် TNLA သတင်းစာရှင်းလင်းပွဲ၌ ပြောရေးဆိုခွင့်ရှိသူ လွေးယေဦးက ပြောကြားခဲ့သည်။