သျှမ်းပြည်အရှေ့ပိုင်း က တာချီလိတ်မြို့ ရေကြီးရေလျှံမှု မကြာခဏ ကြုံနေရသည့် တာလော့စျေးတွင် ဆိုင်ခန်းပိုင်ရှင်များက ငှားရမ်းခ ချပေးသော်လည်း ငှားရမ်းသူမရှိကြောင်း ဒေသခံ စျေးသည်များ ပြောပြချက်အရသိရသည်။

ထိုင်း- မြန်မာနယ်စပ်ရှိ တာလော့စျေးတွင် ရေကြီးရေလျှံမှု မကြာခဏကြုံရသဖြင့် စျေးဆိုင်ခန်းငှားခ ၃ ဆနီးပါးကျဆင်းပြီး ငှားရမ်းသူမရှိသည့်အပြင် နဂိုရှိရင်း စျေးသည်များ ရေလွှတ်ရာသို့ ပြောင်းရွှေ့နေကြကြောင်း အမည်မဖော်လို သည့် တာချီလိတ်ဒေသခံ တစ်ဦးက သျှမ်းသံတော်ဆင့်သို့ပြောသည်။

“ရေကြီးပြီးနောက်ပိုင်း ငှားခ စျေးကျသွားတယ်၊ စျေးက ၄ ပုံပုံရင် ၁ပုံပဲရှိတော့တာပေါ့၊ အရင်က တလ ကို ဘတ် ၄ သောင်း ၅သောင်း (မြန်မာငွေကာလပေါက်စျေး ကျပ်သိန်း ၅၀ -၆၅) ပေးရတာကို ခုက ၈ထောင် ၁ သောင်း (မြန်မာငွေ ကာလပေါက်စျေး ကျပ်ငွေ ၁၀သိန်း – ၁၅သိန်း) လောက်ကျသွားတာ၊ ဘယ်သူမှလည်း လုပ်မစားချင်တော့ဘူးလေ၊ ပြန်ပြင်၊ ပြန်ဆင်၊ ပစ္စည်းတွေလည်း ဆုံးရှုံး၊ အဲ့စျေးမှာ ရောင်းနေကျလူတွေလည်း သူတို့အိမ်တွေမှာပဲရောင်းကျတော့တာ၊ အိမ်က ဂျောင်ကျပေမယ့် ဆိုင်ခန်းငှားပြီး မရောင်းတော့ဘူး” ဟုပြောသည်။

တာလော့စျေးသည် ပြီးခဲ့သည့် စက်တင်ဘာလတွင် ရေကြီးမှုကြောင့် ပျက်စီးဆုံးရှုံးခဲ့သည်။ ပြန်လည် ထူထောင်ရေး ပြီးခါစ ယခုနှစ် ဧပြီတွင် ရေကြီးမှုထပ်မံ ကြုံတွေ့ရသော်လည်း သက်ဆိုင်ရာ အာဏာပိုင်များ ထိရောက်သည့် ကူညီ ဖြေရှင်းမှု မရှိကြောင်း ၎င်းဒေသခံက ဆက်ပြောသည်။

“ကူညီဖြေရှင်းမှုမှာ အားနည်းတယ်၊ ထုံးစံအတိုင်းပဲ ဟန်ပြလောက်ပဲလုပ်တာ၊ သဘာဝ‌ဘေးနဲ့ ပတ်သက်ပြီး ကြိုတင် ပြင်ဆင်ထားတာလဲမရှိဘူး၊ ဖြစ်လာပြီးရင် သူတို့မှာ ဘယ်လိုဖြေရှင်းမလဲ ဆိုတဲ့အဖြေလည်းမရှိဘူး၊ ရေကြီးတဲ့ချိန်မှပဲ စက်လှေတွေ လိုက်ရှာတယ်… အဲ့ဒီတော့ အစိုးကမကြည့်တော့ ပြည်သူတွေကပဲ သန်မာအောင် နေရတာပေါ့” – ဟု ပြောသည်။

ရေကြီးရေလျှံဖြစ်ပေါ်သည့် နမ့်ဆိုင်ချောင်းတွင် မြန်မာအာဏာပိုင်မှ ရေကာသည့်တံတိုင်း ဆောက်လုပ်နေ သော်လည်း ထိရောက်သည့်ဖြေရှင်းမှုမဟုတ်ကြောင်း မယ်ဆိုင်မြို့တွင်နေထိုင်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ခုက တံတားနားမှာပဲဆောက်ထားသေးတာ၊ ရေက အဲ့နားကနေပဲဝင်တာမဟုတ်ဘူးလေ၊ ပုန်းထွန်တို့၊ ဆန်ဆိုင်း တို့ကနေလဲရေတွေဝင်လာတာပဲ၊ အကုန်ဆောက်ပြီးရင်တောင် ရေဝင်ပြီး ရေထပ်ကြီးမှာပဲ၊ မြစ်အထက်ပိုင်းမှာ ရွှေတူးလို့ နုန်းမြေတွေပါလာတာ၊ အဓိက ဖြစ်တဲ့နေရာကို ဖြေရှင်းမှရမှာပေါ့၊ ခုက တာချီလိတ်ဘက်ပဲ မဟုတ်ဘူး၊ ထိုင်း မယ်ဆိုင်ဖက်လဲ ခံနေရတယ်” – ဟု အဆိုပါ အမျိုးသားက ပြောသည်။

၂၀၂၄ စက်တင်ဘာလလဆန်းပိုင်း ကတည်းက ရေကြီးရေလျှံမှု စတင်ဖြစ်ပွားခဲ့ပြီး တစ်နှစ်မပြည့်သေးခင် ၂၀၂၅ ဧပြီလတွင်‌ ရေကြီးမှုထပ်မံဖြစ်ပွားခဲ့သည်။

လာမည့် မိုးတွင်းကာလ ရေကြီးမှုထပ်ဖြစ်မည်ကို တာချီလိတ်ဒေသခံ များစိုးရိမ်နေကြသည်။ ထိုမကြုံစဖူး ရေကြီးမှုသည် မယ်ဆိုင်ချောင်းဖျား ရွှေတူးဖော်မှုများကြောင့်ဖြစ်ပြီး အမြန်ဆုံး ဖြေရှင်းပေးဖို့ ထိုင်းလူထုက ထိုင်းအာဏာပိုင်များ နှင့် မြန်မာဏာပိုင်များထံ ဆန္ဒပြတောင်းဆိုထားမှုများလည်းရှိသည်။

အလုပ်သင်သတင်းထောက် စိုင်းဟန်မော(ဝ်) ရေးသားသည်။