သျှမ်ပြည် အ‌ရှေ့ပိုင်း တာချီလိတ်မြို့ အဝင်အထွက်ရှိ စစ်ကော်မရှင် စစ်ဆေးရေးဂိတ်တွင် ငွေညှစ် တောင်ခံ နေကြောင်း သိရသည်။

ပြီးခဲ့သည့် သြဂုတ်လ တတိယပတ်မှ စပြီး တာချီလိတ်မြို့ အဝင်၊ အထွက်ရှိ မယ်ယန်း စစ်ကော်မရှင် စစ်ဆေးရေး ဂိတ်တွင် ခရီးသည်တင်ယာဉ်နှင့် ကုန်တင်ယာဉ်များကို ငွေညှစ်တောင်းခံနေကြောင်း အသက် ၃၀ ဝန်းကျင်‌ကားသမားတစ်ဦးက သျှမ်းသံတော်ဆင့်ကို‌ပြောသည်။

“အဲ့ တာချီလိတ်အဝင်၊ အထွက်ဂိတ်မှာက သူတို့ဒီ ကုန်ပစ္စည်းတွေပေးမတင်တဲ့ နောက်ပိုင်း စစ်တာကြမ်း လာတယ်။ပြီးတော့ ငွေတွေညှစ်တောင်းတာ။ကျနော်က ၁ သိန်းခွဲလောက်ပေးလိုက်ရတယ်။အရင်က အဲ့လောက်ထိ မပေးရဘူး။အခုက ကုန်ပစ္စည်းတွေတောင် သိပ်ပေးမတင်ချင်ဘူး။”ဟု အသက် ၃၀ ဝန်းကျင်‌ကားသမားတစ်ဦး ကပြောသည်။

လက်ရှိ အချိန်ထိ ကုန်ပစ္စည်းများကို ယခင်ကဲ့သို့အလွယ်တကူ တင်ဆောင်သွားလာနိုင်ခြင်းမရှိသေးသည့် အတွက် ကားသများအချို့ ရပ်နားထားရကြောင်း ၎င်းက ဆက်ပြောသည်။

“ကုန်ပစ္စည်းတွေက အရင်လိုတင်လို့ မရတော့ လူကိုပဲအဓိကတင်ရတယ်။တာချီလိတ်ဖက်က နေတောင်ကြီး မိုင်းရှူးသွားတဲ့လူက ပါးတယ် သိပ်မရှိ၊ ကုန်တွေလည်း မတင်ရတော့ တချို့ကနားတောင် နားထားရတယ်။ကုန်ပစ္စည်းတွေကို ဒီနှစ်ကုန်မှ ပြန်ပေးတင်မယ်ပြောတာပဲ မသေချာပါဘူး။”ဟု အသက် ၃၀ ဝန်းကျင်‌ကားသမားတစ်ဦးကပြောသည်။

ပြီးခဲ့သည့် ၂၀၂၅ ဇွန်လဆန်းပိုင်းမှ စတင်ပြီး သျှမ်းပြည် အတွင်းရှိ စစ်ကော်မရှင် စစ်ဆေးရေး ဂိတ်များတွင် ထိုင်းနိုင်ငံနှင့် တရုတ်နိုင်ငံထုတ် စားသောက်ကုန်ပစ္စည်းများကို အဓိကထားပြီး စစ်ဆေးကာ တင်သွင်းခွင့်များလည်း ပိတ်ပင်ထားခဲ့သည်။

ပြီးခဲ့သည့် သြဂုတ်လတွင် နိုင်ငံခြားသုံးငွေ ကြီးကြပ်မှုကော်မတီ၏ လမ်းညွှန်ချက်အရ ကုန်ပစ္စည်း ၃၅ မျိုးကို နယ်စပ်ဂိတ်၊ ပင်လယ်ရေကြောင်းဂိတ်များမှစ၍ တင်သွင်းခွင့် ယာယီ ထပ်မံ ပိတ်လိုက်ကြောင်း ကြေညာပြီးနောက် သျှမ်းပြည် အတွင်းရှိ စစ်ကော်မရှင် စစ်ဆေးရေးဂိတ် နေရာတော်တော်များများတွင် စစ်ဆေးမှု တင်းကြပ်လာပြီး ငွေညှစ်တောင်ခံမှုများ လာကြောင်း သိရသည်။