သျှမ်းပြည်မြောက်ပိုင်း၊ နောင်ချိုမြို့အပါဝင် TNLAထိန်းချုပ်ထားသည့် မြို့နယ်များကို ကူမင်းဆွေးနွေးပွဲ အပြီး စစ်ကောင်စီမှ ဗုံးကြဲတိုက်ခိုက်မှု ဆက်တိုက်ပြုလုပ်နေကြောင်း သိရှိရသည်။

ယမန် မေလ (၃)ရက်နေ့ နှင့် မေလ (၂)ရက်နေ့ ညနေပိုင်းတွင် မန္တလေးတိုင်း ၊မိုးကုတ်မြို့ အပါဝင် နောင်ချိုမြို့ကို စစ်ကောင်စီမှ လေကြောင်းဖြင့်ဗုံးကြဲတိုက်ခိုက်ခဲ့သောကြောင့် ဓမ္မာရုံနှင့် ပြည်သူနေအိမ် (၆)လုံးပျက်စီးသွားပြီး အရပ်သားထိခိုက်သေဆုံးမှု ရှိခဲ့သည်ဟု TNLAမှထုတ်ပြန်ထားသည်။

“ဟုတ်တယ် မနေ့ညကနောင်ချိုကို လေယာဉ်နဲ့ လာဗုံးကြဲတာ။နေအိမ်တွေတော့ ပျက်စီးကုန်တယ်။ လူတော့ ထိခိုက်မှုမရှိဘူး။ ဒါပေမဲ့ မိုးကုတ်ဖက်ကိုလည်း မနေ့ကလေယာဉ်နဲ့ လာကြဲသွားတယ်ပြောတယ်။သူတို့ဖက်တော့ လူထိခိုက်မှု ရှိတယ်လို့ ကြားတယ်။” ဟု မြေပြင်သတင်းရင်းမြစ်တစ်ဦး ယမန်နေ့ ညပိုင်းတွင် ပြောသည်။

အဆိုပါ ဗုံးကြဲတိုက်ခိုက်မှုကြောင့် မိုးကုတ်မြို့ အနောက်ပိုင်း၊ ကသဲရပ်ကွက်ရှိ အနောက်ကျောင်း ဘက်တွင် ဒေသခံသံ တစ်ဦးသေဆုံးပြီး တစ်ဦးထိခိုက်ဒဏ်ရာရရှိခဲ့သည်ဟု အဆိုပါTNLA ထုတ်ပြန်ချက်တွင် ဖော်ပြထားသည်။

ပြီးခဲ့သည့် ဧပြီလ (၃၀)ရက်တွင်လည်း မိုးကုတ်မြို့ အနောက်ပိုင်း၊သစ်စိမ့်ကုန်းနှင့် ကျောက်ပုတ်ကျေးရွာကြားတွင် စစ်ကောင်စီတပ်မှ လေကြောင်းဖြင့် ပေါင် (၂၅၀)ဗုံး (၂)လုံးလာရောက်ကြဲချတိုက်ခိုက်ခဲ့သည်ဟုTNLA ထုတ်ပြန်ချက်အရသိရသည်။

ထို့အပြင် ပြီးခဲ့သည့် ဧပြီလ (၂၈)ရက်မှ (၂၉)နေ့အထိ တရုတ်နိုင်ငံ ကူမင်းမြို့တွင် ပြုလုပ်သော စစ်ကောင်စီနှင့် တTNLA တို့ ဆွေးနွေးပွဲတွင် စစ်ကောင်စီမှ ထိန်းချုပ်ထားသည့် နောင်ချို၊ ကျောက်မဲ၊သီပေါ၊မိုးကုတ်နှင့် မိုးမိတ် စသည့်နယ်မြေများကိုအားလုံးမှကို ဆုတ်ခွာပေးရန်တောင်းဆိုမှုကြောင့် TNLAမှ လက်မခံ၍ ဆွေးနွေးမှု မအောင်မြင်ဘဲ ပြီးဆုံးခဲ့ရသည်။

စစ်ကောင်စီတပ်မှ ကူမင်းဆွေးနွေးပွဲ အပြီး TNLAထိန်းချုပ်ဒေသဘက်တွင် စစ်အင်အားဖြည့်တင်းခြင်း ထိုးစစ်ဆင်ခြင်းများ ပြုလုပ်ခြင်း၊ အရပ်သားပစ်မှတ်ထား၍ လေကြောင်းမှ ဗုံးကြဲတိုက်ခိုက်ခြင်းများ ပြုလုပ်နေခြင်းကြောင့် မိဘပြည်သူများအနေဖြင့် စစ်ကောင်စီ၏လေကြောင်းရန်ကို ရှောင်ရှားရန် အမြဲသတိရှိရန် လိုအပ်ကြောင်း TNLAမှ အသိပေးထုတ်ပြန်ထားသည်။