ကိုးကန့်တပ် MNDAA ထိန်းချုပ်ထားသည့် သိန္နီမြို့ပေါ်ရှိ ဈေးသည်များကို နေရာပြောင်းရွှေ့ခိုင်းမှု၊ ဆိုင်ခန်း ဖြိုဖျက်မှုနှင့် ပတ်သက်၍ ဆန္ဒပြခဲ့သူများကို ကိုးကန့်တပ် MNDAA က ခေတ္တဖမ်းဆီးပြီး ခြိမ်းခြောက်ခဲ့ကြောင်း ဒေသခံများထံမှ သိရသည်။
ပြီးခဲ့သည့် (ဧပြီလ ၃၀ ရက်နေ့) နံနက်ပိုင်းတွင် သိန္နီမြို့ ရပ်ကွက် (၁) ဈေးတန်းရပ်ရှိ ပျက်စီးသွားသည့် သိန္နီမြို့မဈေးထဲ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကို ကိုးကန့်တပ် MNDAA က လာရောက်နှင်ထုတ်ခဲ့ပြီး ဈေးသည်များနှင့် ကိုးကန့်တပ် MNDAA ကြား ရုန်းရင်းဆန်ခတ် ဖြစ်ပွားခဲ့ကြောင်း ဈေးသည်တစ်ဦးက ပြောသည်။
ထို့နောက် ဈေးသည်အမျိုးသမီး ၃ ဦးကို ရဲစခန်းဘက်သို့ ဖမ်းဆီးခေါ်ဆောင်သွားပြီး ၎င်းတို့နောက် လိုက်ပါလာသည့် ဈေးသည်များကိုလည်း ခြိမ်းခြောက်ခဲ့ကြောင်း သိန္နီမြို့ဈေးသည်တစ်ဦးက သျှမ်းသံတော်ဆင့်ကို ပြောသည်။
“ဈေးသည်ကိုယ်စား တောင်းဆိုဖို့သွားတဲ့ အမျိုးသမီး ၃ ဦးကို ကိုးကန့်တပ်က ဖမ်းပြီး ချက်ချင်းဖုန်သိမ်းထား လိုက်တာ။ အပြင်ကလူတွေကိုလည်း ပေးမဆက်သွယ်ဘူး။ အဲ့လိုနဲ့ ဈေးသည်တချို့တွေ လိုက်သွားရှာတာ။ ရဲစခန်းကိုရောက်တော့ ပေးမဝင်ဘူး။ နောက်တခါ မင်းတို့ မျက်နှာမြင်ချင်ဘူး၊ မြင်ရင် လက်ထိပ်ခတ်မယ်လို့ ခြိမ်းခြောက်ခဲ့တာ” ဟု ဈေးသည်တစ်ဦးက ပြောသည်။
ထိုသို့ ဖမ်းဆီးသွားပြီးနောက် ဈေးသည်အမျိုးသမီး ၃ ဦးကို ညနေပိုင်းတွင် ကိုးကန့်တပ် MNDAA က ပြန်လွှတ်လာပေးခဲ့ပြီး နောက်ထပ်ဈေးသည်အမျိုးသမီးတစ်ဦးကို ထပ်မံဖမ်းဆီးသွားခဲ့ကြောင်း ၎င်းကဆိုသည်။
ဖမ်းဆီးခံထားရသည့် ဈေးသည်အမျိုးသမီး၏ အခြေအနေနှင့် ပတ်သက်၍ ပြန်လွှတ်လာပေးခြင်း ရှိ၊ မရှိ မသိရှိရသေးကြောင်း ဒေသခံတစ်ဦးက ပြောသည်။
လက်ရှိအချိန်ထိ သိန္နီမြို့မဈေးထဲရှိ ဆိုင်ခန်းများကို ကိုးကန့်တပ် MNDAA က အလုပ်သမားများ ခေါ်ယူပြီး ဖြိုဖျက်ခိုင်းနေကြောင်း သိရသည်။
ဧပြီလကုန်ပိုင်းမှစ၍ သိန္နီမြို့တွင်းရှိ လမ်းဘေးတလျှောက်နှင့် မြို့မဈေးထဲ ဈေးရောင်းချနေသော ဈေးသည်များကို ကိုးကန့်တပ် MNDAA မှ ဖွင့်လှစ်သည့် ပန်လော့ဈေးထဲ၌ ပြောင်းရွှေ့ရောင်းချသွားရန် အကြောင်းထားခြင်း ဖြစ်သည်။
သို့သော် ထိုဈေးထဲတွင် ဈေးဆိုင်ဖွင့်လှစ်ရောင်းချပါက ကိုးကန့်တပ် MNDAA ကို အခွန်အဆမတန် ဆောင်ရမည်ဖြစ်သဖြင့် ဈေးသည်များသည် မြို့မဈေးထဲရှိ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချခဲ့ကြောင်း သိရသည်။
ထိုသို့ မူလဆိုင်ခန်းနေရာတွင် ပြန်လည်ဖွင့်လှစ် ရောင်းချနေသည့် ဈေးသည်များကို ကိုးကန့်တပ် MNDAA က ဧပြီလ ၁၅ ရက်တွင် ထပ်မံနှင်ထုတ်ခဲ့ကြောင်း သိရသည်။
ပြီးခဲ့သည့် ၂၀၂၄ ခုနှစ် ဇူလိုင် ၁၈ ရက်တွင် စစ်ကောင်စီ၏ လေကြောင်းမှ ဗုံးကြဲတိုက်ခိုက်မှုကြောင့် ပျက်စီးသွားသည့် သိန္နီမြို့ရှိ မြို့မဈေးကို လက်ရှိတွင် ကိုးကန့်တပ် MNDAA က ဖြိုဖျက်ပြီး ကာစီနို (သို့မဟုတ်) ဈေးဝယ်စင်တာ ဆောက်လုပ်မည်ဟု ဒေသခံများကပြောသည်။
Leave a Comments