ထိုင်းရောက် မြန်မာရွှေ့ပြောင်းအလုပ်သမားကို ကူညီဆောင်ရွက်ပေးနေလျက်ရှိသော လက်တွဲကူညီ (AAC) မဟာမိတ်အဖွဲ့ရုံးကို မြေပိုင်ရှင်နှင့် ထိုင်းအာဏာပိုင်များက ယနေ့ မေလ (၁) ရက်တွင် ဝင်ရောက်ဖြိုဖျက်ခဲ့ကြောင်း သိရသည်။

ထိုင်းနိုင်ငံ စမွတ်စခွန်ခရိုင် မဟာချိုင် ထစန်ရပ်ကွက်ရှိ အဆိုပါရုံးကို မြေပိုင်ရှင်နှင့် ထိုင်းအာဏာပိုင်များက ဝင်ရောက်ဖြိုဖျက်ခဲ့ခြင်း ဖြစ်သည်။

AAC မဟာမိတ်ရုံးသည် ထိုင်းအစိုးရထံတွင် တရားဝင် မှတ်ပုံတင်ထားခြင်း မရှိသဖြင့် ရုံးကို ပိတ်ပေးရန်နှင့် နှစ်လအတွင်း ရုံးကို ဖြိုဖျက်ပေးရန် ပြီးခဲ့သည့် ဖေဖော်ဝါရီလ ၂၀ ရက်တွင် ထိုင်းအာဏာပိုင်အဖွဲ့က ပထမတစ်ကြိမ် ညွှန်ကြားထားသည်။

ထို့နောက် ဧပြီလ ၂၃ ရက်နေ့တွင် ထိုင်းအာဏာပိုင်းများက AAC မဟာမိတ်ရုံးကို ထပ်မံရောက်ရှိလာပြီး ရုံးကို အပြီးပိတ်သိမ်း၍ ဖြိုဖျက်ပေးရန် ထပ်မံညွှန်ကြားခဲ့သည်။

AAC မဟာမိတ်ရုံးသည် ၂၀၁၅ ခုနှစ်တွင် နှစ်ချုပ်ဖြင့် မြေဌားရမ်း၍ အဆောက်အဦတစ်ခု တည်ဆောက်ခဲ့ကြောင်း၊ ရုံးကို ၂၀၁၆ ခုနှစ်မှစ၍ ဖွင့်လှစ်ကာ အလုပ်သမားများအရေး ကူညီဆောင်ရွက် ပေးနေခြင်း ဖြစ်ကြောင်း သိရသည်။