သျှမ်းပြည် တာချီလိတ်မြို့တွင် ဖမ်းဆီးခံထားရသည့် ထိုင်းနိုင်ငံသား ၂၄ ဦးတို့ကို လူကုန်ကူးမှုနှင့် အွန်လိုင်းငွေလိမ် ကျားဖြန့်လုပ်ငန်း ဆက်စပ်မှုများအတွက် ထိုင်းနိုင်ငံတာဝန်ရှိသူများမှ လာရောက်စစ်ဆေးခဲ့ကြောင်း သတင်းသိရသည်။

ယမန်နေ့ (မတ်လ ၂၄ ရက်) နံနက်ပိုင်းတွင် တာချီလိတ်မြို့မရဲစခန်း၌ ဖမ်းဆီးခံထားရသည့် ထိုင်းနိုင်ငံသား (၂၄) ဦးတို့ကို လူကုန်ကူးမှုနှင့် အွန်လိုင်းငွေလိမ် ကျားဖြန့်လုပ်ငန်း ဆက်စပ်မှုများအတွက် ထိုင်းနိုင်ငံဘက်ခြမ်းမှ တာဝန်ရှိသူများ လာရောက်ပြီး ထပ်မံစစ်ဆေးခဲ့ကြောင်း Maesai Press သတင်းဌာနတွင် ဖော်ပြထားသည်။

ထိုင်းကိုယ်စားလှယ်အဖွဲ့တွင် ထိုင်းတော်ဝင်ရဲတပ်ဖွဲ့မှ လူကုန်ကူးမှုတိုက်ဖျက်ရေးစင်တာ ညွှန်ကြားရေးမှူး၊ လူကုန်ကူးမှု တားဆီးနှိမ်နင်းရေးတပ်ဖွဲ့၊ ဆိုက်ဘာမှုခင်း စုံစမ်းရေးတပ်ဖွဲ့၊ မှုခင်းဆေးပညာ ဓာတ်ခွဲကျွမ်းကျင်သူများ၊ ချင်းရိုင်းခရိုင် လူဝင်မှုကြီးကြပ်ရေး တာဝန်ရှိသူများနှင့် ရန်ကုန်မြို့ရှိ ထိုင်းသံရုံးတွင် ရဲသံမှူးအဖြစ် တာဝန်ထမ်းဆောင်နေသော ရဲမှူးကြီး ပါဝင်ကြောင်း သိရသည်။

တာချီလိတ်မြို့မရဲစခန်းတွင် ထိန်းသိမ်းခံထားရသည့် ထိုင်းနိုင်ငံသား (၂၄) ဦးမှာ ဖေဖော်ဝါရီလ (၇) ရက်နေ့တွင် တာချီလိတ်မြို့ ကြယ်တံခွန်ဟိုတယ်၌ ဖမ်းဆီးခံခဲ့ရသူများ ဖြစ်ကြပြီး ၎င်းတို့ကို အီလက်ထရောနစ် ဆက်သွယ်ရေးဥပဒေ ချိုးဖောက်မှုဖြင့် စစ်ကော်မရှင်လက်အောက်ခံ ရဲတပ်ဖွဲ့မှ တရားစွဲဆိုထားသည်။

အဆိုပါ ထိုင်းနိုင်ငံသား (၂၄) ဦးမှာ လူကုန်ကူးခံရသူများ ဟုတ်မဟုတ် စိစစ်ခွဲခြားရန် သက်သေ အထောက်အထားများ စုဆောင်းသွားမည်ဖြစ်ကြောင်း၊ မြန်မာနိုင်ငံဘက်ခြမ်းတွင် ကျူးလွန်ခဲ့သည့် ပြစ်မှုများမှာ အွန်လိုင်းငွေလိမ် ကျားဖြန့်လုပ်ငန်းများနှင့် ပတ်သက်မှု ရှိ မရှိ စစ်ဆေးနိုင်ရန် ထိုင်းတော်ဝင်ရဲတပ်ဖွဲ့ ရဲချုပ်ကြီးထံ ကနဦး အစီရင်ခံ တင်ပြသွားမည်ဟု သိရသည်။

ပြီးခဲ့သည့် မတ်လ ၃ ရက်တွင် တာချီလိတ်မြို့ မယ်ခေါင်ရပ်ကွက် (၂)၊ မယ်ခေါင်(၂)လမ်းတွင် ဖွင့်လှစ်ထားသည့် “ အပြည်ပြည်ဆိုင်ရာ ဟိုတယ်”တွင် နေထိုင်ပြီး ကျားဖြန့် အွန်လိုင်းငွေလိမ်လုပ်ငန်း လုပ်ကိုင်သော နိုင်ငံခြားသား (၃၉၃)ဉီးကို စစ်ကော်မရှင်ဘက်က ဝင်ရောက်စီးနင်း ဖမ်းဆီးခဲ့ပြီး တရုတ်၊ မလေးရှား၊ ဗီယက်နမ်နှင့် ဖိလစ်ပိုင်နိုင်ငံသားများ ဖြစ်ကြောင်း သတင်းထုတ်ပြန်ထားသည်။

ကိုးကား – Maesaipress