သျှမ်းပြည်မြောက်ပိုင်း တန့်ယန်းမြို့ ရပ်ကွက် (၂) ယမ်းသိုလှောင်သည့် နေအိမ် တွင် ပေါက်ကွဲမှု ဖြစ်ပွားပြီး အရပ်သား ထိခိုက်ဒဏ်ရာရရှိသွားကြောင်း စုံစမ်းသိရသည်။
ယနေ့ (ဧပြီလ ၃၀) ရက် နေ့လယ် ၁၂ နာရီခွဲကျော် တန့်ယန်းမြို့ ရပ်ကွက် (၂) နောင်ဖာလမ်း ရှိ အငှားအိမ်ခန်းတန်းလျား တွင် ယမ်းသိုလှောင်သည့်အခန်းမှ ပြင်းထန်သည့်ပေါက်ကွဲမှုတခုဖြစ်ပွားပြီး အနီးအနား နေအိမ်များ ထိခိုက်ပျက်စီး သည့်အပြင် အရပ်သားများထိခိုက်ဒဏ်ရာရရှိ သွားသည်ဟု တန့်ယန်းမြို့နေ လူငယ်တစ်ဦးက ပြောသည်။
“ရပ်ကွက် ၂ မှာ ဗုံးကွဲတာ အသံကအကျယ်ကြီးပဲ၊ အိမ်တောင်တုန်တယ်၊ သွားကြည့်တဲ့ချိန်တော့ ဒဏ်ရာရတဲ့ လူရှိတယ်၊ ဒဏ်ရာရသူ အတိကျတော့မသိရသေးဘူး ၊ အခုတော့ လမ်းတွေပိတ်ထားတယ် ” ဟု ထိုလူငယ်က သျှမ်းသံတော်ဆင့်သို့ ပြော သည်။
ထိုပေါက်ကွဲမှုသည် အငှားအိမ်တန်းလျားတွင်သိုလှောင်ထားရှိသော ယမ်းများဖြစ်ကြောင်း ပေါက်ကွဲသည်ဟု တန့်ယန်း ဒေသခံ တစ်ဦးက ပြောသည်။
“ယမ်းပေါက်ကွဲတာ၊ ကျောက်တွင်းတို့ ရွှေတွင်းတို့မှာ သုံးတဲ့ ယမ်းတွေပေါ့၊ သူတို့က ယမ်းတွေ ရောင်းဝယ်တာလေ ကျောက်လုပ်တဲ့လူတွေ တခြားသူတွေ ရောင်းပေးတာ” – ဟု ၎င်းကပြောသည်။
ထိုယမ်းပေါက်ကွဲမှုကြောင့် ထိခိုက်ဒဏ်ရာရရှိသူ ၃ဉီးခန့်ရှိကြောင်း၊ သေဆုံးသူတစ်ဉီးလည်းရှိကြောင်း တန့်ယန်း ဒေသခံများပြောဆိုချက်အရသိရသော်လည်း သျှမ်းသံတော်ဆင့်အနေဖြင့် အတည်မပြုနိုင်သေးပေ။
အလုပ်သင် သတင်းထောက် စိုင်းဟန်မော(ဝ်) ရေးသားသည်
Leave a Comments