သျှမ်းပြည်မြောက်ပိုင်း၊ နောင်ချိုမြို့နယ်တွင် အပစ်ရပ်ထားသည့်ကြားမှ စစ်ကောင်စီသည် နေ့စဉ်နီးပါး လေယာဉ်ဖြင့် ဗုံးကြဲတိုက်ခိုက်နေကြောင်း စုံစမ်းသိရှိရပါသည်။

ပြီးခဲ့သည့် ဧပြီလ (၂၄) ရက်မှ (၂၈) ရက်အထိ နောင်ချိုမြို့နယ် လုံးရုံကျေးရွာအုပ်စု ကျောက်ကြမ်းကျေးရွာနှင့် သဖန်းကုန်း ကျေးရွာဘက်တို့တွင် စစ်ကောင်စီတပ်မှ လေယာဉ်ဖြင့် ဗုံးကြဲတိုက်ခိုက်ခဲ့ပြီး အရပ်သား ထိခိုက်မှုမရှိသော်လည်း အဆောက်အဦ ပျက်စီးမှုရှိကြောင်း ရှေ့တန်းစစ်မြေပြင်မှ DPLA တပ်သားတစ်ဦးက သျှမ်းသံတော်ဆင့်ကို ပြောသည်။

“နောင်ချိုကိုတော့ နေ့တိုင်းလိုလို လေယာဉ်နဲ့ လာဝဲတယ်။ ဗုံးလည်း မကြာခဏ လာကြဲနေတာ၊ Y12 လေယာဉ်နဲ့ လာတယ်။ အဆိပ်ငွေ့ဗုံးတွေနဲ့ပါ လာကြဲတာ။ လက်နက်ကြီးနဲ့လည်း ခဏခဏ ထုနေတာ။ထိခိုက်မှုကတော့ မရှိဘူးလို့သိရတယ်”ဟု အဆိုပါ DPLAတပ်သားတစ်ဦးက ပြောသည်။

ထို့အပြင် စစ်ကောင်စီတပ်သည် လက်လွှတ်ထားရသည့် နောင်ချိုမြို့ကို ပြန်လည်ထိန်းချုပ်ရန် အပြင်းအထန် ထိုးစစ်ဆင်နေပြီး ယခုချိန်ထိ တိုက်ပွဲပြင်းထန်စွာ ဖြစ်ပွားနေသည်ဟု သိရသည်။

ဆက်လက်ပြီး စစ်ကောင်စီဗုံးကြဲခံရသည့် သဖန်းကုန်းကျေးရွာနှင့် ကျောက်ကြမ်းကျေးရွာတွင် ဒေသခံ အနည်းငယ်သာကျန်ရှိပြီး အများစုမှာ စစ်ဘေးတိမ်းရှောင် ထွက်ပြေးနေရသည်ဟု သိရသည်။

“တစ်ရွာလုံးပေါင်းမှ အယောက်( ၂၀ )ကျော်ပဲ ကျန်မယ်ထင်တယ်။ တချို့က ပြေးစရာမရှိလို့ ကျန်နေတာ၊ တစ်ချို့ကလည်း အိမ်စောင့်အနေနဲ့ ကျန်တယ်။မလုံခြုံပေမဲ့လည်း သူတို့မှာ ပြေးစရာမရှိတော့ နေနေရတာပေါ့။ အဲ့ဘက်ရွာတွေက ဖုန်းလိုင်းလည်း မရတော့ဘူး။ သူတို့ကိုလည်း စိတ်ပူ၊ ကိုယ့်ကိုယ်ကိုလည်း ဂရုစိုက်ပြီး နေကြရတာပေါ့”ဟု DPLA တပ်သားတစ်ဦးက ပြောသည်။

ပြီးခဲ့သည့် ဧပြီလ (၂၇)ရက်တွင်လည်း စစ်ကောင်စီတပ်မှ နောင်ချိုမြို့နယ် သစ်စက်ကျေးရွာကို လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် အမျိုးသမီးနှစ်ဦး ထိခိုက်ဒဏ်ရာ ရရှိသွားခဲ့သည်ဟုသိရသည်။

ဧပြီလ (၃၀)ရက်အထိ စစ်ကောင်စီဘက်မှ အပစ်ခတ်ရပ်ထားရန် သက်တမ်းတိုးထားသော်လည်း တော်လှန်ရေးအင်အားစု ထိန်းချုပ်ထားသည့် နယ်မြေများကို နေ့စဉ်နီးပါး ဗုံးကြဲတိုက်ခိုက်ခြင်း၊ အဆိပ်ငွေ့ဗုံးဖြင့် တိုက်ခိုက်ခြင်းများ ပြုလုပ်နေသည်။