ထိုင်းနိုင်ငံအတွင်း မှတ်ပုံတင်ထားသည့် နိုင်ငံခြားသား ၇၀၀,၀၀၀ ကျော်၏ ဖုန်းနံပတ်နှင့် ဘဏ်အကောင့်များကို စုံစမ်းစစ်ဆေးမည်ဖြစ်ကြောင်း ထိုင်းနိုင်ငံ၏ ဒစ်ဂျစ်တယ် ငွေကြေးနှင့် လူအဖွဲ့အစည်းဌာန (DES) ဝန်ကြီးမှ ပြောဆိုထားကြောင်း Bangkok Post သတင်းဌာနတွင် ဖော်ပြထားသည်။

DES ၀န်ကြီး Prasert Jantararauangtong က ၂၀၂၂ ခုနှစ် ဇန်နဝါရီ ၁ ရက်မှ စ၍ ဖုန်းနံပါတ် မှတ်ပုံတင်ခြင်းကို စတင်လုပ်ဆောင်ခဲ့ကြောင်းပြောသည်။ ထိုသို့ မှတ်ပုံတင် စာရင်းသွင်းရာတွင် နိုင်ငံခြားသား ၇၀၀,၀၀၀ ကျော်၏ဖုန်းနံပါတ်များပါဝင်ပြီး မှတ်ပုံတင်ထားခြင်းမရှိသည့် ဖုန်းနံပါတ် ၁.၈ သန်းကျော်ကို စုံစမ်းစစ်ဆေးသွားမည့်အကြောင်း ပြောကြားသည်။

ထိုင်းအစိုးရမှ နည်းပညာဆိုင်ရာ ရာဇဝတ်မှုများကို တားဆီးနိုင်ရန်အတွက် ဖုန်းနံပတ်များနှင့်ချိတ်ဆက်ထားသည့် ဘဏ်အကောင့်များကိုပါ စာရင်းသွင်းထားသူများ၏ အမည်နှင့်တူညီမှုရှိမရှိ စစ်ဆေးသွားမည်ဖြစ်သည်။ မှတ်ပုံတင်ထားခြင်းမရှိသော ဖုန်းနံပါတ်များဖြင့် စာရင်းဖွင့်ထားသည့် ဘဏ်အကောင့်များကို ပိတ်သိမ်းသွားမည့်အကြောင်း ပြောကြားထားသည်။

ထိုကြောင့် ဖုန်းနံပါတ်နှင့် ဘဏ်အကောင့် ချိတ်ဆက်အသုံးပြုသူများအနေဖြင့် လာမည့် ဧပြီလ (၃၀) ရက်နေ့နောက်ဆုံးထားပြီး ထုတ်ပြန်ထားသော စည်းကမ်းချက်များအတိုင်း လိုက်နာ ဆောင်ရွက်သွားရန် လိုအပ်သည်။
ထိုသို့ လိုက်နာဆောင်ရွက်ခြင်းမရှိပါဘဲ မှတ်ပုံမတင်ထားသော ဖုန်းနံပါတ်များဖြင့် ဖွင့်လှစ်ထားသော မိုဘိုင်းလ် ဘဏ်အကောင့်များသည် ဇွန်လတွင် စတင်ပိတ်သိမ်းခံရမည်ဖြစ်သည်။

သက်ဆိုင်ရာ ဘဏ်လုပ်ငန်းများကိုလည်း မှတ်ပုံတင်ထားသည့် ဖုန်းနံပါတ်များဖြင့် ဘဏ်အကောင့် ဖွင့်လှစ်ထားခြင်း ရှိ၊ မရှိအား စစ်ဆေးပြီး ဧပြီလ (၃၀) ရက်နေ့နောက်ဆုံးထား၍ အကြောင်းကြား ညှိနှိုင်းဆောင်ရွက်ထားရန်လည်း တောင်းဆိုထားသည်။

ဘဏ်မှ အကြောင်းကြား စာမရရှိသူများအနေဖြင့် ပြဿနာတစ်စုံတစ်ရာမရှိဘဲ ဘဏ်လုပ်ငန်းဝန်ဆောင်မှုများကို ဆက်လက်အသုံးပြုသွားနိုင်ကြောင်း DES ဝန်ကြီး Mr. Prasert က ပြောကြားထားသည်။