သျှမ်းပြည် အင်းလေးဒေသတွင် ငလျင်လှုပ်ခတ်ပြီးနောက် မြေအနေအထား ပြောင်းသွားခြင်းကြောင့် အိမ်ပြန်ဆောက်ရန် အခက်တွေ့နေကြကြောင်း သတင်းရရှိသည်။
စစ်ကိုင်းမြို့အနီး ဗဟိုပြုလှုပ်ခတ်ခဲ့သော အင်အား ၇.၇ ရစ်ချ်တာစကေးရှိ အင်အားပြင်း ငလျင်ကြီးကြောင့် သျှမ်းပြည် အင်းလေးဒေသအတွင်း နေအိမ်များစွာပြိုကျ ပျက်စီးခဲ့ရသည်။
ထိုပြိုကျပျက်စီးသွားသည့် နေအိမ်များကို ဖြိုဖျက်ပြီး လက်ရှိတွင် ဝါးအိမ်များကို အစားထိုး ပြန်လည်တည်ဆောက်နေကြသည်။
ထိုငလျင်လှုပ်ခက်ခဲ့သည့်အတွက်ကြောင့် မြေအနေအထား ပြောင်းလဲသွားပြီး အင်းလေးဒေသရှိ ဟန်ချိုကျေးရွာ၊ ကေလာကျေးရွာနှင့် ဇရပ်ကြီးကျေးရွာ စသည့် ရွာများတွင် အိမ်ပြန်ဆောက်ရန် အခက်တွေ့နေကြကြောင်း အင်းလေးဒေသခံ အမျိုးသားတစ်ဦးက ပြောသည်။
“ပြိုတဲ့ အိမ်တွေ၊ ယိုင်နေတဲ့ အိမ်တွေကို ဖျက်ပြီးတော့ ပြန်ဆောက်နေကြတယ်။ တချို့အိမ်တွေကြတော့ အရင်က အိမ်တိုင်ကို မြေအနက် ၁၀ ပေ ဝန်းကျင်လောက် စိုက်နိုင်ရင် အဆင်ပြေတယ်။ အခုကြတော့ ၁၅ ပေ ကနေ ၁၈ ပေလောက်ထိုးစိုက်မှအဆင်ပြေတယ်။ မြေအနေအထား ပြောင်းသွားတာပေါ့”ဟု ၎င်းအင်းလေးဒေသခံ အမျိုးသားက သျှမ်းသံတော်ဆင့်ကို ပြောသည်။
ငလျင်လှုပ်ခတ်ပြီးနောက် ယိုင်စောင်းနေသည့် အိမ်များကို ပြန်တည့်မှတ်ရာတွင်လည်း မြေအနေအထားပြောင်းလဲမှုကြောင့် အချို့အိမ်၏ အိမ်တိုင်ခြေရှိ မြေများ ပျော့ပြောင်းကုန်ကြောင်း အသက် ၂၀ ဝန်းကျင် အမျိုးသားတစ်ဦးက ထပ်လောင်းပြောသည်။
“အိမ်ကို ချိန်းဘလောက်တွေနဲ့ ဆွဲထောင်လိုက်ပြီးရင် ပြန်နိမ့်ကျသွားတာမျိုးတော့ ပိုအဖြစ်များတယ်။ ရေထဲကယိုင်စောင်းသွားတဲ့ အိမ်တွေတော့ အိမ်တိုင်ခြေရင်းမှာ မြေပျော့ကုန်တာ ပိုများတယ်။ အိမ်တိုင်း တော့မဖြစ်ဘူး၊ နေရာတချို့တွေဖြစ်တာ”ဟု ၎င်းကပြောသည်။
အင်းလေးဒေသရှိ ကျေးရွာများသည် ရေနိမ့်ပိုင်း ရေမြင့်ပိုင်းများ မတူသည့်အပြင် မြေဆီလွှာ အနေအထား ကွဲပြားမှုကြောင့် အချို့နေရာတွင် အိမ်တိုင်းပြန်လည်ဆောက်လုပ်ရန် ပြဿနာများကြုံတွေ့ နေကြကြောင်း အင်းလေးဒေသခံများက ပြောသည်။
အင်းလေးဒေသရှိ ကျေးရွာများတွင် ငလျင်ဒဏ်ကြောင့် လူနေအိမ် (၂,၅၀၀) ကျော် ထိခိုက်ပျက်စီးခဲ့ပြီး ထိုအထဲမှ အိမ်ခြေ (၁,၃၀၀) ကျော်မှာ လူနေထိုင်၍ မရအောင် လုံးဝ ပျက်စီးသွားခဲ့သည်။
လက်ရှိတွင် အင်းလေးဒေသခံများသည် ပြန်လည်ထူထောင်ရေးအတွက် ငွေရေးကြေးရေး အခက်အခဲ ဖြစ်နေကြကြောင်း သိရသည်။
မတ်လ ၂၈ ရက်တွင် စစ်ကိုင်းမြို့အနီး ဗဟိုပြုလှုပ်ခတ်ခဲ့သော အင်အား ၇.၇ ရစ်ချ်တာစကေးရှိ အင်အားပြင်း ငလျင်ကြီးကြောင့် မြန်မာနိုင်ငံတဝှမ်း ပြည်သူ (၄,၂၁၂) ဦးထက်မနည်း သေဆုံးခဲ့ပြီး (၆,၅၈၈) ဦးကျော် ဒဏ်ရာရရှိခဲ့သည်။
Leave a Comments