သျှမ်းပြည် အ‌ရှေ့ပိုင်းမှ ကုန်ပစ္စည်းတင်ဆောင်လာသော ကုန်တင်ကားကြီးရာချီကို စစ်ကောင်စီက ဟိုပုံးမြို့တွင် ဖမ်းဆီးထိန်းသိမ်းထားကြောင်း သတင်းရရှိသည်။

ပြီးခဲ့သည့် ဧပြီလ ၂၃ ရက်မှစတင်ပြီး သျှမ်းပြည် အရှေ့ပိုင်းမှ ကုန်ပစ္စည်းတင် တင်ဆောင်လာသော ကုန်တင်ကားရာနှင့်ချီကို စစ်ကောင်စီမှ အခွန်ကိစ္စ အကြောင်းကာ ဟိုပုံးမြို့ရှိ တပ်မတော် ကွန်ပျူတာ နှင့် နည်းပညာသိပ္ပံကျောင်းဝန်းအတွင်း ဖမ်းဆီးထိန်းသိမ်းထားကြောင်း သတင်းရင်းမြစ်တစ်ဦး က သျှမ်းသံတော်ဆင့်ကို ပြောသည်။

“အဲ့ကားတွေက တာချီလိတ်ဘက်ကနေ ကုန်ပစ္စည်းလာတဲ့ကားတွေ။အဲ့ကားတွေကို သူတို့အုန်နာ (ကားပိုင်ရှင်) နဲ့ ဆက်သွယ်ပြီး ငွေနည်းနည်းပါးပါး ခုပေးနိုင်ရင်လွှတ်ပါတယ်။ ကားတွေကများတာပေါ့ ရာနဲ့ချီ သူတို့တခြား နေရာတွေမှာလည်းခွဲ ထားထားတာမျိုးရှိတယ်။ကျနော် မြင်တယ် သိတယ် အကုန်တော့ လည်းမပြောနိုင်ဘူး။ပြန်လွှတ်သွားတဲ့ကားတွေလည်းရှိပါတယ် စစ်သားတွေ ထွေအုပ်တွေနဲ့ သူတို့အချင်းချင်းစကားပြောတဲ့ ပေါ်မူတည်တယ်။”ဟု ၎င်းကပြောသည်။

သျှမ်းပြည် အရှေ့ပိုင်းမှ တင်ဆောင်လာသည့် ထိုင်းနိုင်ငံထုတ်ကုန်ပစ္စည်းအချို့ကြောင့် စစ်ကောင်စီက ဖမ်းဆီးစစ်ဆေးမှုများပြုလုပ်ပြီး ထိန်းသိမ်းထားခြင်းဖြစ်ကြောင် အသက် ၄၀ ဝန်းကျင် ကားသမားတစ်ဦးက ထပ်မံလောင်းပြောသည်။

“ကျနော်တို့ကတော့ နေ့တိုင်းသွားလာနေတာဆိုတော့ လမ်းဘေးမှာ ကုန်တင်ကြီးတွေရပ်ထားတယ် ဆိုတာကိုလည်း မြင်နေရတယ်။ တပ်ထဲမှာထားထားတယ်ဆိုတာလည် သိရတယ်။ တာချီလိတ် ဘက်ကနေ ကုန်တင်လာတဲ့ကားတွေဆိုတာလည်းဟုတ်တယ်။သူတို့ဒီထိုင်းကပစ္စည်းတွေကြောင့် အခွန်ကိစ္စနဲ့ ဖမ်းထားတာဖြစ်ဖို့များတယ်။”ဟု အသက် ၄၀ ဝန်းကျင် ကားသမားတစ်ဦးက ပြောသည်။

လက်ရှိ ဖမ်းဆီမှုများရှိနေသည့်အတွက်ကြောင့် သျှမ်းပြည် အရှေ့ပိုင်းမှ သျှမ်းပြည် တောင်ပိုင်း သို့လာမည့် ကုန်တင်ကြီးအချို့လည်း ရပ်ထားကြကြောင်းသိရသည်။

သျှမ်းပြည် တောင်ပိုင်း နှင့် အ‌ရှေ့ပိုင်းရှိ စစ်ကောင်စီလက်အောက်ခံ စစ်ဆေးရေးဂိတ်များတွင် ၂၀၂၅ နှစ်ဆန်းပိုင်းမှ စတင်၍ ခရီးသည်တင်ယာဉ် ၊ ကုန်တင်တွဲကားကြီး၊ငယ်များကို စစ်ဆေးတင်ကြပ်မှုများ ပိုပြုလုပ်လာကြောင်း ကားသမားများကပြောဆိုလိုက်သည်။