သျှမ်းပြည် လောက်ကိုင်မြို့သို့ အလုပ်လုပ်ရန် ရောက်ရှိနေသူများထဲ နေထိုင်ခွင့်ကတ် ပြုလုပ်ခြင်းမရှိသူများကို MNDAA မှ ဖမ်းဆီးကာ လားရှိုးမြို့ဘက်သို့ ပြန်လည်ပို့ဆောင်ကြောင်း စုံစမ်းသိရသည်။

ဧပြီလဆန်းပိုင်းမှ စတင်ပြီး ကိုးကန့်တပ်ဖွဲ့ MNDAA ထိန်းချုပ် လောက်ကိုင်မြို့သို့ အလုပ်လုပ်ရန် သွားရောက်သူများကို လောက်ကိုင်မြို့နေ အိမ်ရှင် သို့မဟုတ် အလုပ်ရှင် ထောက်ခံချက် ပါမှသာ ဝင်ခွင့်ပြုပြီး ယခင်က ရောက်ရှိနေသူများထဲ နေထိုင်ခွင့်ကတ် ပြုလုပ်ခြင်းမရှိသူများကို MNDAA မှ ဖမ်းဆီးကာ လားရှိုးမြို့ဘက်သို့ ပြန်လည်ပို့ဆောင်နေကြောင်း ဒေသခံများက ပြောသည်။

“စာအုပ်လုပ်ရမယ်ဆိုတာ ကိုးကန့်က မူဝါဒ ချထားတာ။ နေထိုင်ခွင့် ၃ လ၊ ၆ လ၊ တစ်နှစ် အဲ့လိုမျိုး လုပ်ရတယ်။ မလုပ်တဲ့လူ ဖမ်းပြီးတော့ လားရှိုးဘက် ပြန်ပို့တယ်။ တုံချိန်ဘက်က သူတို့ရုံးမှာ သွားလုပ်ရတယ်။ သူတို့ထိန်းချုပ်တဲ့ နယ်မြေထဲကလူဆို စာအုပ်မလုပ်ရဘူး၊ တခြားနေရာက လာတဲ့လူမှန်သမျှ လူမျိုးတိုင်း အကုန်လုပ်ရတယ်”ဟု လောက်ကိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယာယီနေထိုင်ခွင့်စာအုပ်ကို MNDAA ထံ သွားရောက်ပြုလုပ်ပါက ၃ လ၊ ၆ လ နှင့် တစ်နှစ်စာ နေထိုင်ခွင့်အတွက် တရုတ်ယွမ်ငွေ ၁၈၀၊ ၂၇၀ နှင့် ၃၉၀ (မြန်မာကျပ်ငွေ ကာလပေါက်ဈေး တစ်သိန်းကျော်မှ နှစ်သိန်းခွဲခန့်) အသီးသီး ပေးဆောင်ရကြောင်း လောက်ကိုင်မြို့ရောက် ရွှေ့ပြောင်းအလုပ်သမားများထံမှ သိရသည်။

အလားတူ ယာယီနေထိုင်ခွင့်စာအုပ် ပြုလုပ်ရန် မှတ်ပုံတင်နှင့် အိမ်ထောင်စုစာရင်း လိုအပ်ပြီး လောက်ကိုင်မြို့နေ အိမ်ရှင် သို့မဟုတ် အလုပ်ရှင် ထောက်ခံချက် ပါရှိမှသာ ပြုလုပ်ပေးကြောင်း ဒေသခံများက ပြောဆိုသည်။

“မှတ်ပုံတင်လိုတယ်၊ အဓိက လောက်ကိုင်က အိမ်ရှင် ဒါမှမဟုတ် အလုပ်ရှင် အာမခံပေးဖို့လိုတယ်။ လောက်ကိုင်ဇာတိ မဟုတ်တဲ့လူလည်း မရဘူး၊ လောက်ကိုင်ကလူ အာမခံပေးမှပဲ ရတယ်။ စဖမ်းတာတော့ သင်္ကြန်မတိုင်ခင် ဧပြီလဆန်းက၊ ဖမ်းကြမ်းလို့လည်း အခု ဝိုင်းအုံပြီး လုပ်နေကြတာ”ဟု လောက်ကိုင်ဒေသခံ ၎င်းအမျိုးသားက ဆက်ပြောသည်။

လောက်ကိုင်မြို့တွင် ယာယီနေထိုင်ခွင့်စာအုပ်ကို MNDAA မှ ၂၀၂၅ နှစ်ဆန်းပိုင်းကတည်းက စတင်လုပ်ပေးခဲ့ပြီး အချို့မှာ ထပ်မံသက်တမ်းတိုးကာ အလုပ်လုပ်နေကြကြောင်း သိရသည်။

MNDAA ထိန်းချုပ်ထားသည့် ပန်ဆိုင်း၊ မုံးကိုး၊ ဖောင်းဆိုင်၊ ကုန်းကြမ်း၊ ကွမ်းလုံ၊ သိန္နီနှင့် ချင်းရွှေဟော်တို့မှာ ဒေသခံများမှာ လောက်ကိုင်မြို့သို့ ဝင်ရောက်လိုပါက ယာယီနေထိုင်ခွင့်စာအုပ် ပြုလုပ်ရန် မလိုဘဲ စစ်ဆေးရေးဂိတ်တွင် မှတ်ပုံတင်ပြသရန် လိုအပ်ကြောင်း ဒေသခံများက ပြောသည်။

တရုတ်၏ ကြားဝင်စေ့စပ်မှုကြောင့် စစ်ကောင်စီနှင့် MNDAA တို့အကြား တရားဝင် အပစ်အခတ် ရပ်စဲရေး သဘောတူနိုင်ခဲ့သည့် ဇန်နဝါရီလ နောက်ပိုင်းမှ စတင်ပြီး လောက်ကိုင်မြို့တွင် တရုတ်လျှပ်စစ်မီး ပြန်လည်ရရှိခဲ့သည်။

၎င်းနောက် MNDAA ၏ လောက်ကိုင်မြို့ အုပ်ချုပ်ရေးကော်မတီမှ မြို့ပြန်လည်တည်ဆောက်ရေး လုပ်ငန်းများကို အရှိန်မြှင့်တင်လာပြီး မြို့အင်္ဂါရပ်နှင့် ပြည့်စုံစေရန် အိမ်နံပါတ် အသစ်များ၊ လမ်းညွှန်ဆိုင်းဘုတ်များကို မြန်မာ-တရုတ် နှစ်ဘာသာ ပြန်ဆို၍ ပြန်လည်ပြုပြင် တပ်ဆင်သွားမည်ဟု သိရသည်။