သျှမ်းပြည်တောင်ပိုင်း၊ တောင်ကြီးမြို့ရှိ အိုးရှင်း‌ကုန်တိုက် အနီးပတ်ဝန်းကျင် ငလျင်အပြီး စည်ပင်မှ ဈေးသည်များကိုပြန်လည်ရောင်းချခွင့် ပြုခဲ့သော်လည်း အမိုးအကာများဖြင့် ဈေးရောင်းခွင့်မပြုခဲ့ကြောင်း သတင်းရရှိသည်။

အိုးရှင်း ကုန်တိုက် အနီးပတ်ဝန်းကျင်ဖြစ်သည့် အရှေ့နှင့် လမ်းကြားများရှိ ဈေးဆိုင်များကို ငလျင်အပြီး ဧပြီလ ၃ရက်မှစ၍ ဈေးပြန်ဖွင့်ခဲ့သည်။

သို့သော် ထိုဈေးဆိုင်များကို ထီးဖွင့်ရောင်းချခွင့်မရသောကြောင့် ဟင်းသီးဟင်းရွက် ကုန်စိမ်းရောင်းသည့် ဈေးသည်များနှင့် အသားငါးရောင်းသည့် ဈေးသည်များ အဆင်မပြေမှုများနှင့် ကြုံနေရသည်ဟု ဈေးသည်များထံမှ သိရသည်။

“ဒီလောက်နေပူတာကို ထီးလုံးဝပေးမဖွင့်ဘူးတဲ့။ ဒီမှာ အသီးအရွက် တွေ နေပူတော့ အကုန်ပျက်စီးကုန်တာ။အသားငါးဆိုလည်း နံလို့ အဆင်မပြေဘူး။ရေခဲသေတ္တာထဲ ထည့်လဲ နေကပူတော့ ရေခဲတွေ အရည်ပျော်ကုန်တာ။ တစ်နေ့လုပ် တစ်နေ့စား ရတော့ အဆင်မပြေဘူး။နေပူတော့ ထီးလေးတော့ ပေးဖွင့်သင့်တယ်။” ဟု ဈေးသည် အမျိုးသားတစ်ဦးက ပြောသည်။

ထိုကဲ့သို့ ထီးပေးမဖွင့်သည်မှာ စစ်ခေါင်းဆောင် မင်းအောင်လှိုင်မှ တောင်ကြီးသို့မကြာခဏ လာရောက်လေ့ ရှိသောကြောင့် လမ်းကြောင်းရှင်း၍ မျက်စိမရှုပ်စေလိုသဖြင့် စည်ပင်မှ ထီးဖွင့်ရောင်းချခွင့် မပေးခဲ့ခြင်း ဖြစ်သည်ဟု ၎င်းအမျိုးသားက ထပ်လောင်းပြောသည်။

ထို့အပြင် ကုန်စိမ်းရောင်းသည့် ဈေးသည်များသည် ထိုနေရာ၌ ဈေးရောင်းလာသည်မှာ ဆယ်စုနှစ် တစ်ခုရှိပြီဖြစ်ပြီး ယခုကဲ့သို့ နေပူထဲ ဈေးရောင်းရသောကြောင့် ကုန်စိမ်းများပျက်စီးကာ အမြတ်မကျန်တော့ကြောင်း အမျိုးသမီးတစ်ဦးက ပြောသည်။

“ကုန်စိမ်းဆိုတဲ့အတိုင်းပဲ အရိပ်ရမှ နေပူမမိမှ အရွက်တွေက လှတာ။သူများဝယ်ချင်တာ။ခုတော့ နေပူကြဲထဲမှာဆိုတော့ အကုန်ညိုးနွမ်းပြီး ခြောက်ကုန်တာ။သူများလည်း မလိုချင်တော့ဘူးလေ။ဝယ်တဲ့ သူလည်း မရှိဘူး။ သူများလည်းမဝယ် ဆိုတော့ ခြောက်တဲ့ဟာဆို ပစ်လိုက်ရတယ်။တစ်နေ့လုံးမှ ၂သောင်းလောက်ရရင်တောင် ကံကောင်းလို့ပဲ။” ဟု အဆိုပါ အမျိုးသမီးတစ်ဦးက ပြောသည်။

ထိုဈေးသည် အိုးရှင်းဘေး၌ တစ်နေ့လုံးရောင်းချနေသည့် ဈေးဖြစ်ပြီး ကုန်စိမ်းရောင်းဝယ်သူများသည် ငွေကျပ်(၁သိန်း)ကျော်ရင်း၍ ရောင်းချရပြီး နေပူသောကြောင့် အရင်းမကျန်သည်အထိ ဖြစ်နေကြသည်ဟု သိရသည်။

ယခုလက်ရှိတောင်ကြီးတွင် ဧပြီလ (၂၃)ရက်နေ့မှ စ၍ အိုးရှင်းကုန်တိုက် ပြန်လည်ဖွင့်လှစ်ခဲ့ပြီး ဈေးဆိုင်အချို့သာပြန်ဖွင့်သေးကြောင်း သိရသည်။