သျှမ်းပြည် လားရှိုးမြို့သို့ စစ်ကောင်စီနှင့် MNDAA နှစ်ဘက်ပူးတွဲ ဖိတ်ခေါ်မှုကြောင့် ပစ်ခတ်ရပ်စဲမှုစောင့်ကြည့်ရေးအဖွဲ့ကို စေလွှတ်ခဲ့ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Guo Jiakun က ပြောကြားလိုက်သည်။

ယမန်နေ့ (ဧပြီလ ၂၂ ရက်) တွင် တရုတ်နိုင်ငံခြားရေးဝန်ကြီးဌာနမှ ပုံမှန်သတင်းစာရှင်းလင်းပွဲ ပြုလုပ်ခဲ့ပြီး သတင်းထောက်တစ်ဦးမှ ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ကို စစ်ကောင်စီထံ လွှဲပြောင်းအပ်နှံရေး တရုတ်ဘက်မှ ပစ်ခတ်ရပ်စဲမှုစောင့်ကြည့်ရေးအဖွဲ့ စေလွှတ်ခဲ့သည့် အခြေအနေကို မေးမြန်းစဉ် တရုတ်နိုင်ငံခြားရေး ပြောရေးဆိုခွင့်ရှိသူက ယင်းသို့ ထည့်သွင်းဖြေကြားခဲ့သည်။

တရုတ်၏ ကြားဝင်စေ့စပ်မှုဖြင့် ကူမင်း ငြိမ်းချမ်းရေး တွေ့ဆုံဆွေးနွေးပွဲတွင် စစ်ကောင်စီနှင့် ကိုးကန့်တပ်ဖွဲ့ MNDAA တို့၏ သဘောတူညီချက်များကို အကောင်အထည်ဖော်ရန် နှစ်ဘက်ပူးတွဲ ဖိတ်ကြားချက်အရ ပစ်ခတ်ရပ်စဲမှုစောင့်ကြည့်ရေးအဖွဲ့ကို လားရှိုးမြို့သို့ စေလွှတ်ခဲ့ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Guo Jiakun က ဝန်ခံပြောဆိုသည်။

ထို့အပြင် ကိုးကန့်တပ်ဖွဲ့ MNDAA ထိန်းချုပ်ခဲ့သည့် လားရှိုးမြို့ကို စစ်ကောင်စီထံ လွှဲပြောင်းပေးအပ်ခြင်းကို မျက်မြင်သက်သေခံသွားမည်ဖြစ်ပြီး စစ်ကောင်စီနှင့် MNDAA နှစ်ဘက်အကြား ပစ်ခတ်ရပ်စဲရေးကို စောင့်ကြည့်သွားမည်ဟု ၎င်းက ဆိုသည်။

သို့သော် တရုတ်၏ အာရှရေးရာ အထူးကိုယ်စားလှယ် မစ္စတာ တိန့်ရှီကျွင်း ကိုယ်တိုင် MNDAA ထိန်းချုပ်ခဲ့သည့် လားရှိုးမြို့သို့ ရောက်လာပြီး စစ်ကောင်စီထံ ပြန်လည်လွှဲပြောင်းရေး ကြီးကြပ်ဆောင်ရွက်ခဲ့မှု အခြေအနေကို ထုတ်ဖော်ပြောဆိုခဲ့ခြင်း မရှိပေ။

ပြီးခဲ့သည့် ဧပြီလ ၁၉ ရက်မှ စတင်၍ မြန်မာ-တရုတ်နယ်စပ် ‘ဝ’တပ်ဖွဲ့ UWSA ထိန်းချုပ် နမ့်တစ်မြို့မှတဆင့် ဝင်ရောက်လာသည့် တရုတ်၏ ပစ်ခတ်ရပ်စဲမှု စောင့်ကြည့်ရေးအဖွဲ့သည် ကားအစီးရေ (၃၀) ပါ ယာဉ်တန်းဖြင့် လားရှိုးမြို့ပေါ် ရောက်ရှိလာခဲ့သည်။

အလားတူ တရုတ်စေလွှတ်ထားသည့် ပစ်ခတ်ရပ်စဲမှု စောင့်ကြည့်ရေးအဖွဲ့သည် လားရှိုးမြို့မှ ပြန်လည်ထွက်ခွာသွားခြင်း မရှိသေးဘဲ မည်သည့်အချိန်ထိ စောင့်ကြည့်သွားမည်ဟူသည့် အချိန်ကာလ သတ်မှတ်ချက်လည်း မသိရှိရကြောင်း ဒေသခံများက ပြောဆိုသည်။

တရုတ်နိုင်ငံက မြန်မာနိုင်ငံ မြောက်ပိုင်းဒေသ စစ်ပွဲရပ်တန့်ရန် ဆွေးနွေးပွဲများ ဆက်လက်လုပ်ဆောင်မည်ဖြစ်ပြီး မြန်မာနိုင်ငံမှ ဘက်အသီးသီးနှင့်အတူ မြန်မာ-တရုတ်နယ်စပ် ငြိမ်းချမ်းရေးနှင့် တည်ငြိမ်ရေးကို ပူးပေါင်းဆောင်ရွက်သွားမည်ဟု တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ပြောဆိုခဲ့ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်သည်။

ယမန်နေ့က စစ်ကောင်စီ၊ MNDAA နှင့် တရုတ်ကိုယ်စားလှယ်များ သုံးပွင့်ဆိုင် ဆွေးနွေးမှုရလဒ်အဖြစ် စစ်ကောင်စီ၏ အရှေ့မြောက် တိုင်းစစ်ဌာနချုပ် (ရမခ) မှ စစ်ကား အစီးရေ (၂၀၀) ကျော်သည် လက်နက်အင်အား အပြည့်အစုံဖြင့် လားရှိုးမြို့ပေါ်သို့ ပြန်လည်တပ်စွဲခဲ့ပြီး နေရာပြန်လည်ချထားရေး လုပ်ဆောင်နေသည်။

လားရှိုးမြို့ပေါ်မှ ကိုးကန့်တပ် MNDAA တပ်ဆုတ်ခွာရပြီး တရုတ်အကူအညီဖြင့် စစ်ကောင်စီတပ် ပြန်လည်ခြေချခွင့် ရရှိခဲ့သော်လည်း နှစ်ဘက်စလုံးမှ တရားဝင် ထုတ်ဖော်ပြောကြားခြင်း မရှိသေးဘဲ တရုတ်နိုင်ငံခြားရေးဝန်ကြီးဌာန တစ်ခုသာ ထုတ်ဖော်ပြောကြားနေခြင်း ဖြစ်သည်။