အာဆီယံအလှည့်ကျဥက္ကဋ္ဌ တာဝန်ယူထားသည့် မလေးရှားနိုင်ငံ ဝန်ကြီးချုပ်နှင့် အမျိုးသားညီညွတ်ရေးအစိုးရ NUG ပြည်ထောင်စုဝန်ကြီးချုပ်တို့ အွန်လိုင်းမှတဆင့် မိနစ် (၄၀) ကြာ တွေ့ဆုံဆွေးနွေးခဲ့ကြောင်း သတင်းသိရသည်။

ယနေ့ (ဧပြီလ ၁၈ ရက်) နံနက်ပိုင်းတွင် မလေးရှားဝန်ကြီးချုပ် အန်ဝါ အီဘရာဟင် နှင့် NUG ပြည်ထောင်စုဝန်ကြီးချုပ် မန်းဝင်းခိုင်သန်း တို့ Teleconference မှတဆင့် တွေ့ဆုံဆွေးနွေးခဲ့စဉ် လူသားချင်း စာနာထောက်ထားမှုဆိုင်ရာ အကူအညီများ ပေးပို့ဖြန့်ဝေနိုင်ရေး ကိစ္စရပ်များကို ဆွေးနွေးခဲ့ကြကြောင်း NUG နိုင်ငံခြားရေးဝန်ကြီးဌာနမှ သတင်းထုတ်ပြန်သည်။

NUG ပြည်ထောင်စုဝန်ကြီးချုပ် မန်းဝင်းခိုင်သန်းမှ မလေးရှားဝန်ကြီးချုပ်နှင့် တွေ့ဆုံစဉ်အတွင်း မလေးရှားနိုင်ငံ၌ လူကိုယ်တိုင်တွေ့ဆုံနိုင်မည့် သင့်လျော်သည့် အချိန် အလားအလာကို ပွင့်လင်းစွာ ဆွေးနွေးခဲ့ကြောင်း မလေးရှားဝန်ကြီးချုပ်က ၎င်း၏ လူမှုကွန်ယက်တွင် ရေးသားထားသည်။

အာဆီယံအလှည့်ကျဥက္ကဋ္ဌ အနေဖြင့် အမျိုးသားညီညွတ်ရေးအစိုးရ NUG နှင့် စစ်ကောင်စီတို့ကို ထိတွေ့ဆက်ဆံနေသည့်အပေါ် နှစ်ဘက်စလုံးမှ ကန့်ကွက်ခြင်း မရှိဘဲ ယုံကြည်မှုတည်ဆောက်ရေးအတွက် အာဆီယံ ဦးဆောင်သည့် ကြိုးပမ်းမှုအဖြစ် ဆက်လက်တည်ရှိရန် အရေးကြီးကြောင်းလည်း ဆိုထားသည်။

အလားတူ ယမန်နေ့ (ဧပြီလ ၁၇ ရက်)တွင် အာဆီယံအလှည့်ကျဥက္ကဋ္ဌ၊ ထိုင်းဝန်ကြီးချုပ်ဟောင်း သက်ဆင်နှင့် စစ်ခေါင်းဆောင်တို့ ဘန်ကောက်မြို့၌ လူကိုယ်တိုင် သုံးပွင့်ဆိုင် တွေ့ဆုံဆွေးနွေးခဲ့စဉ် မြန်မာနိုင်ငံ ငလျင်ဘေးဒဏ်မှ ပြန်လည်ထူထောင်ရေးကို အာဆီယံမှ ကူညီဆောင်ရွက်ရေး၊ မြန်မာ – အာဆီယံ အသိုက်အဝန်း ပူးပေါင်းဆောင်ရွက်ရေးကိစ္စများကို ဆွေးနွေးခဲ့ကြကြောင်း စစ်ကောင်စီဘက်မှ သတင်းထုတ်ပြန်သည်။