သျှမ်းပြည် ကျေးသီးမြို့ အဝင်အထွက်တွင် စစ်ကောင်စီလက်အောက်ခံ ရဲတပ်ဖွဲ့မှ စစ်ဆေးမှုတင်းကြပ်ပြီး ငွေညှစ်တောင်းခံနေကြောင်း စုံစမ်းသိရသည်။
ဧပြီလ ပထမပတ်မှ စတင်၍ ကျေးသီးမြို့ စစ်ကောင်စီလက်အောက်ခံရဲတပ်ဖွဲ့ဝင်များက မြို့အဝင်အထွက်တွင် သွားလာနေသည့် ကားများ၏ လိုင်စင်နှင့်
ယာဉ်မောင်းလိုင်စင်များကို စစ်ဆေးမှုများ ပြုလုပ်၍ ငွေညှစ်တောင်းခံမှုများ ပြုလုပ်နေကြောင်း ကိုယ်တိုင်ကြုံတွေ့ခဲ့သည့် ကားသမားတစ်ဦးက သျှမ်းသံတော်ဆင့်ကို ပြောသည်။
“ကျေးသီးအဝင် ညောင်ပင်ကြီးနားမှာ ရဲတွေ စစ်နေတာပါ၊ အဖွဲ့စုံ မဟုတ်ဘူး ရဲတွေပဲ။ ကားလိုင်စင်နဲ့ ယာဉ်မောင်းလိုင်စင် စောင့်ပြီးစစ်တာ ကားတိုင်းပဲ။ သင်္ကြန်ဝင်ပြီဆိုတော့ငွေရှာတာ နေမှာပါ၊ လုပ်စားတာနေမှာပေါ့။ ယာဉ်လိုင်စင်တို့ ယာဉ်မောင်းလိုင်စင်တို့က မော်တော်ပီကယ်နဲ့ပဲ ဆိုင်တာလေ” ဟု ကိုယ်တိုင်ကြုံတွေ့ခဲ့သည့် ကားသမားတစ်ဦးက ပြောသည်။
ကျေးသီးမြို့ အဝင်အထွက်တွင် သွားလာနေသော ကားများကို စစ်ဆေးနေသည့် စစ်ကောင်စီလက်အောက်ခံ ရဲတပ်ဖွဲ့ဝင်များကို ကားတစ်စီးလျှင် ၅ သောင်းကျပ် မှ ၁ သိန်းကျပ်အထိ တောင်းခံနေကြောင်း ၎င်းက ဆက်ပြောသည်။
ကျေးသီးမြို့နယ်တွင် အရှေ့အလယ်ပိုင်း တိုင်းစစ်ဌာနချုပ် (ရလခ) လက်အောက်ခံ ခြေလျင်တပ်ရင်း ခလရ-၁၃၁၊ မိုင်းနောင်မြို့တွင် စစ်ဆင်ရေးကွပ်ကဲမှုဌာနချုပ် စကခ-၂ ၊ ခလရ-၉ နှင့် ခလရ-၂၈၆ တပ်ရင်းတို့အပြင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ဝမ်ဟိုင်းဌာနချုပ်လည်း အခြေစိုက်ထားသည်။
Leave a Comments