ရာဂီမုန်တိုင်းကြောင့် ပြီးခဲ့သည့် ယမန်နှစ်က ရေးဘေးဒဏ်သင့်ခဲ့သော သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသသည် ယခုတစ်ခါတွင် အင်အားပြင်း မြေငလျင် လှုပ်ခတ်မှုကြောင့် ထောင်ချီ နေအိမ်၊ အဆောက်အဦများ ပျက်စီးဆုံးရှုံးခဲ့ပြီး သေဆုံးသူ တစ်ရာကျော်ထိရှိကြောင်း စုံစမ်းသိရသည်။

မတ်လ ၂၈ ရက်နေ့က မန္တလေးမြို့အနီးကို ဗဟိုပြု၍ လှုပ်ခတ်ခဲ့သော ရစ်ချ်တာစကေး ၇ ဒဿမ ၇ အဆင့်ရှိ အလွန်ပြင်းထန်သည့် မြေငလျင်နှင့် နောက်ဆက်တွဲ မြေငလျင်ငယ်များကြောင့် မန္တလေးတိုင်း၊ စစ်ကိုင်းတိုင်း၊ ပဲခူးတိုင်း၊ နေပြည်တော်နှင့် သျှမ်းပြည် အင်းလေး၊ အောင်ပန်း စသည့် နေရာများတွင် ဆိုးရွားစွာပျက်စီးခဲ့သည်။

အင်းလေးဒေသတွင် ရွာပေါင်း ၄၀၀ ကျော်ရှိသည့်အနက် ငလျင်ကြောင့် ကျေးရွာ ၂၀ ကျော်မှ အိမ်ခြေ စုစုပေါင်း ၂,၀၀၀ ကျော်ပျက်စီးဆုံးရှုံးခဲ့ရပြီး လူ ၁၀၀ ကျော် သေဆုံးခဲ့ကြောင်း ဒေသခံများထံမှ သိရသည်။

“အခက်ခဲတွေတော့ အများကြီးရှိတာပေါ့၊ အဓိက အင်းလေးမှာ ခရီးချဉ်သီးစိုက်ကြတယ်၊ အခုက ခရမ်းချဉ်သီး ရာသီဆိုတော့ သီးနှံတွေလည်း ပျက်တယ်၊ အိမ်တွေလည်း ပျက်တယ်၊ လူတွေလည်း သေတယ်၊ နေစရာ နေရာတွေကလည်း မရှိတော့ ဘယ်တစ်ခုကို အရင်စလုပ်ရမှာလည်း တွေဝေနေကြတယ်” ဟု အင်းလေးဒေသခံ တစ်ဦးက ပြောသည်။

မြေငလျင် လှုပ်ခတ်မှုကြောင့် ပျက်စီးဆုံးရှုံးမှုများစွာနှင့် ပြည်သူများ သောကရောက်နေချိန် ယမန်နေ့ မတ်လ ၅ ရက် ညနေပိုင်းတွင် အင်းလေးဒေသ အရှေ့ဘက်ခြမ်း မိုင်းသောက်ကျေးရွာရှိ Myanmar Treasure Resort သည်လည်း တောမီးမှတစ်ဆင့် မီးလောင်ကျွမ်းခဲ့ပြီး တစ်ညလုံးမီးငြိမ်းသက်နိုင်ခြင်း မရှိခဲ့ပေ။

“အခုတော့ လာကူညီနေတဲ့သူတွေ ရှိပါတယ်၊ အစာခြောက်တွေ၊ ရေသန့်တွေ လာဝေတဲ့သူတွေကော ရှိတယ်၊ ဒါပေမဲ့ အစားအသောက်တွေကြီးပဲ လာကူညီလို့လေ တချို့နေရာတွေဆိုလည်း ပိုလို့လျှံလို့ ဖြစ်နေပြီ၊ ဒီမှာ အိမ်ပျက်သွားလို့ နေစရာမရှိတဲ့သူတွေလည်း အများကြီးပဲ၊ တချို့ဆိုရင် ဘုန်းကြီးကျောင်းမှာ လိုက်နေရတယ်၊ ဖြစ်နိုင်ရင်တော့ ပြန်လည်ထူထောင်ရေးအတွက် ကူညီပေးချင်တယ်လို့ ပြောပါတယ်” ဟု ငလျင်ဒဏ်သင့် အင်းလေးဒေသခံများကို သွားရောက်ကူညီပေးနေသူ အမျိုးသမီးတစ်ဦးက ပြောသည်။

ငလျင်ဒဏ်သင့် အင်းလေးဒေသမှ ဒေသခံများနှင့်နည်းတူ တိုက်ပွဲကြောင့် အင်းလေးဒေသတွင် လာရောက် ခိုလှုံနေသော သျှမ်းပြည်တောင်ပိုင်းနှင့် ကရင်နီ (ကယား) ပြည်မှ စစ်ဘေးရှောင်များလည်း အကူညီလိုအပ်နေကြောင်း ဆိုသည်။

အင်အားပြင်း မြေငလျင် လှုပ်ခတ်မှုကြောင့် နိုင်ငံတစ်ဝှမ်း သေဆုံးသူ ၃,၁၄၅ ဦး၊ ဒဏ်ရာရသူ ၄,၅၈၉ ဦးနှင့် ပျောက်ဆုံးနေသူ ၂၂၁ ဦးရှိကြောင်း စစ်ကောင်စီက ယနေ့ ဧပြီလ ၄ ရက် နံနက်ပိုင်းတွင် ထုတ်ပြန်ထားသည်။