ထိုင်းနိုင်ငံ ဘန်ကောက်မြို့တွင် ကျင်းပနေသည့် ဘင်းမ်စတက် ထိပ်သီးအစည်းအဝေးသို့ စစ်ခေါင်းဆောင် မင်းအောင်လှိုင်အား တက်ရောက်ရန် ထိုင်းဝန်ကြီးချုပ်မှ ဖိတ်ကြားခဲ့ခြင်းကိစ္စ ဖြေရှင်းပေးရန် ထိုင်းလွှတ်တော်အမတ် ကန်နာဝီက တောင်းဆိုလိုက်သည်။

ယနေ့ (ဧပြီလ ၃ ရက်) တွင် ကျင်းပသည့် ထိုင်းအောက်လွှတ်တော် အစည်းအဝေးအတွင်း စစ်ခေါင်းဆောင် မင်းအောင်လှိုင်အား ဘင်းမ်စတက် BIMSTEC ထိပ်သီးအစည်းအဝေးသို့ တက်ရောက်ရန် ထိုင်းဝန်ကြီးချုပ် ပေထုန်တန် ရှင်နာဝပ်မှ ဖြေရှင်းချက်ပေးရန် ထိုင်းလွှတ်တော်အမတ် ကန်နာဝီက တောင်းဆိုခဲ့ခြင်း ဖြစ်သည်။

ထိုင်းနိုင်ငံ ဒုဝန်ကြီးချုပ်နှင့် ကာကွယ်ရေးဝန်ကြီးဖြစ်သူ Phumtham Wechayachai အား ထိုင်းသတင်းထောက်များမှ စစ်ခေါင်းဆောင် မင်းအောင်လှိုင်ကို ဘင်းမ်စတက် ထိပ်သီးအစည်းအဝေး တက်ရောက်ရန် ဖိတ်ကြားသည့်ကိစ္စ မေးမြန်းရာ နိုင်ငံခြားရေးဝန်ကြီးဌာနသို့ မေးမြန်းရန် တုံ့ပြန်ပြောဆိုခဲ့သည်။

ဘန်ကောက်မြို့တွင် ပြုလုပ်သည့် ၆ ကြိမ်မြောက် BIMSTEC အစည်းအဝေးသည် စစ်အာဏာသိမ်း ၄ နှစ်ကျော်ကာလတွင် ဒေသတွင်းအဆင့် ထိပ်သီးအစည်းအဝေးတစ်ခုသို့ နိုင်ငံတကာနှင့် စစ်အာဏာရှင် ဆန့်ကျင်ရေးအဖွဲ့များ တားမြစ်ကန့်ကွက်နေသည့်ကြားက စစ်ခေါင်းဆောင် မင်းအောင်လှိုင် တက်ရောက်ခွင့် ရနေခြင်းဖြစ်သည်။

စစ်ခေါင်းဆောင် မင်းအောင်လှိုင်သည် ဧပြီလ (၃) ရက်နှင့် (၄) ရက်နေ့တို့တွင် ကျင်းပပြုလုပ်မည့် ဘင်းမ်စတက် အစည်းအဝေးများကို တက်ရောက်ရန် ယနေ့ မွန်းလွဲပိုင်း (၂) နာရီတွင် မြန်မာနိုင်ငံမှ ဘန်ကောက်မြို့သို့ ထွက်ခွာသွားပြီဖြစ်ကြောင်း သိရသည်။

ယနေ့ နံနက်ပိုင်းတွင် ကျင်းပခဲ့သည့် ဘင်းမ်စတက် နိုင်ငံခြားရေးဝန်ကြီး အစည်းအဝေးတွင် စစ်ကောင်စီခန့် နိုင်ငံခြားရေးဝန်ကြီး ဦးသန်းဆွေ တက်ရောက်ခဲ့ပြီး မြန်မာနိုင်ငံ ငလျင်ဘေးနှင့် ပတ်သက်၍ ဝမ်းနည်းခြင်း အထိမ်းအမှတ်အဖြစ် တစ်မိနစ် ငြိမ်သက်ခဲ့ကြသည်။

ဘင်းမ်စတက် BIMSTEC ထိပ်သီးအစည်းအဝေး ကာလအတွင်း စစ်ခေါင်းဆောင် မင်းအောင်လှိုင်မှ အခြားသော နိုင်ငံခေါင်းဆောင်များနှင့်လည်း တွေ့ဆုံဆွေးနွေးမည်ဖြစ်ပြီး မြန်မာနိုင်ငံတွင် ငလျင်ဒဏ်ကြောင့် ဖြစ်ပေါ်ကြုံတွေ့နေရသည့် အခြေအနေ၊ ကူညီကယ်ဆယ်ရေး၊ ပြန်လည်ထူထောင်ရေး လုပ်ငန်းများတွင် နိုင်ငံတကာနှင့် ပူးပေါင်းဆောင်ရွက်နိုင်ရန် ဆွေးနွေးသွားမည်ဖြစ်ကြောင်း MRTV သတင်းတွင် ယမန်နေ့ ည ၈ နာရီသတင်းတွင် ဖော်ပြသည်။

ဘန်ကောက်မြို့တွင် ကျင်းပမည့် ဘင်းမ်စတက် ထိပ်သီးအစည်းအဝေးသို့ စစ်ခေါင်းဆောင် မင်းအောင်လှိုင်အား ဖိတ်ကြားသည့် ဆုံးဖြတ်ကို ပြင်းပြင်းထန်ထန် ကန့်ကွက်ရှုတ်ချကြောင်း လူ့အခွင့်အရေးဆိုင်ရာ အာဆီယံလွှတ်တော်အမတ်များအဖွဲ့ APHR မှ ဧပြီလ ၁ ရက်တွင် ထုတ်ပြန်ခဲ့သည်။

အလားတူ Defend Myanmar Democracy အပါအဝင် မြန်မာနိုင်ငံမှ စစ်အာဏာရှင် ဆန့်ကျင်ရေး ၃၁၉ ဖွဲ့က စစ်ခေါင်းဆောင် မင်းအောင်လှိုင်အား ဘင်းမ်စတက် ထိပ်သီးအစည်းအဝေးနှင့် ဆက်စပ်အစည်းအဝေးများသို့ တက်ရောက်ခွင့်မပြုရန် ထိုင်းအစိုးရအား မတ်လ (၃၀) ရက်တွင် တောင်းဆိုထားသည်။