သျှမ်းပြည် နောင်ချိုမြို့နယ်တွင် တအာင်း(ပလောင်) အမျိုးသားလွတ်မြောက်ရေး တပ်မတော် TNLA မှ ဖုန်းအသုံးပြုသူများကို တွေ့ရှိပါက ဒဏ်ငွေ ၁၀ သိန်းနှင့် ထောင် ၂ နှစ် ချမှတ်မည်ဟု စာဖြင့် သတိပေးထားကြောင်း စုံစမ်းသိရသည်။

မတ်လ နောက်ဆုံးပတ်မှ စတင်ပြီး TNLA ထိန်းချုပ်ထားသည့် နောင်ချိုမြို့ပေါ်နှင့် အနီးတဝိုက် ကျေးရွာများရှိ ဓာတ်တိုင်နှင့် အုတ်နံရံများတွင် အနီရောင်နောက်ခံ စာရွက်များဖြင့် ဖုန်းအသုံးပြုလျှင် တွေ့ရှိပါက ဒဏ်ငွေ ၁၀ သိန်းနှင့် ထောင်ဒဏ် ၂ နှစ် ချမှတ်မည်ဟု သတိပေးထားပြီး စစ်ဆေးတင်းကြပ်မှုများ ရှိနေကြောင်း ဒေသခံများက ပြောသည်။

“ကျောက်ကြမ်းဘက်မှာ ဖုန်းလိုင်းရှိတယ်၊ ဒါပေမယ့် အခု ဖုန်းသွားမပြောရဲကြတော့ဘူး။ TNLA တွေက ဖုန်းသုံးတဲ့လူတွေ့ရင် ဒဏ်ငွေ ၁၀ သိန်းနဲ့ ထောင်ဒဏ် ၂ နှစ်ချမယ်လို့ စာရွက်အနီရောင်နဲ့ လိုက်ကပ်ထားတာ။ အဲ့မှာတင် မကဘူး၊ မြို့ထဲက ဓာတ်တိုင်နဲ့ အုတ်တံတိုင်းတွေမှာလည်း အဲ့လို လိုက်ကပ်ထားတယ်။ အခု မြို့ထဲမှာ ဖုန်းမသုံးရဲတော့ဘူး”ဟု နောင်ချိုမြို့တွင် ကျန်ရှိနေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့နှင့် ၄ မိုင်ကျော် ကွာဝေးသည့် ကျောက်ကြမ်းကျေးရွာ အနီးတဝိုက်တွင် ဖုန်းလိုင်းရှိခြင်းကြောင့် ဒေသခံများ သွားရောက်ဆက်သွယ်လေ့ရှိရာ လက်ရှိတွင် TNLA ဘက်မှ ၎င်းနေရာသို့ သတိပေးစာ လာရောက်ကပ်ထားကြောင်း ဒေသခံများထံမှ သိရသည်။

နောင်ချိုမြို့နယ်တွင် TNLA မှ ဖုန်းအသုံးပြုလျှင် ဒဏ်ငွေနှင့် ထောင်ဒဏ် ချမှတ်မည်ဆိုသည့် သတိပေးစာနှင့် ပတ်သက်၍ အတည်ပြုနိုင်ရန် သျှမ်းသံတော်ဆင့်မှ TNLA သတင်းနှင့် ပြန်ကြားရေးတာဝန်ခံ လွေးယေဦးထံသို့ စာပို့ မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

ပြီးခဲ့သည့် မတ်လ (၁၆) ရက်တွင် နောင်ချိုမြို့ တောင်ရပ်ကွက်ရှိ စိန်ရတနာ ပရိယတ္တိ စာသင်တိုက်ကို စစ်ကောင်စီတပ်မှ လေကြောင်းဗုံးကြဲ တိုက်ခိုက်ခံရခြင်းသည် ဖုန်းလိုင်း ခေတ္တပြန်ဖွင့်ပြီးနောက် ဖြစ်ပွားခဲ့ကာ စစ်ကောင်စီထံ သတင်းပေးမှုကြောင့် ဖြစ်နိုင်ကြောင်း ဒေသခံများက သုံးသပ်ပြောဆိုကြသည်။

ထို့နောက် TNLA ဘက်မှ လေကြောင်းအန္တရာယ် စိုးရိမ်မှုကို အကြောင်းပြပြီး ဖုန်းအသုံးပြုခွင့်ကို စစ်ဆေးတင်းကြပ်လိုက်ခြင်းကြောင့် မြို့ပေါ်မှ ပြည်သူများလည်း အခြားဒေသရှိ Starlink စတားလင့် အင်တာနက် အသုံးပြုနိုင်မည့် နေရာများသို့ စိုးရိမ်စိတ်ဖြင့် ခက်ခက်ခဲခဲ သွားလာနေရကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

“တော်တော်များများ မြို့ပြင်ထွက်ပြီး ဖုန်းပြောနေရတယ်။ တချို့လည်း ဆိုင်ကယ်နဲ့ ဘေးဆိုက်တွဲလေးနဲ့ သွားကြတော့ လမ်းမှာ စိတ်ပူရတယ်။ တချို့ဆို လိုင်းရတဲ့ နေရာကနေ နိုင်ငံခြားက သားသမီးနဲ့ ဖုန်းပြောပြီး ပိုက်ဆံသွားထုတ်တာ အဲ့တာလည်း လုံခြုံရေး စိုးရိမ်ရတယ်။ အခု လမ်းသွားလမ်းလာဆိုရင် ဖုန်းမထုတ်ရဲကြတော့ဘူး။ စစ်ဆေးနေတာတော့ ရှိပြီ၊ ဖမ်းဆီးထောင်ချတာ မရှိသေးဘူး”ဟု နောင်ချိုမြို့နယ်မှ လူငယ်တစ်ဦးက ပြောသည်။

အလားတူ ဖေဖော်ဝါရီလ ပထမပတ်တွင်လည်း TNLA ထိန်းချုပ်ထားသည့် သီပေါမြို့နယ်တွင် တားမြစ်ထားသည့်ကြားက ဖုန်းပြောဆို ဆက်သွယ်သည်ဟုဆိုကာ စံဖိတ်ကျေးရွာရှိ ဒေသခံ အရွယ်စုံ (၄၀) ကျော်ကို ဖုန်းနှင့်အတူ နေအိမ်၊ လမ်းမကြီးတလျှောက်တွင် TNLA တပ်သားများက ဖမ်းဆီးခဲ့ကြောင်း ဒေသခံများက သျှမ်းသံတော်ဆင့်ကို ပြောဆိုသော်လည်း မဟုတ်မှန်ကြောင်း TNLA ဘက်မှ ပြန်လည်ငြင်းဆိုထားသည်။