ထိုင်းနိုင်ငံ၊ ဘန်ကောက်မြို့တွင် ကျင်းပပြုလုပ်မည့် ဘင်္ဂလားပင်လယ်အော် ဒေသတွင်းနိုင်ငံများ ( BIMSTEC ဘင်းမ်စတက်) အစည်းအဝေးသို့ စစ်ခေါင်းဆောင် မင်းအောင်လှိုင် တက်ရောက်မည်ဖြစ်ကြောင်း သတင်းသိရသည်။

ဧပြီလ (၃) ရက်နှင့် (၄) ရက်နေ့တွင် ကျင်းပမည့် ခြောက်ကြိမ်မြောက် ဘင်းမ်စတက် ထိပ်သီးအစည်းအဝေး၌ သဘာပတိအဖြစ် ဆောင်ရွက်မည့် ထိုင်းဝန်ကြီးချုပ် ပေထုန်တန် ရှင်နာဝပ်၏ ဖိတ်ကြားချက်အရ စစ်ခေါင်းဆောင် မင်းအောင်လှိုင် ကိုယ်တိုင် တက်ရောက်မည်ဖြစ်ကြောင်း စစ်ကောင်စီထိန်းချုပ် MRTV မှ ယမန်နေ့ ည ၈ နာရီသတင်းတွင် ကြေညာသည်။

စစ်အာဏာသိမ်းပြီးနောက်ပိုင်း စစ်ခေါင်းဆောင်၏ ပထမဆုံး ထိုင်းနိုင်ငံ ခရီးစဉ်အတွင်း ဧပြီလ (၃) ရက်နှင့် (၄) ရက်နေ့တို့တွင် ကျင်းပပြုလုပ်မည့် ဘင်းမ်စတက် အစည်းအဝေးများကို တက်ရောက်သွားမည်ဖြစ်ကာ အခြားသော နိုင်ငံခေါင်းဆောင်များနှင့်လည်း တွေ့ဆုံဆွေးနွေးမည်ဟု စစ်ကောင်စီထုတ်ပြန်ချက်တွင် ပြောဆိုထားသည်။

ထို့အပြင် မြန်မာနိုင်ငံတွင် ငလျင်ဒဏ်ကြောင့် ဖြစ်ပေါ်ကြုံတွေ့နေရသည့် အခြေအနေ၊ ကူညီကယ်ဆယ်ရေး အခြေအနေ၊ ပြန်လည်ထူထောင်ရေး လုပ်ငန်းများတွင် နိုင်ငံတကာနှင့် ပူးပေါင်းဆောင်ရွက်နိုင်ရန် ဆွေးနွေးသွားမည်ဖြစ်ကြောင်း MRTV သတင်းတွင် ဖော်ပြသည်။

ယနေ့ (ဧပြီလ ၃ ရက်) နံနက်ပိုင်းတွင် စစ်ခေါင်းဆောင် မင်းအောင်လှိုင်သည် ဘင်းမ်စတက် အစည်းအဝေး တက်ရောက်ရန် စစ်ကောင်စီတပ်၏ အထူးလေယာဉ်ဖြင့် နေပြည်တော်မှ ဘန်ကောက်မြို့သို့ ထွက်ခွာမည်ဖြစ်ကြောင်း ခေတ်သစ်သတင်းဌာနမှ ရေးသားထားသည်။

ဘန်ကောက်မြို့တွင် ကျင်းပမည့် ဘင်းမ်စတက် ထိပ်သီးအစည်းအဝေးသို့ စစ်ခေါင်းဆောင် မင်းအောင်လှိုင်အား ဖိတ်ကြားသည့် ဆုံးဖြတ်ကို ပြင်းပြင်းထန်ထန် ကန့်ကွက်ရှုတ်ချကြောင်း လူ့အခွင့်အရေးဆိုင်ရာ အာဆီယံလွှတ်တော်အမတ်များအဖွဲ့ APHR မှ ဧပြီလ ၁ ရက်တွင် ထုတ်ပြန်ခဲ့သည်။

အလားတူ Defend Myanmar Democracy အပါအဝင် မြန်မာနိုင်ငံမှ စစ်အာဏာရှင် ဆန့်ကျင်ရေး ၃၁၉ ဖွဲ့က စစ်ခေါင်းဆောင် မင်းအောင်လှိုင်အား ဘင်းမ်စတက် ထိပ်သီးအစည်းအဝေးနှင့် ဆက်စပ်အစည်းအဝေးများသို့ တက်ရောက်ခွင့်မပြုရန် ထိုင်းအစိုးရအား မတ်လ (၃၀) ရက်တွင် တောင်းဆိုထားသည်။

ယမန်နှစ် ဇူလိုင်လအတွင်း စစ်ကောင်စီက လေးကြိမ်မြောက် ဘင်းမ်စတက် အမျိုးသားလုံခြုံရေးဆိုင်ရာ အကြီးအကဲများ အစည်းအဝေးကို အိမ်ရှင်အဖြစ် လက်ခံကျင်းပခဲ့ပြီး အဖွဲ့ဝင်နိုင်ငံများမှ ကိုယ်စားလှယ်များနှင့် ဘင်းမ်စတက်အတွင်းရေးမှူးချုပ်တို့သည် စစ်ခေါင်းဆောင် မင်းအောင်လှိုင်နှင့်လည်း တွေ့ဆုံခဲ့ကြသည်။

ဘင်္ဂလားပင်လယ်အော် ဒေသတွင်းနိုင်ငံများအဖွဲ့ ( BIMSTEC ဘင်းမ်စတက်) ကို ဘင်္ဂလားဒေ့ရှ်၊ အိန္ဒိယ၊ မြန်မာ၊ သီရိလင်္ကာ၊ ထိုင်း၊ ဘူတန်နှင့် နီပေါ (၇) နိုင်ငံတို့ဖြင့် ၁၉၉၇ ခုနှစ်တွင် စတင်ဖွဲ့စည်းခဲ့သည်။