ငလျင်လှုပ်ခတ်ခဲ့သည့်နေ့မှ ယနေ့အထိ ၆ ရက်အတွင်း နောင်ချိုမြို့နယ်ထဲကို စစ်ကောင်စီမှဂျက်ဖိုက်တာ နှင့်ဒရုန်း ဖြင့် ၅ ကြိမ်ဗုံးကြဲ တိုက်ခိုက် သည့်အတွက် ပြည်သူ့အိုးအိမ်စည်းစိမ်များပျက်စီးဆုံးရှုံးမှုများရှိနေ သည်ဟု နောင်ချို ဒေသခံ များထံမှသိရသည်။

လူပေါင်းထောင်ချီအသက်ဆုံးရှုံးစေခဲ့သော စစ်ကိုင်းငလျင်စတင်လှုပ်ခတ်ခဲ့သည့် မတ်လ ၂၈ ရက်နေ့မှ ယနေ့ ဧပြီလ ၂ ရက်နေ့အထိ စစ်ကောင်စီက နောင်ချိုမြို့နယ် ကံကြီးကျေးရွာအုပ်စု နောင်လင်ကျေးရွာ ကို မတ်လ ၂၈ ရက်တွင်ဂျက်ဖိုက်တာဖြင့်တစ်ကြိမ်၊ လုံရုံးကျေးရွာအုပ်စု ကျောက်ကြမ်းကျေးရွာကို မတ်လ ၃၁ ရက်နေ့တွင် ဒရုန်းဖြင့်တစ်ကြိမ် ၊ ရေမောင်းတန်းကျေးရွာကို ဧပြီလ ၁ ရက်နေ့တွင် ဒရုန်းဖြင့်တစ်ကြိမ်၊ ဆမ္မဆယ် – အုမ္မတီး ကျေးရွာကြားရှိ ကျေးရွာဘက်ကို ဧပြီလ ၁ ရက်နေ့တွင် ဒရုန်းနှင့်တစ်ကြိမ်၊ ဂျက်ဖိုက်တာနှင့်တစ်ကြိမ် ဆက်တိုက် တိုက်ခိုက်ခဲ့သည်။

‘’ဒီနေ့တော့ အုမ္မတီးလမ်းခွဲ ရေမောင်းတန်းရွာကိုဒရုန်းနဲ့ဗုံးလာကြဲသွားတာ။ အိမ်တွေလဲမီးလောင်တယ်၊ ၄ အိမ် ၅ အိမ်လောက်လောင်တာ၊ ရွာထဲမှာလဲနေထိုင်တဲ့လူမရှိတော့ ထိခိုက်ဒဏ်ရာရ တဲ့လူလည်းမရှိဘူး အိမ်တွေ တော့မီးလောင်တာတွေရှိတာပေါ့ ’’ ဟု‌နောင်ချိုဒေသခံပြည်သူတစ်ဦးက သျှမ်းသံတော်ဆင့် သို့ပြောသည်။

အလားတူပင် ဧပြီလ ၁ ရက်နေ့ နံနက် ၁၁ နာရီဝန်းကျင်တွင် စစ်ကောင်စီမှ နောက်ချိုမြို့ အနောက်တောင်ဘက် ၁၉ မိုင်ခန့်အကွာ ဆမ္မဆယ်နှင့်အုမ္မတီးကြားရှိ ကျေးရွာကို ဒရုန်းဖြင့် တစ်ကြိမ်၊ ဂျက်ဖိုက်တာဖြင့်တစ်ကြိမ် စုစုပေါင်းနှစ်ကြိမ် တိုက်ခိုက်ပြီး ဒေသခံပြည်သူ ၅ ဦးဒဏ်ရာရပြီးနှင့်နေအိမ် ၂ လုံးထိမှန်ပျက်စီးခဲ့သည်ဟု TNLA ဘက်မှထုတ်ပြန် ထားသည်။

စစ်ကိုင်းမန္တလေးနေပြည်တော်တွင်ဒေသခံများငလျင်ဒဏ်ခံနေရချိန် သျှမ်းပြည်မြောက်ပိုင်းနောင်ချိုမြို့နယ် အုမ္မတီး၊ အုမ္မခါး၊ ရေမောင်းတန်း၊ ဆမ္မဆယ်နှင့်သုံးဆယ် အစရှိသည့်ကျေးရွာဘက်စစ်ကောင်စီဗုံးကြဲတိုက်ခိုက်မှု ကြောင့် ဒေသခံများရွာထဲမနေရဲဘဲ ဘေးလွတ်ရာသို့တိမ်းရှောင်ခိုလှုံနေကြရသည်။

နောင်ချိုမြို့သည် “၁၀၂၇ စစ်ဆင်ရေး” ဒုတိလှိုင်း ဇူလိုင်လ ၁၀ ရက်တွင် TNLA ထိန်းချုပ်မှုအောက်သို့ရောက်ရှိ ခဲ့ပြီး စစ်ကောင်စီဘက်မှ အကြိမ်ပေါင်းမြောက်မြားစွာ လေကြောင်းတိုက်ခိုက်မှုပြုလုပ်ခဲ့သည်။ လွန်ခဲ့သည့် ဖေဖော်ဝါရီလ ၁၆ နှင့် ၁၇ ရက်စစ်ကောင်စီနှင့် TNLA တို့ တရုတ်နိုင်ငံကူမင်းမြို့တွင်တွေ့ဆုံစဉ် TNLA ထိန်းချုပ် နယ်မြေအတွင်း လေကြောင်းတိုက်ခိုက်မှု မပြုလုပ်ရန် TNLA ဘက်မှ မေတ္တာရပ်ခံထားသည်။

အလုပ်သင် သတင်းထောက် စိုင်းဟန်မော(ဝ်) ရေးသားသည်။