မြန်မာနိုင်ငံတွင် စစ်တပ်အာဏာသိမ်းပြီးနောက် ကလေးသူငယ်များကို ထိခိုက်သေဆုံးစေသည့် လေကြောင်းတိုက်ခိုက်မှုပေါင်း အနည်းဆုံး ၆၄၀ ကြိမ်ထက်မနည်း ဖြစ်ပွားခဲ့ကြောင်း ကုလသမဂ္ဂ၏ မြန်မာနိုင်ငံဆိုင်ရာ စုံစမ်းစစ်ဆေးမှုယန္တရား (IIMM) က ယမန်နေ့ (မေလ ၁၂ ရက်) တွင် ထုတ်ပြန်လိုက်သည်။
စစ်ကိုင်းတိုင်းဒေသကြီး အိုးထိန်းကွင်းကျေးရွာရှိ စာသင်ကျောင်းတစ်ကျောင်းအား မြန်မာစစ်တပ်က ဗုံးကြဲတိုက်ခိုက်သဖြင့် ကျောင်းသား ၂၀ ကျော် အသက်ဆုံးရှုံးခဲ့ရသည့် ဖြစ်ရပ်တစ်နှစ်ပြည့်ချိန်တွင် အဆိုပါထုတ်ပြန်ချက်ကို ထုတ်ပြန်လာခြင်း ဖြစ်သည်။
အဆိုပါတိုက်ခိုက်မှုအပြီး တစ်နှစ်ကြာသည်အထိ မြန်မာနိုင်ငံရှိ ကလေးငယ်များသည် နေ့စဉ်နှင့်အမျှ လေကြောင်းအန္တရာယ်နှင့် ရင်ဆိုင်နေရဆဲ ဖြစ်ကြောင်း ထုတ်ပြန်ချက်တွင် ရေးသားဖော်ပြထားသည်။
ယခုလအစောပိုင်းတွင် ချင်းပြည်နယ်ရှိ ကျေးရွာတစ်ရွာတွင် ကလေးကစားကွင်းတစ်ခုကို လေကြောင်းမှ တိုက်ခိုက်ခဲ့ရာ အသက် ၅ လမှ ၁၀ နှစ်ကြားရှိ ကလေးငယ် အနည်းဆုံး ၅ ဦး သေဆုံးခဲ့ရကြောင်း သိရသည်။
လွန်ခဲ့သည့် တစ်နှစ်အတွင်း မန္တလေး၊ ပဲခူး၊ ရခိုင်၊ စစ်ကိုင်းနှင့် တနင်္သာရီတိုင်းတို့ရှိ စာသင်ကျောင်းများ၊ ခရစ်ယာန် ဘုရားခိုးကျောင်းများ၊ ဘုန်းကြီးကျောင်းများနှင့် စစ်ဘေးရှောင်စခန်းများကို လေကြောင်းမှ ပစ်မှတ်ထားတိုက်ခိုက်မှုများ ဆက်တိုက်ဖြစ်ပွားခဲ့ကြောင်း IIMM က ဆိုထားသည်။
“ကလေးငယ်တွေ ရှိနေနိုင်တဲ့နေရာတွေကို လေကြောင်းက တိုက်ရိုက်တိုက်ခိုက်တယ်လို့ ယူဆရတဲ့ ဖြစ်ရပ်တွေကို ယန္တရားက အထူးပြု စုံစမ်းစစ်ဆေးနေပါတယ်။ ဒီဖြစ်ရပ်တွေက စစ်ရာဇဝတ်မှု ဒါမှမဟုတ် လူသားမျိုးနွယ်ကို ကျူးလွန်တဲ့ ရာဇဝတ်မှုဖြစ်နိုင်ပါတယ်” ဟု IIMM ၏ အကြီးအကဲ နီကိုလတ်စ်ခွန်ဂျန်က ပြောကြားသည်။
IIMM အနေဖြင့် ကျူးလွန်သူများကို ဥပဒေကြောင်းအရ အရေးယူနိုင်ရန်အတွက် မြန်မာ့လေတပ်၏ ဖွဲ့စည်းပုံနှင့် အမိန့်ပေးကွင်းဆက်ဆိုင်ရာ ခိုင်မာသော အထောက်အထားများကို စုဆောင်းလျက်ရှိကြောင်း သိရသည်။
Leave a Comments