သျှမ်းပြည် ကျောက်မဲမြို့နယ် နောင်ပိန်တိုက်နယ်ထဲ စစ်ကော်မရှင်တပ်မှ လေကြောင်းဖြင့် ဗုံးကြဲတိုက်ခိုက်မှုဖြစ်စဉ်တွင် SSPP တပ်သားတစ်ဦးနှင့် အချုပ်သားတစ်ဦး သေဆုံးခဲ့ကြောင်း စုံစမ်းသိရသည်။

ဩဂုတ်လ (၂၀) ရက် နံနက်ပိုင်းတွင် TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေသည့် ကျောက်မဲမြို့နယ် နောင်ပိန်တိုက်နယ်အတွင်း ပင်တီးကျေးရွာ မဇ္ဈိမာရာမ အလယ်ကျောင်း လေကြောင်းဖြင့် ပေါင် ၅၀၀ ဗုံးတစ်လုံး တိုက်ခိုက်ခံရခြင်းကြောင့် နောင်ချိုစစ်ဘေးရှောင် (၄၀) ကျော် သေဆုံးဒဏ်ရာရခဲ့သည်။

တစ်ချိန်တည်းတွင် နောင်ပိန်တိုက်နယ်အတွင်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA တပ်စွဲထားသည့် လုပ်ပါရဲစခန်းအနီး ပေါင်(၅၀၀) ဗုံးတစ်လုံး တိုက်ခိုက်ခံရခြင်းကြောင့် SSPP တပ်သားတစ်ဦးနှင့် အချုပ်သားတစ်ဦး သေဆုံးခဲ့ကြောင်း ဖြစ်စဉ်သိရှိသူများက ပြောသည်။

“လုပ်ပါရဲစခန်းရှေ့ လမ်းကြားထဲ ကျတဲ့တစ်လုံးက ဗုံးစတွေ ရဲစခန်းထဲအထိ သွားစင်တယ်။ အဲ့မှာ သျှမ်းစစ်သားတွေ ဖမ်းထားတဲ့ အချုပ်သားတစ်ယောက်နဲ့ သူ့ကို စောင့်နေတဲ့ သျှမ်းစစ်သားတစ်ယောက် ပွဲချင်းပြီး ဆုံးသွားတယ်။ ပင်တီးက အလယ်ကျောင်းမှာလည်း အလောင်းတွေ ထပ်ဆွဲထုတ်တာ ၇ လောင်း ရတယ်”ဟု နောင်ပိန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ သေဆုံးသွားသည့် အချုပ်သားမှာ လွန်ခဲ့သည့် တစ်ပတ်ကျော်ခန့်က မူးယစ်ဆေးဝါး လက်ဝယ်တွေ့ရှိမှုဖြင့် SSPP ဘက်မှ လုပ်ပါရဲစခန်းတွင် ဖမ်းဆီးချုပ်နှောင်ထားသည့် အသက် (၃၀) ကျော်အရွယ် ကိုတွတ်ပီ ဆိုသူ ဖြစ်ကြောင်း ဒေသခံများက ပြောသည်။

လေကြောင်းတိုက်ခိုက်မှုအတွင်း SSPP တပ်သားတစ်ဦးနှင့် ၎င်းတို့ဖမ်းဆီးထားသည့် အချုပ်သားတစ်ဦး ဗုံးစထိမှန် သေဆုံးခဲ့မှုနှင့် ပတ်သက်၍ အတည်ပြုမေးမြန်းနိုင်ရန် သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံ ဖုန်းဖြင့် ဆက်သွယ်ခဲ့သော်လည်း ဖုန်းစက်ပိတ်ထားသည်။

လက်ရှိတွင် နောင်ပိန်လေကြောင်းတိုက်ခိုက်ခံရမှုအတွင်း ထိခိုက်ဒဏ်ရာရသူများကို လူမှုကူညီရေးအသင်းများမှ ကယ်ထုတ်ကာ လားရှိုး၊ ကွတ်ခိုင်နှင့် နမ့်လန်မြို့ဘက်သို့ အသီးသီး ပို့ဆောင်လျက်ရှိပြီး ဆေးကုသစရိတ်နှင့် စစ်ရှောင်များအတွက် အရေးပေါ် စားနပ်ရိက္ခာ အကူအညီများ လိုအပ်နေကြောင်း စစ်ရှောင်ကူညီသူများထံမှ သိရသည်။

TNLA ပူးပေါင်းတပ်နှင့် စစ်ကော်မရှင်တပ်တို့သည် နောင်ပိန်တိုက်နယ်အတွင်း တိုက်ပွဲဆက်လက် ပြင်းထန်နေပြီး လေယာဉ်ဖြင့် ဆက်တိုက်ဗုံးကြဲတိုက်ခိုက်လျက်ရှိကာ မကြာမီအချိန်တွင်း TNLA ထိန်းချုပ်ထားသည့် ကျောက်မဲမြို့သို့ စစ်မီးကူးစက်နိုင်ကြောင်း ဒေသခံများက ပြောဆိုသည်။

ပုံစာ – နောင်ပိန်လေကြောင်းတိုက်ခိုက်ခံရမှုအပြီး ဒဏ်ရာရစစ်ရှောင်များကို SSPP တပ်သားများ ကယ်ဆယ်ရေးလုပ်စဉ် (ဓာတ်ပုံ-ဒေသခံ)