စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) နှင့် စစ်ကောင်စီ တို့ တရုတ်နိုင်ငံ ကူးမင်းမြို့တွင် နယ်မြေသတ်မှတ်မှုကို ထည့်သွင်းဆွေးနွေးသဖြင့် အဆိုပါ ဆွေးနွေးမှုများမအောင်မြင်လျှင် လေကြောင်းတိုက်ခိုက်မှု ပိုဆိုးလာမည်ကို ပြည်သူများကစိုးရိမ်နေကြကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၁၇ ရက်နေ့) ည (၈)နာရီ ဝန်းကျင်တွင် TNLAထိန်းချုပ်ထားသည့် ကွတ်ခိုင်-နမ္မတူ ကြားကို စစ်ကောင်စီမှ လေယာဉ်ဖြင့် ဗုံးကြဲခဲ့ပြီး ဒေသခံများ စိုးရိမ်ထိတ်လန့်မှုရှိနေသည်ဟု ကွတ်ခိုင်ဒေသခံ အမျိုးသမီးတစ်ဦးက ပြောသည်။
“မနေ့ညတုန်းက အသံကြားလိုက်တယ်။ ဘယ်နေရာလဲတော့ အတိကျမသိဘူး။ တော်တော်လေးတော့ တုန်ခါသွားတယ်။ TNLAဖက်ကို ဖိအားပေးတာဖြစ်မယ်။ ကျမတို့ ဒေသခံ အတွက်ကတော့ စစ်ကောင်စီလေကြောင်းရန်က အမြဲတမ်းခြောက်ချား နေရတုန်းပဲ။ ဘယ် အချိန်လာကြဲမလဲ မသိဘူးလေ။ စိတ်ချယုံကြည်မှု မရသေးဘူး။” ဟု ၎င်းဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် (ဖေဖော်ဝါရီလ ၁၆)ရက်နေ့တွင် စစ်ကောင်စီနှင့် TNLAတို့ တရုတ်နိုင်ငံ ကူမင်းမြို့တွင် စစ်ရေးပဋိပက္ခများကို နိုင်ငံရေး နည်းလမ်းဖြင့် ဖြေရှင်းရန် ဆွေးနွေးမှု စတင်ခဲ့ကြသည်။
အဆိုပါ ဆွေးနွေးမှုတွင် TNLAဖက်မှ ၎င်းတို့သိမ်းပိုက်ထားသည့် မြို့ကြီး(၁၀)မြို့နှင့် မြို့နယ်ခွဲ(၆)ခုကို တအာင်းပြည်နယ်အဖြစ် တရားဝင်အသိမှတ် ပြုပေးစေလိုကြောင်း ဆွေးခဲ့ပြီး စစ်ကောင်စီနှင့် ဆွေးနွေးမှု အောင်မြင်မှုမရှိနိုင်ကြောင်း နိုင်ငံရေးလေ့လာ သုံးသပ်သူ ဦးသန်းစိုးနိုင်မှ သျှမ်းသံတော်ဆင့်ကို ပြောသည်။
“ကျနော်ကြားရသလောက်ကတော့ အခုဆွေးနွေးပွဲမှာတော့ TNLAက သူတို့ သိမ်းပိုက်ထားတဲ့ မြို့ကြီး (၁၀)မြို့နဲ့ မြို့နယ်ခွဲ (၆)ခုကို တအာင်းပြည်နယ် အဖြစ်အသိအမှတ် ပြုပေးဖို့ တောင်းဆိုတယ်။ စစ်ကောင်စီဘက်ကလည်း ၂၀၀၈ အခြေခံ ဥပဒေအရ ခရိုင်နှစ်ခု ပါဝင်တဲ့ ကိုယ်ပိုင်အုပ်ချုပ်ရေး တိုင်းအဖြစ်အသိမှတ်ပြုနိုင်မယ်။ကျန်တာတွေကတော့ လွှတ်တော်တွေ ပေါ်လာမှ ဖြေရှင်းနိုင်မယ်လို့ ပြောတယ်လို့ ဆိုတယ်။ အဲဒါတွေကတော့ မဖြစ်နိုင်တဲ့ အရာတွေပေါ့။မဖြစ်နိုင်တဲ့ အရာတွေလုပ်ပြီး ဆွေးနွေးပွဲက အောင်မြင်မှုမရနိုင်ဘူးလို့ မြင်မိတယ်။” ဟု ပြောသည်။
ထို့အပြင် တရုတ်ဘက်မှလည်း စစ်ကောင်စီကို လေကြောင်းတိုက်ခိုက်မှုများ မလုပ်ရန် ပြောဆိုထားသော်လည်း တားဆီးခြင်းမရှိခြင်းကြောင့် ဆွေးနွေးမှု မအောင်မြင်လျှင် လေကြောင်းတိုက်ခိုက်မှု ပိုဆိုးလာနိုင်ကြောင်း ဦးသန်းစိုးနိုင်က ပြောသည်။
ဆက်လက်ပြီး TNLAထိန်းချုပ်ထားသည့် နောင်ချိုမြို့နယ် ကျေးရွာ (၄)ရွာကို ပြီးခဲ့သည့် ဖေဖော်ဝါရီလ (၁၅) ရက်နေ့တွင် လေကြောင်းဖြင့် ဗုံးကြဲ တိုက်ခိုက်ခဲ့သောကြောင့် စာသင်ကျောင်း ထိခိုက်ပျက်စီးခဲ့ရသည်။
” တဖက်မှာလည်း ဆွေးနွေးကြ နောက်ဆွေးနွေးချိန်မှာတောင် လေကြောင်းပစ်နေတော့ သူတို့အဆင်မပြေရင် ပိုဆိုးဖို့ပဲရှိတယ်။ ဒီရက်တောင် လေကြောင်းဗုံးကြဲသံထွက်တော့ ကြောက်နေရတယ်” ဟု ကွတ်ခိုင်မြို့မှ ဒေသခံအမျိုးသမီးက ဆိုသည်။
အလားတူ ပြီးခဲ့သည့် ဖေဖော်ဝါရီလ(၁၀)ရက်နေ့ TNLA ထိန်းချုပ်နယ်မြေဖြစ်သည့် မိုးကုတ်မြို့ကို စစ်တပ်မှ လေကြောင်းအသုံးပြုတိုက်ခိုက်ခြင်းကြောင့် ဒေသခံ (၅)ဦးသေဆုံးပြီး (၁၉)ဦးထိခိုက်ဒဏ်ရာ ရရှိခဲ့သည်။
တအာင်း(ပလောင်) အမျိုးသားလွတ်မြောက်ရေးတပ်မတော် (TNLA)ထိန်းချုပ်ထားသည့် ဒေသများမှာ နမ့်ခမ်း၊ ကွတ်ခိုင်၊ နမ္မတူ၊ မိုင်းငေါ့၊ မိုင်းလုံ၊ နမ့်ဆန်၊ မန်တုံ၊ကျောက်မဲ၊ နောင်ချို၊မိုးမိတ်နှင့် သီပေါမြို့နယ်၊မန္တလေးတိုင်းမှ မိုးကုတ်မြို့နယ်တို့ ဖြစ်သည်။
ယခုလက်ရှိ သျှမ်းမြောက် ကွတ်ခိုင်မြို့နယ် အပါဝင် TNLAထိန်းချုပ်ထားသည့် မြိုနယ်များမှာ လေကြောင်းရန်ကို ကြောက်လန့်နေကြရသည်ဟု သိရသည်။
Leave a Comments