သျှမ်းပြည် သီပေါမြို့နယ်တွင် “၁၀၂၇ စစ်ဆင်ရေး”အတွင်း မြို့သိမ်းတိုက်ပွဲများကြောင့် ထိခိုက်ပျက်စီးသွားသော နေအိမ်များကို လူမှုကူညီရေးအဖွဲ့များက ဆက်လက်ကူညီ ထောက်ပံ့မည်ဖြစ်ကြောင်း စုံစမ်းသိရသည်။

လက်ရှိ သီပေါမြို့ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA က ထိန်းချုပ်ထားပြီး “၁၀၂၇ စစ်ဆင်ရေး”အတွင်း မြို့သိမ်းတိုက်ပွဲများကြောင့် ထိခိုက်ပျက်စီးသွားသည့် ပြည်သူနေအိမ် (၂၀၀) ကျော်အတွက် လူမှုကူညီရေးအဖွဲ့များက ဆက်လက်ကူညီ ထောက်ပံ့မည်ဖြစ်ကြောင်း နှလုံးသားပရဟိတအဖွဲ့မှ တာဝန်ရှိသူ တစ်ဉီးက သျှမ်းသံတော်ဆင့်ကို ပြောသည်။

“လက်ရှိ မြို့အတွင်းမှာ‌တော့ အခြေအနေတွေ အကုန်ငြိမ်နေပါတယ်။ ထောက်ပံ့မှုကို ဒီ ၂ ရက် အတွင်း လုပ်သွားမှာ ဖြစ်ပါတယ်။ အိမ်ခြေ ၂၀၀ ကျော်လောက်အတွက်ကို သိန်း ၈၀၀ လောက် ကူညီလှူဒါန်းသွားမှာပါ။ ဟိုတခါက ထောက်ပံ့မှုတွေ မရတဲ့ လူတွေအတွက်လည်း ပါမယ်”ဟု ၎င်းက ပြောသည်။

တိုက်ပွဲကြောင့် ထိခိုက်ပျက်စီးမှု အများဆုံးဖြစ်ခဲ့သည့် သီပေါမြို့ရှိ ဇာတ်စုရပ်ကွက်၊ တုံစင့်ကျေးရွာ၊ နားမုံကျေးရွာနှင့် မြို့ပေါ်ရပ်ကွက် အချို့ကို ရာခိုင်နှုန်းအလိုက် ခွဲဝေ၍ နှလုံးသား ပရဟိတအဖွဲ့က ဉီးဆောင်ပြီး လူမှုရေးအဖွဲ့များမှ လှူဒါန်းငွေဖြင့် ကူညီနေခြင်းဖြစ်ကြောင်း သိရသည်။

TNLA သည် သီပေါမြို့ကို ၂၀၂၄ ခုနှစ် အောက်တိုဘာလ နှောင်းပိုင်းတွင် ထိန်းချုပ်နိုင်ခဲ့သော်လည်း လက်ရှိအချိန်ထိ ဒေသဖွံ့ဖြိုးရေး၊ မိုင်းရှင်းလင်းရေး လုပ်ဆောင်မှုများ မရှိသေးကြောင်း ဒေသခံများက ပြောဆိုသည်။

ပြီးခဲ့သည့် မတ်လ ဒုတိယပတ်တွင်လည်း သီပေါမြို့နယ်တွင် “၁၀၂၇ စစ်ဆင်ရေး”ကြောင့် ပျက်စီးသွားသော နေအိမ်များကို တစ်အိမ်လျှင် ၃ သိန်းကျပ်နှုန်းဖြင့် လူမှုကူညီရေး အဖွဲ့များက ကူညီထောက်ပံ့မှုများ ပြုလုပ်ခဲ့ကြောင်း သိရသည်။