သျှမ်းပြည် လွိုင်လင်မြို့နယ် ပင်လုံမြို့တွင် သင်္ကန်းပရိက္ခရာဆိုင် မီးလောင်ခြင်းကြောင့် အမျိုးသမီး (၃) ဦး အပါအဝင် ဆိုင်ရှင်မိသားစု (၄) ဦး သေဆုံးသွားခဲ့ကြောင်း စုံစမ်းသိရသည်။
ယနေ့ (ဧပြီလ ၁ ရက်) နံနက် ၁ နာရီခွဲကျော်တွင် ပင်လုံမြို့ ရပ်ကွက် (၁) ဈေးအရှေ့ဘက်ရှိ ဒေါ်ခင်သန်း သင်္ကန်းပရိက္ခရာဆိုင်တွင် မီးမလာခြင်းကြောင့် ဖယောင်းတိုင်မီးထွန်းအိပ်ရာမှ မီးလောင်ကျွမ်းမှု ဖြစ်ပွားခဲ့ပြီး အမျိုးသမီး (၃) ဦး အပါအဝင် ဆိုင်ရှင်မိသားစု (၄) ဦး သေဆုံးသွားခဲ့ကြောင်း ဒေသခံများက ပြောဆိုသည်။
“မီးမလာလို့ ဖယောင်းတိုင်မီး ထွန်းအိပ်တယ်လို့ပဲ သိထားသေးတာ၊ သေဆုံးတာက ကျား ၁ မ ၃ တစ်ယောက်ကတော့ လွှတ်တယ်။ မီးက ဆိုင်ရှေ့ပိုင်းမှာ လောင်တဲ့ပုံစံ၊ လောင်စာက အားကောင်းတယ် သင်္ကန်းပရိက္ခရာဆိုင် ဆိုတော့လေ အထဲမှာ ပစ္စည်းတွေ များတာ။ ခြုံစောင်၊ သင်္ကန်း၊ အနေကထိုင်တို့ အဲ့လိုပေါ့၊ လောင်စာများပြီး မီးတောက် တအားများတော့ မထွက်နိုင်ဘဲ ပိတ်မိပြီး ဆုံးတာ”ဟု ပင်လုံမြို့မှ မီးသတ်တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
မီးလောင်ကျွမ်းမှုကြောင့် သေဆုံးသွားသူများမှာ ဦးညိုမြင့် အသက် ၅၈ နှစ်၊ ဒေါ်ခင်နှင်းဝေ အသက် ၅၄ နှစ်၊ ဒေါ်နန်းခင်မြ အသက် ၆၆ နှစ် နှင့် ဒေါ်ခင်သန်း အသက် ၆၈ နှစ် တို့ဖြစ်ပြီး လက်ရှိတွင် အလောင်းကို ရင်ခွဲရုံသို့ ပို့ဆောင်ထားပြီး လိုအပ်သည့် စစ်ဆေးမှုများ ပြုလုပ်ပြီးပါက သင်္ဂြိုဟ်မည်ဖြစ်ကြောင်း သိရသည်။
မီးလောင်ကျွမ်းခဲ့သည့် နေအိမ်သို့ ပင်လုံမြို့၊ လွိုင်လင်မြို့နှင့် နမ့်စန်မြို့တို့မှ မီးသတ်ကားများအပြင် ဒေသခံများမှ ထော်လာဂျီများဖြင့် ရေသယ်ယူပြီး မီးငြိမ်းကူခဲ့ရာ ယနေ့နံနက် (၆) နာရီကျော်တွင် မီးစထိန်းနိုင်ခဲ့ကြောင်း ဆိုသည်။
အလားတူ မီးလောင်ကျွမ်းမှုကြောင့် အုတ်မြင့် နှစ်ထပ်အိမ်နှင့် ပစ္စည်းကာလတန်ဖိုး ကျပ်သိန်း (၁၀၀) ခန့် ပျက်စီးဆုံးရှုံးခဲ့ရပြီး မီးလောင်မှုမှ လွတ်မြောက်လာသည့် အမျိုးသမီးတစ်ဦးကိုလည်း ပင်လုံမြို့ ဆေးရုံသို့ ပို့ဆောင်ကာ ဆေးကုသမှု ခံယူနေကြောင်း ဒေသခံများက ပြောသည်။
“မီးပျက်တဲ့ အချိန်ကာလဆိုတော့ မီးသုံးစွဲတာတွေက တော်တော်ဆင်ခြင်မှ ရမယ်၊ မီးက ပျက်လိုက် လာလိုက် ဖြစ်နေတဲ့ အချိန်တွေရယ် အဆင်မပြေ ဖြစ်နေတဲ့ကာလမှာ ဖယောင်းတိုင်မီး ထွန်းလိုက်တာ စနစ်မကျတာပေါ့၊ လျှပ်စစ်မီးကအစ လောင်စာတွေ ဖယောင်းတိုင်မီးတွေ သုံးစွဲတော့မယ် ဆိုရင် စနစ်တကျလေး သုံးစွဲဖို့ပေါ့”ဟု ပင်လုံမြို့မှ ၎င်းမီးသတ်တာဝန်ရှိသူက ဆက်ပြောသည်။
ပြီးခဲ့သည့် မတ်လ (၁၆) ရက်ကလည်း တောင်ကြီးမြို့ပေါ် ညောင်ရွှေဟော်ကုန်းရပ် မြကန်သာပန်းခြံအနီး၊ နန်းထိုက်ရွှေစင်ကွန်ဒိုနှင့် မိဘအရိပ်ကွန်ဒိုအနီးရှိ လျှပ်စစ်ထရန်စဖော်မာမှ ဝါယာရှော့ဖြစ်ပြီး မီလောင်မှုဖြစ်ပွားခဲ့ကြောင်း မြို့ခံများက ပြောသည်။
Leave a Comments