သျှမ်းပြည် လွိုင်လင်မြို့နယ် ပင်လုံမြို့တွင် စစ်ခေါင်းဆောင် မင်းအောင်လှိုင် မိသားစုမှ လှူဒါန်းသည့် ကျောင်းဆောင်သစ် ရေစက်ချပွဲ ပြုလုပ်ခဲ့ပြီး စစ်ခေါင်းဆောင်ဇနီးဖြစ်သူ ဒေါ်ကြူကြူလှနှင့် သားသမီးများ တက်ရောက်ခဲ့ကြောင်း စုံစမ်းသိရသည်။
ယနေ့ (ဧပြီလ ၁၀ ရက်) နေ့လယ်ပိုင်းတွင် ပင်လုံမြို့ မေတ္တာအေးရိပ် ပရဟိတကျောင်း (ဝမ်လုံ) တွင် ကျင်းပပြုလုပ်ခဲ့သည့် စစ်ခေါင်းဆောင် မင်းအောင်လှိုင် မိသားစုမှ ဆောက်လုပ်လှူဒါန်းသော နာယက ကျောင်းဆောင်သစ် ရေစက်ချပွဲ၊ ရေ၊ လျှပ်စစ်မီးနှင့် လမ်းဖွင့်ပွဲသို့ စစ်ခေါင်းဆောင်ဇနီးဖြစ်သူ ဒေါ်ကြူကြူလှ၊ သားဖြစ်သူ အောင်ပြည့်စုံနှင့် ချွေးမဖြစ်သူ မျိုးရတနာထိုက်တို့ တက်ရောက်ခဲ့ကြသည်။
၎င်းအခမ်းအနားသို့ မန်ဆူသျှမ်းကျောင်းဆရာတော် ဒေါက်တာ ဘဒ္ဒန္တ ပုညနန္ဒ လည်း ကြွရောက်ချီးမြှင့်ခဲ့ပြီး ခိုလမ်မြို့အခြေစိုက် အရှေ့အလယ်ပိုင်း တိုင်းစစ်ဌာနချုပ် (ရလခ) တိုင်းမှူး ဗိုလ်ချုပ် မျိုးမင်းထွန်းလည်း တက်ရောက်ခဲ့ကြောင်း ဒေသခံများ ပြောဆိုချက်အရ သိရသည်။
လာမည့် ဧပြီလ (၁၁)ရက်တွင် တောင်ကြီးမြို့ရှိ ရွှေဘုန်းပွင့်စေတီ ထီးတင်ပွဲပြုလုပ်မည်ဖြစ်ပြီး ထိုပွဲသို့ စစ်ခေါင်းဆောင် မင်းအောင်လှိုင်တက်ရောက်မည် ဖြစ်သောကြောင့် မြို့တွင်း အဝင်အထွက် ကားများကို စစ်ဆေးမှုတင်းကြပ်နေပြီး ၎င်းနောက်တွင် ငလျင်ဒဏ် အပြင်းအထန် ခံစားနေရသည့် အင်းလေးဒေသသို့ သွားရောက်မည်ဖြစ်ကြောင်း ဒေသခံများက ပြောသည်။
Leave a Comments