သျှမ်းပြည် လွိုင်လင်ခရိုင် ပင်လုံမြို့မှာ လျှပ်စစ်မီးပေးဝေမှုနဲ့ ပတ်သက်ပြီး မျှတမှုမရှိကြောင်း ရင်ဖွင့်ချင်လို့ ဒီစာကိုရေးလိုက်ခြင်း ဖြစ်ပါတယ်။

ကျနော်တို့ ပင်လုံမြို့ ရပ်ကွက် ၃ မှာ ညဘက်ဆို မီးပျက်နေတာကြာပါပြီ။ နေ့ပိုင်းဆိုရင်လည်း ၅ မိနစ်လောက် မီးလာပြီး ပြန်ပျက်လိုက်နဲ့ တောက်လျှောက်ကို ဖြစ်နေတာပါ။

မီးပျက်တဲ့အကြောင်းအရင်းကို မေးကြည့်တော့ မီးအားမနိုင်လို့ ဘရိတ်ကာ (Breaker) ခဏခဏကျနေတယ်လို့ ပြောတယ်။ ကျနော်တို့ ရပ်ကွက် ၃ မှာက စက်ကြီးတွေသုံးတဲ့ ပါဝါမီတာတွေအရမ်းများတော့၊ သူတို့ စက်ကြီးတွေ မောင်းပြီဆိုတာနဲ့ ဘရိတ်ကာ (Breaker)က ချက်ချင်းကျသွားတာပါ။

မီးအားဆိုလည်း ၁၃၀ ကျော်လောက်ဘဲရှိပါတယ်။ အများဆုံး မီးအားတက်ရင်လည်း ၁၈၀ လောက်ဘဲ ရှိတယ်။ ဒါတောင် ညအရမ်းနက်မှ မီးအားကအဲ့လောက်ရှိတာပါ။ ရပ်ကွက် ၂ က မီးလိုင်းနဲ့ချိတ်ထားတဲ့ အိမ်တွေဆိုရင်တော့ မီးလာနေတာကို မြင်နေရပြီး ကျနော်တို့ ရပ်ကွက်ထဲမှာ မှောင်နေတာ တစ်လလုံးတောင် မကတော့ဘူး။ တစ်နှစ်နီးပါးလောက် ရှိနေပါပြီ။

တစ်မြို့လုံးမီးပျက်လို့ မီးပြန်လာချိန်ဆို သူများရပ်ကွက်ထက် ကျနော်တို့ ရပ်ကွက် ၃ က မီးလာချိန် အမြဲနောက်ကျတယ်။ မီးပျက်ချိန်ရောက်ရင်တော့ တစ်မြို့လုံးနဲ့ အတူတူပျက်တယ်။ လျှပ်စစ်ရုံးက တာဝန်ရှိတဲ့လူတွေအနေနဲ့ မီးလိုင်းတွေကိုသေချာပြန်ဆွဲပြီး ထရန်စဖာ (Transfor) နိုင်တဲ့ဝန်အားကို သေချာတွက်ချက်ပြီး ဖြစ်ဖြစ် ကြိုးစားဆောင်ရွက်ပေးစေချင်ပါတယ်။

ပင်လုံမြို့ ရပ်ကွက် ၃ တံတားဦးလမ်းမှာရှိတဲ့ ထရန်စဖာ (Transfor) လည်း ပါဝါမီတာတပ်ဆင်ထားတဲ့ အိမ်တွေများနေတာကြောင့် ဝန်အားမနိုင်တာဖြစ်ပြီး ဘရိတ်ကာ(Breaker) ခဏခဏကျပါတယ်။ အခုဖြစ်နေတဲ့ ပြဿနာကို တာဝန်ရှိသူတွေဆီ ဖုန်းဆက်အကြောင်းကြားလည်း အဆင်ပြေအောင် ဆောင်ရွက်ပေးခြင်း မရှိသေးပါဘူး။

ထရန်စဖာ (Transfor) ကို သွားကြည့်တော့ မီးကလင်းနေတယ်။ သက်ဆိုင်ရာကို ဖုန်းဆက်ပြောပြီး မီးပြန်လာတင်ခိုင်းပါတယ်။ လာတင်ပြီး ၅ မိနစ်ထက် မပိုပါဘူး၊ ပြန်ပျက်တော့တာပါပဲ။ အဲ့လိုဖြစ်တော့ သက်ဆိုင်ရာကို ဖုန်းဆက်အကြောင်းကြားပါတယ်။ ဖုန်းထပ်ခါထပ်ခါ ဆက်လွန်းလို့လားမသိဘူး၊ ကျနော် ဖုန်းနံပါတ်ကိုပါ (Block) လုပ်ထားပါတယ်။ လျှပ်စစ်ဦးစီးအနေနဲ့ ကိုယ်တာဝန်ကျတဲ့မြို့မှာ မီးအဆင်ပြေအောင် သေချာဆောင်ရွက်ပေးစေချင်ပါတယ်။

ပြီးခဲ့တဲ့လတုန်းက ဘရိတ်ကာပျက်လို့ဆိုပြီး အဲ့ transfor နဲ့ချိတ်ထားတဲ့အိမ်တိုင်းကို တအိမ်လျှင် ကျပ် ၅ထောင် ဆိုပြီး ကောက်ပါသေးတယ်။

မီးပျက်နေတာ အခုဆိုတစ်ပတ်လောက်ရှိနေပါပြီ။ အခြားရပ်ကွက်တွေမှာ တစ်နေ့ကို မီး ၁၀ နာရီအထက် လာပေမဲ့ ကျနော်တို့ရပ်ကွက် ၃ မှာတော့ မီးလာတာ တစ်ရက်မှ ၃ နာရီတောင်မပြည့်ပါဘူး။