ယနေ့ (မတ်လ ၂၈)  နေ့လယ်ပိုင်းတွင် စစ်ကိုင်း ရေခါးအင်း စာရေးရွာအနီး ဗဟိုပြု၍အင်အား ရစ်ချ်တာစကေး ၇ ဒသမ ၇ ပြင်းထန်အင်အားရှိသော မြေငလျင်လှုပ်ခတ်မှုကြောင့် မြန်မာနိုင်ငံတဝန်း ထိခိုက်သေဆုံးမှုများ ဆက်တိုက်မြင့်တက်လျက်ရှိသည်။

ထို့အပြင် ငလျင်လှုပ်ခတ်ပြီးနောက်ပိုင်း အချို့နေရာများတွင် ဖုန်းလိုင်း၊ အင်တာနက်လိုင်းများလည်း ပျက်တောက်နေပြီး အဆက်အသွယ်များမရရှိကြောင်း ညောင်ရွှေမြို့ခံတစ်ဦးက သျှမ်းသံတော်ဆင့်သို့ ပြောသည်။

“နန်းပန်နဲ့ ရွာမမှာတော့ လူသေတယ်လို့ကြားတယ်၊ ဒါပေမယ့် ဘာမှ မသိရသေးခင်ဖုန်းလိုင်းတွေ အင်တာနက်တွေပျက်သွားတယ်၊ ခုတောင် MPT တစ်မျိုးပဲ သုံးလို့ရတယ်” ဟု အသက် ၂၄ နှစ််အရွယ် ညောင်‌ရွှေမြို့မှ လူငယ်တစ်ဦးက သျှမ်းသံတော်ဆင့်သို့ပြောသည်။

ငလျင်ဒဏ်ကြောင့် ညောင်ရွှေမြို့နယ်၊ နန်းပန်မြို့နှင့် ဟဲယာရွာမတို့အတွင်း လူ (၂၅) ဦးထက်မနည်း  သေဆုံးကြောင်း သတင်းများထွက်ပေါ်နေပြီး သျှမ်းသံတော်ဆင့်မှ ဆက်လက်စုံစမ်းနေဆဲဖြစ်သည်။

ထို့အပြင် နာမည်ကျော် အင်းလေးဖောင်တော်ဦးဘုရားတွင်လည်း ဘုရားကျောင်းဆောင်၊ ရင်ပြင်တော်နှင့် ဒေသစာရီကြွချီရာတွင် အသုံးပြုရာဖော်တော်ထားရပ်နားထားသည့် အဆောင်များပြိုကျပျက်စီးခဲ့ပြီး လူနေအိမ်များ ရာနှင့်ချီပျက်စီးဆုံးရှုံးခဲ့ရကြောင်း ဒေသခံများမှ တဆင့်သိရသည်။

၂၀၂၄ ခုနှစ် အတွင်း ရေကြီးမှုဒဏ်ဆိုးဝါးစွာခံစားခဲ့ရပြီး  ပြန်လည်နလံထူရန်ကြိုးစားရုန်းကန်နေရသည့် အင်းလေးဒေသတစ်ခုလုံးတွင် ငလျင်ဒဏ်ကြောင့် အိမ်များစွာထပ်မံပျက်စီးခဲ့ပြီး အကူအညီများစွာ လိုအပ်လျက်ရှိသည်။ 

အလားတူ  အောင်ပန်းမြို့တွင်လည်း ဟိုတယ်တစ်လုံးပြိုကျသွားခဲ့ပြီး လူ ၂ ဦးသေဆုံးကာ ၂၀ ကျော်ပိတ်မိနေကြောင်း မြို့ခံများ၏ လူမှုကွန်ယက်စာမျက်နှာများတွင်ဖော်ပြထားသည်။

“ဒီနေ့ဖြစ်တာ သေပြီလို့ထင်လိုက်တာ၊ ပထမတစ်ကြိမ်တုန်းက ခုံအောက်ဝင်ပုန်းတယ်၊ ဒုတိယအကြိမ်က မနေရဲတော့လို့ အဆောက်အဦးအပြင်ဖက်ထွက်ပြေးရတယ်၊ အပေါ်တစ်ထပ်လုံး မှန်တွေကွဲတယ်၊ ရေခဲသေတ္တာတွေ ဗီဒိုတွေအကုန်လဲပြိုကုန်တာ” ဟု ရွှေညောင်မြို့တွင်နေထိုင်သူတစ်ဦးက သျှမ်းသံတော်ဆင့်သို့ပြောသည်။ 

ငလျင်ဒဏ်ကြောင့် တောင်ကြီးမြို့ပေါ် City Square Shopping Center တွင်လည်း နံရံအက်ကွဲမှုများ ဖြစ်ပေါ်ခဲ့ပြီး အနီးတဝိုက်ရှိ လူနေအိမ်များကိုလည်း အရေးပေါ်ပြောင်းရွှေ့ခိုင်းထားကြောင်း မြို့ခံများထံမှ သိရသည်။

လက်ရှိတွင် လျှပ်စစ်မီးနှင့် ဖုန်းလိုင်းပြတ်တောက်မှုများရှိနေပြီး အထပ်မြင့်အဆောက်အဦးများတွင် နေထိုင်သောပြည်သူများအနေဖြင့်လည်း ယာယီရွှေ့ပြောင်းနေထိုင်ကြရန်လည်း လိုအပ်ပါသည်။